“Sadilayi Mukalenge Kristo bu bapika”
MU MALU a kale, miliyo ya bantu ivua mitantamene bujitu bua bupika. Tshilejilu, kukadi kupite binunu bia bidimu, bena Izalele bakakenga bikole ku bianza bia batangidi bena Ejipitu. Bu mudi Bible wamba ne: “kutekabo ku mutu kua bena Israele bantu bavua babenzeja midimu mikole,” nangananga ku dienza dia madiotu.—Tshimuangi 1:11, MMM.
Mu matunga mavule lelu’eu, bantu kabena mua kusadila bu bapika mu ngumvuilu wa ku dîna, kadi bavule badi ne bua kutumika munkatshi mua mêba mulongolongo muinshi mua nsombelu idi ilomba mudimu mukole—imue misangu mikolakane. Badi muinshi mua bujitu bunême bua tshitudi mua kubikila ne: bupika bua malu a mfranga.
Kadi, kudi mushindu mukuabu wa bupika ukena ne bujitu. Mupostolo Paulo wakabela bena kuitabuja nende ne: “Sadilayi Mukalenge Kristo bu bapika.” (Kolosai 3:24, NW) Aba badi basungula bua kulua bapika ba Kristo badi bapeta disulakana ku majitu abu manême. Yezu nkayende wakamba ne: “Luayi kundi, nuenu bonso badi bakenga ne bazengele ne majitu, ne nennukankamije. Angatayi tshikokedi tshianyi ne nulongele kundi, bualu ndi mupole-malu ne mupuekele mu mutshima, ne nenupete dikankamija bua anyima yenu. Bualu tshikokedi tshianyi ntshinefuke ne bujitu buanyi mbupepele.”—Matayo 11:28-30, NW.
Ditaba tshikokedi tshia Kristo kadiena dikopola muntu ku bujitu bua kupetesha dîku diende bintu bidi bikengedibua ku mubidi. (1 Timote 5:8) Kadi, didi difila budikadidi ku dikutakajibua mu mateyi mavule a bipatshila bia bintu bia ku mubidi. Pamutu pa kuvuija bintu bia ku mubidi tshipatshila tshiabu tshinene mu nsombelu, bena nkristo badi bapeta disankishibua mu bintu bia nshindamenu bidi bikengedibua.—1 Timote 6:6-10; fuanyikija ne 1 Kolinto 7:31.
Bena nkristo badi bapeta kabidi dikankamija mu dikumbaja bujitu buabu bua diyisha “lumu luimpe” lua Bukalenge bua Nzambi. (Matayo 24:14) Ebi bidi bituala disanka ne disankishibua bia bushuwa!
Tudi ne bua kuikala ne dianyisha bua mutudi mua ‘kusadila Mukalenge Kristo bu bapika’!
[Mêyi a dianyisha bua tshimfuanyi mu dibeji 32]
Pictorial Archive (Near Eastern History) Est.