“Mabue a mushinga mukole a bulelela”

“Mabue a mushinga mukole a bulelela.” Ke mudi mukanda kampanda mutumina filiale wa Bantemu ba Yehowa mu ditunga dia Nigeria umvuija bibejibeji bibidi bia pa buabi. Mufundi nnsongalume mukuabu, udi umvuija ne:

“Ndi mfunda bua kuela tuasakidila wa manza tente bua madikolela enu mu dileja mu tshikoso pabuipi ne malu onso a nsombelu wa ku dituku ne ku dituku ku diambuluisha dia bibejibeji bia Tshibumba tshia Nsentedi ne Réveillez-vous!

“Ndi ne bidimu 17. Tshidimu tshishale kadiomba ka mu muaba utudi basombele kakenzeja diteta dia difunda pa tshiena-bualu tshia: ‘Kudi bivule bia kunanga kupita diangatangana​—SIDA mbualu bulelela.’ Diteta dionso difunda kadivua ne bua kuikala muinshi mua miaku nkama inayi nansha. Difutu dia dolare 12,50 divua ne bua kufidibua bua diteta dimpe kupita onso. Bushuwa, bakamba ne: bantu bavua ne bua kufunda kabiyi anu bua kupeta difutu, kadi nangananga bua kulonga tshintu kampanda. . . .

“Ngakapeta mamanyisha adi atangila SIDA mu bibejibeji bionso bibidi. Bua dinanga, kuvua biena-bualu bipite bungi. Ngakatumika ne malu a mu Réveillez-vous! wa dia 8 Tshimungu 1978 (Angl.).

“Ngondo ibidi patupu panyima pa dituma diteta dianyi difunda, bipeta biakapatuka. Biakankemesha, ngakapatuka wa kumpala mu rejon wa Cross River ne wa Akwa Ibom!

“Mamanyisha onso angakatumika nawu akafumina mu bibejibeji. Bidi bikemesha bushuwa bua mudi Yehowa utupesha mamanyisha mu tshikondo tshiakanyine mu bulongolodi ebu bua bimvundu ne budi bunyanguke mu nsombelu yonso. Bu mutudi bena nkristo balelela, tudi bamanye ne: kudi bivule, bivule bitambe bia kunanga kupita diangatangana. Ne, bushuwa, dikala ne nsombelu mukezuke ne wa tshitembu didi ditukuba ku masama bu mudi SIDA.

“Ngakadiumvua musakibue bua kunuela tuasakidila bua mabue aa a mushinga mukole a bulelela anudi nupatula kakuyi dipungila. Yehowa atungunuke ne kubenesha madikolela enu bu munudi nutungunuka ne kutupetesha bibejibeji ebi bia mushinga mukole.”