Nkonko ya babadi

Tuvua basanke bikole mu dilonga dietu pa mufuanu wa Yezu wa mikoko ne mbuji. Pa kumona ngumvuilu mupiamupia muleja mu Tshibumba tshia Nsentedi tshia dia 15 Kasuamansense 1995, tutshidi anu mua kuamba ne: Bantemu ba Yehowa badi lelu benza mudimu wa ditapulula anyi?

Eyowa. Mu mushindu mumvuike, bavule mbadiele nkonko pa bualu ebu bualu Matayo 25:31, 32 udi wamba ne: ‘Palua Muana wa muntu mu butumbi buende ne banjelo bonso, neashikame mu nkuasa wa butumbi buende; bisamba bionso nebisangakane ku mpala kuende, yeye neabatapulule bu mudi mulami utapulula mikoko ne mbuji.’ Tshibumba tshia Nsentedi tshia dia 15 Kasuamansense 1995 tshiakaleja bua tshinyi mvese eyi idi ikumbana panyima pa dikenga dinene dimane kubanga. Yezu nealue mu butumbi buende ne banjelu bende ne neasombe mu nkuasa wende wa bumfumu wa dilumbuluisha. Pashishe, neatapulule bantu. Mmu ngumvuilu kayi? Neamanyishe mapangadika mashila pa bikala bantu benze anyi kabayi benze kumpala kua tshikondo atshi.

Tudi mua kubifuanyikija ne ntungunukilu wa tshilumbu udi ufikisha ku dikosa dia bualu ku kabadi. Tshijadiki tshidi tshiibakibua mu lupolo lua matuku a bungi kumpala kua kabadi kukosa tshilumbu. Tshijadiki tshia kumona bikala bantu badi ne muoyo lelu mua kulua mikoko peshi mbuji tshikadi tshipitshishe lupolo lule. Ne tshitshidi tshienda tshitungunuka. Kadi padi Yezu usomba mu nkuasa wende wa bumfumu, tshilumbu netshikale tshijike. Neikale mudiakaje bua kukosa tshilumbu. Bantu nebikale batapulula bua dibutuka dia kashidi peshi bua muoyo wa kashidi.

Kadi, bu mudi ditapulula dia bantu bua muoyo anyi bua lufu dileja mu Matayo 25:32 ditshikale bua matuku atshilualua, ebi kabiena biumvuija ne: ditapulula peshi diabulula nansha dimue kadiena dienzeka kumpala kua bualu ebu to. Mu Matayo nshapita 13, Bible udi uleja ne: umue mudimu wa ditapulula udi wanji kuenzeka kumpala. Bualu bua dikema, mukanda wa Bobumue mu tshitendelelu tshia Nzambi umue mulelela, mu dibeji 180, udi wakula bua “Ditapulula dia bantu.”a Mukanda udi wamba ne: “Kudi kabidi malu makuabu avua Yezu mumanyishe adi atangila nshikidilu wa bulongolodi ebu bua malu. Bumue bua ku malu aa budi butangila ditapulula dia ‘bana ba mu bukalenge’ ne ‘bana ba bubi.’ Yezu wakakula bua ditapulula edi mu lusumuinu luende lukuabu, muvuaye uleja budimi bua mponda muakalua muluishi kukuna ntete ya lupela.”

Mukanda eu uvua utela mufuanu wa Yezu muleja mu Matayo 13:24-30 ne mumvuija mu mvese 36-43. Bambisha mu mvese wa 38 se: ntete mimpe ya mponda idi ileja bana ba Bukalenge, kadi ntete ya lupela idi ileja bana ba mubi. Mvese 39 ne 40 idi ileja ne: ku ‘nshikidilu wa bulongolodi ebu bua malu’​—mu tshikondo etshi tshitudi ne muoyo—​ntete ya lupela idi isangishibua. Badi bayitapulula ne ndekelu wa bionso bayosha, bayibutula.

Mufuanu eu udi utangila bena nkristo bela manyi (badi babikidibua mu mufuanu wa mikoko ne mbuji ne: bana babu ne Yezu). Kadi, mbimueneke patoke ne: ditapulula kampanda dia mushinga mukole didi dienda dienzeka mu tshikondo tshietu etshi, ne bela manyi bikale batapuludibua ku aba bàdì badiamba mudibu bena nkristo kadi eku bikale badijadika “bana ba mubi.”

Yezu wakafila bikuabu bilejilu bia bantu batapulula. Vuluka muakambaye bua njila mualabale udi ufikisha ku kabutu ne: “Bantu ba bungi badi babuelamu.” (Matayo 7:13) Etshi katshivua nseka anu pa bipeta bia ndekelu bia muanda eu. Tshidi nseka pa ntungunukilu mulunguluke, anu bu mudibi bilelela lelu’eu bua bakese badi bapeta njila mubumbakane udi ufikisha ku muoyo. Vuluka kabidi ne: pa kutuma bapostolo, Yezu wakamba ne: bavua ne bua kupeta bamue bavua mua kuikala bakanyine. Bakuabu kabavua mua kuikala bakanyine to, ne bapostolo bavua ne bua kututula lupuishi lua ku makasa abu ‘bu tshimanyinu tshia dibenga dia bantu ba nunku.’ (Luka 9:5) Kabienaku bilelela se: bualu bua muomumue budi buenzeka padi bena nkristo bakumbaja mudimu wabu wa patoke lelu’eu anyi? Bamue badi bandamuna bimpe, eku bakuabu babenga mukenji wa Nzambi utudi tuenda nawu.

Biena-bualu bia mu Tshibumba tshia Nsentedi bidi bitangila mikoko ne mbuji bidi bileja ne: “Bu mudi dilumbuluisha diumvuija mu mufuanu eu dia matuku atshilualua akadi pabuipi, nansha mpindieu bualu kampanda bua mushinga budi buenda buenzeka. Tuetu bena nkristo tudi badifile mu mudimu wa dipandisha mioyo wa dimanyisha mukenji udi utuala ditapuluka mu bantu. (Matayo 10:32-39).” Mu tshitupa atshi tshia Matayo nshapita 10, tudi tubala muakamba Yezu ne: dimulonda divua ne bua kuikala mpokolo wa diabulula​—tatu ne muanende wa balume, muana wa bakaji ne mamuende.

Ndekelu wa bionso, bana betu bela manyi badi bantunga-mulongo mu bumanyishi bua mukenji wa Bukalenge pa buloba bujima. Padi bantu bauteleja ne bandamuna bimpe anyi bibi, badi badileja buobu nkayabu tshidibu. Tuetu bantu katuena mua ne katuena ne bua kuamba ne: ‘Muntu eu mmukoko; wawa mmbuji,’ bilondeshile ngumvuilu mufila mu Matayo nshapita 25. Nansha nanku, dileja dietu dia lumu luimpe kudi bantu didi dibapetesha mushindu wa kuleja luseke ludibu​—tshidibu bikale ne mudibu bandamuna kudi bana babu ne Yezu. Pa nanku, bu tshijadiki tshidi tshienda tshivula bua tshilumbu ku kabadi, diabuluka pankatshi pa aba badi bakuatshisha bana babu ne Yezu ne aba badi babenga kubakuatshisha didi dienda dijadikibua. (Malaki 3:18) Bu muakaleja Tshibumba tshia Nsentedi, Yezu neasombe mu katupa kîpi emu mu nkuasa wende wa bufumu bua kukosa tshilumbu, ne bantu nebatapuludibue mu dilumbuluisha mu ngumvuilu wa ndekelu bua muoyo peshi bua kabutu.

[Mêyi adi kuinshi]