Udi muvuluke anyi?

Uvuaku muele meji ne ntema ku nimero ya ndekelu ya Tshibumba tshia Nsentedi anyi? Pikalabi nanku, udi mua kusanka bua kuvuluka malu adi alonda aa:

◻ Mmunyi mudi bena mabaka bavule lelu’eu balonde tshilejilu tshimpe tshishiya kudi Akula ne Pisikila?

Akula ne Pisikila bakasadila mu bisumbu kabukabu. Anu bu buobu, bena nkristo ba bungi ba matuku etu aa mbadiakaje buobu bine bua kuya muaba udi dijinga ditambe bunene. Mbapete kabidi disanka ne disankishibua bidi bifumina ku dimona bipatshila bia Bukalenge bienda bitanta ne ku dikala ne mushindu wa kudima malunda a Buena-nkristo a mushinga mukole.​—15/12, dibeji dia 24.

◻ Mmuenenu kayi udi nende Bible pa maluvu makole?

Mmuenenu wa Bible pa maluvu makole udi wa nkatshinkatshi. Ku lumue luseke, Bible udi wamba ne: mvinyo ndipa dia kudi Nzambi. (Musambu 104:1, 15) Ku lukuabu luseke, udi upiisha dinekesha. (Luka 21:34; 1 Timote 3:8; Tito 2:3; 1 Petelo 4:3)​—15/12, dibeji dia 27.

◻ Nngikadilu kayi wa mushinga udi nende mukanda wa mu Bible wa Hagai?

Nansha mudi mukanda wa Hagai muenza anu ne mvese 38, mbatumike ne dîna dia Nzambi misangu 35. Tshiprofete bu etshi tshidi tshimueneka katshiyi ne muoyo padibu bapingaja muanzu “Mfumu” pamutu pa dîna Yehowa.​—1/1, dibeji 6.

◻ Ndilongesha kayi ditudi mua kupetela ku mpekatu ya Davidi ne ya Manase?

Nansha muvua Yehowa mufuile Davidi ne Manase luse, bantu aba babidi​—ne Izalele pamue nabu—​bavua ne bua kumona bipeta bia bienzedi biabu bia mpekatu. (2 Samuele 12:11, 12; Yelemiya 15:3-5) Mu mushindu wa muomumue, nansha padi Yehowa ufuila benji ba mpekatu banyingaladi luse, kudi mua kuikala bipeta bìdì kabiyi mua kuepukibua bia bienzedi biabu.​—1/1, dibeji dia 27.

◻ Mmunyi mudi ‘makasa a aba badi bamanyisha lumu luimpe’ lua Bukalenge bua Nzambi “malengele”? (Yeshaya 52:7)

Mmakasa atu pa tshibidilu endesha muntu padiye uya bua kuyisha bakuabu. Makasa a nunku adi bushuwa tshimfuanyi tshia muntu eu. Nunku, bua ba bungi badi bumvua ne bandamuna bimpe ku lumu luimpe elu lua Bukalenge, makasa a batuadi ba mukenji ba nunku adi bushuwa ne tshimuenekelu tshibotakane.​—15/1, dibeji dia 13.

◻ Mmudimu kayi wa bitupa bibidi udi utangila ‘diambila bantu lumu luimpe’? (1 Kolinto 9:16)

Tshia kumpala, tudi ne bua kumanyisha lumu luimpe lua Bukalenge. Tshitupa tshibidi tshia mudimu eu tshidi tshitangila dilongesha aba badi bandamuna biakane ku dimanyisha dia Bukalenge.​—15/1, dibeji dia 23.

◻ Mmasanka kayi adi muntu nkayende mua kupeta mu kuimba kua misambu ya Bukalenge mu bisangilu bia tshisumbu?

Kuimba kudi kutupesha mushindu wa kujikula nyanji yetu bua Mufuki wetu. (Musambu 149:1, 3) Patudi tupumuna mutshima wetu mu dimba mu tshisumbu, bidi mua kututeka mu ndongoluelu muakanyine wa lungenyi ne wa mutshima bua programe udi ulonda. Bidi mua kutusaka ku didifila ditambe bunene mu ntendelelu wa Yehowa.​—1/2, dibeji dia 28.

◻ Ndîba kayi ditudi mua kuamba ne: dituku dia lufu ndipite dia kuledibua bulengele? (Muambi 7:1)

Dituku didi muntu ufua didi mua kupita dituku didibu bamulela, pikala dîba adi muntu mudipetele lumu luimpe kudi Yehowa, eu udi mua kubiisha bantu bena lulamatu bàdì bafua. (Yone 11:25)​—15/2, dibeji dia 12.

◻ Bua tshinyi mukanda wa Muambi udi ne bua kutuambuluisha ku muntu ne ku muntu?

Udi mua kuambuluisha yonso wa kutudi bua kululamija mmuenenu wetu bua muoyo ne bua tshitudi tuipatshila. (Muambi 7:2; 2 Timote 3:16, 17)​—15/2, dibeji dia 16.

◻ Bantemu ba Yehowa mbashimatshi ku malu a ntaku anyi?

Tòo. Nansha mudibu ne mitabuja makole mu malu a ntendelelu, ki mbashimatshi ku malu a ntaku mu ngumvuilu mutumika ne mbikidilu eu nansha. Kabena benza ngendu mu njila ne benzela aba badibu kabayi bapetangana nabu ku mêyi tshinyangu nansha. Badi bidikija Mulombodi wabu, Yezu Kristo.​—1/3, dibeji 6.

◻ Dipanga kumanya tshikondo tshijalame tshia dilua dia Yezu bua kukumbaja disombuela dia Nzambi didi ne buenzeji kayi kudi bena nkristo?

Didi diambuluisha bena nkristo bua kushala batabale ne ku dituku dionso didi dibapesha tshikondo tshia kujadika ne: badi basadila Yehowa kabayi ne tuenzela tua budinangi.​—1/3, dibeji dia 13.

◻ Ntshinyi tshitudi ne bua kukonkonona bangabanga ne kufunda ku kabadi muanetu kampanda udi mua kuikala mutudinge?

Tudi ne bua kutangila malu adi mua kutufikila tuetu bine, banga bantu badi bualu ebu butangila, tshisumbu, ne bena pambelu. (1 Kolinto 6:7)​—15/3, dibeji dia 22.

◻ Mmunyi mutudi mua kupeta diakalenga dilelela?

Diakalenga dilelela didi ngikadilu wa mutshima, mushindamene pa ditabuja dilelela ne malanda mimpe ne Yehowa. (Matayo 5:3)​—15/3, dibeji dia 23.

◻ Ntshinyi tshidi muena nkristo ne bua kuenza padiye mubikidibue mu tshipangu tshia bena mutshipu?

Muena nkristo yonso udi mutuilangane ne mudimu wa mu tshipangu tshia bena mutshipu udi ne bua kujadika njila wa kulonda, mushindamene pa ngumvuilu wende wa Bible ne pa kuondo ka muoyo kende yeye nkayende. (Galatia 6:5)​—1/4, dibeji dia 29.