Mmunyi muudi wangata mpekatu?

“KAKUENA mpekatu munda muebe, kakuena dikenga munda muebe; wewe udi tshilaminu tshia bukole kabuyi mikalu.” Vivekananda, muena nkindi wa bena Hindu muende lumu, wakamba mêyi aa pavuaye umvuija mvese wa mu Bhagavad-Gītā, mukanda munsantu wa bena Hindu. Muikale utela Vedanta, udi wamba ne: “Tshilema tshitambe bunene ntshia kuamba ne: udi ne butekete, ne: udi muena mpekatu.”a

Kadi, mbulelela se: kakuena mpekatu munda mua muntu anyi? Ne bikalaku kakuyi tshintu nansha tshimue, ntshinyi tshidi muntu upiana ku diledibua? Nikhilananda, mulongeshi wa meji wa bena Hindu udi wamba ne: anu “bimanyinu bia ku mubidi ke bidi busambulujidianganyi bujadika.” Bimanyinu bikuabu mbijadika kudi “bienzedi bia mu mioyo ya kumpala” ya muntu. Bilondeshile Vivekananda, “wewe nkayebe udi mfuki wa tshimana-kufunda tshiebe.” Buena-Hindu kabuena bulongesha bualu nansha bumue pa bidi bitangila mpekatu mupiana.

Dilongesha dia mpekatu mupiana kaditu kabidi munkatshi mua balondi ba Zarathushtra, bena Shinto, balondi ba Confucius, ne bena Buddha. Nansha bua bitendelelu bidi bifumine ku Buena-Yuda ne Buena-nkristo, bitu bilongeshe pa tshibidilu dilongesha dia mpekatu mupiana, mmuenenu wabi bua mpekatu udi wenda ushintuluka. Bantu bapite bungi lelu’eu kabena badimona bu bena mpekatu nansha.

“Lungenyi lua buena-lelu kaluena lukankamija dipisha malu a mu nsombelu; kaluena nangananga lukankamija didipisha,” ke mudi muena teoloji Cornelius Plantinga, Jr. wamba. Ekleziya ya Bukua-buena-nkristo idi ne bua kubandibua ndambu bua dipepeja bunene bua mpekatu. Mfumu kampanda wa ekleziya, ne mulongeshi mu Université wa Duke udi wamba ne: “Kuyi mu ekleziya biwikala kuena musue kumvua bakula bua mpekatu.” Ne bilondeshile Plantinga, imue ekleziya itu pa tshibidilu yakula bua mpekatu anu idi itangila malu a mu nsombelu.

Mbimanyike se: tunyinganyinga tua mu nsombelu wa matuku etu aa tudi tua bungi. Tshinyangu, dibunda bibawu, mvita, diluangana dia bisa, ditumika dibi ne bintu bia lulengu, dipanga bululame, difinakaja, ne tshinyangu tshienzela bana mbitangalake. Bushuwa, mbabikile siekele wa 20 bu umue wa ku siekele ya diela dia mashi panshi dipite bunene ditu bukua-bantu kabuyi buanji kumona. Tusakidilaku tunyinganyinga ne makenga adi afumina ku masama, bukulakaje, ne lufu. Nnganyi utu kayi ujinga dipikudibua ku ntatu mipite bukole idi pa buloba lelu’eu?

Nanku, ntshinyi tshidi mmuenenu webe bua mpekatu? Mpekatu mmupiana anyi? Tuadiakupetaku dipikudibua ku tunyinganyinga ne makenga anyi? Tshiena-bualu tshidi tshilonda netshikonkonone nkonko eyi.

[Mêyi adi kuinshi]