Padi Bantemu ba Yehowa bakumbula

Ntshinyi tshidi bena Katolike ne bua kuenza padi Ntemu wa Yehowa ubakumbula ku mabu? Mukanda mufunda matuku mashale aa mulongolola kudi Biro bia Kateshisme bia Ditunga bia Tshipangu tshia Bepiskopo ba mu Italie udi wamba ne: “Kubenga diyuki nansha ne mimuemue, kadi kubenga ne muoyo umue, ki nkupanga bulenga mu bualu ebu to.”

Bena Katolike bonso kabena bitaba nanku, bu mudibi bileja kudi mukanda mutumina bena tshikandakanda tshia Gazzetta del Mezzogiorno kudi muntu kampanda musombele ku Foggia, mu Italie:

“Tshiena Ntemu wa Yehowa nansha. Ndi muena Katolike. Kadi ndi nkema bua imue mikenji idi ekleziya welela bena kuitabuja, ubalomba bua kulamika tukanda tua mamanyisha ku biibi biabu bua kuipata Bantemu ba Yehowa. Bantu aba, pa kutangila bimpe, badi anu batuala Dîyi dia Nzambi, ne badi bambuluisha bakuabu bua kupeta dimanya diondoke dia Bible. Mbimvuluije tshikondo tshivua Italie mufinakaja kudi disama dia kolera ne mutuakapeta mubelu pa mushindu wa kuepuka tshipupu etshi.

“Ku dianyi dimona, ebi bidi bileja ne: nansha ekleziya udi ukanyika mikenji yende nkayende kayi utangila majinga a bena kuitabuja. Kadi kudi mpindieu bidimu bipite, ndi mmona se: nansha bena Katolike badi pabu baya ku nzubu ne ku nzubu, bakumbula mêku a Bantemu ba Yehowa kabidi; ne badi buobu babanyisha ku mabu, bayukila nabu, kabayi bipata muntu.”

Bantemu ba Yehowa kabatu benzeja bantu ku bukole bua kuitababu mukenji wabu. Bishilangane, badi benza madikolela bua kuabanyangana ne bakuabu ditekemena dileja patoke mu Dîyi dia Nzambi didibu buobu bine bamone dikale disambangana mu bikondo ebi bisaluke. Mu diya ku nzubu ne ku nzubu, nansha ku diakulangana ne badibu basangana mu njila, Bantemu ba Yehowa badi babanyangana lumu luimpe lua Bukalenge bua Nzambi ne aba badi basue kuteleja​—Matayo 24:14; Bienzedi 5:42; 17:17.