Bamanyishi ba Bukalenge badi balonda

Wakapeta “dibue dia mushinga mutambe bukole”

‘BUKALENGE bua mu diulu kabidi budi bu muntu udi biende muendi wa mushinga, udi ukeba mabue mimpe a mushinga mukole; pakasanganaye dibue dia mushinga mutambe bukole, wakaya, wakapana bintu biende bionso, wakadisumba.’ Ku diambuluisha dia mêyi aa, Yezu wakaleja mushinga kauyi ditshinka wa Bukalenge bua Nzambi. (Matayo 13:45, 46) Aba badi bajingulula mushinga wa Bukalenge ebu batu misangu mivule badibudisha bintu bivule bua kumona mua kubupeta. Ebi mbileja kudi bualu bumona budi bulonda ebu bua mu Pingdong, ku Taiwan.

Mu 1991, muena-muabu Lin ne inabanza wende bakabanga kulonga Bible ne Bantemu ba Yehowa. Pakasokolola mfumu kampanda wa ekleziya wa muaba au, wakateta bua kubenzeja bua kudisangishabu mu ekleziya wende. Bu muvua Lin ne mukajende bikale benda mushinga wa dipana mashi a ngulube ne a mpatu mu tshisalu tshia muaba au, bakapangadija bua kukonka mmuenenu wa mfumu wa ekleziya pa bualu ebu. Wakabandamuna se: “Tshintu tshionso tshidi Nzambi muenze tshidi mua kuambuluisha bu tshiakudia tshia muntu.” Bantemu, ku luabu luseke, bakabakankamija bua kukonkonona tshidi Dîyi dia Nzambi ne bua kuamba. Bakalonga se: Yehowa Nzambi udi wangata mashi bu a tshijila, bualu “muoyo wa tshintu tshionso tshidi ne mubidi udi mu mashi.” (Bena Levi 17:10, 11, MMM) Pa nanku bena nkristo balelela badi ne bua “kubenga . . . mashi.” (Malu Menza 15:20, MMM) Bu tshipeta tshia dikonkonona Mifundu pa bualu ebu, dîku dia Lin diakangata dipangadika dia kuimanyika dipana dia mashi, nansha muvuadi dibapetesha makuta a bungi. Kadi, katupa kîpi patupu, bakapeta diteta dikuabu dipite bunene.

Kumpala kua kulonga bulelela, dîku dia Lin dikavua dikune mitshi 1 300 ya misa ya betel mu lupangu luabu. Nansha muvuabi mua kulomba bidimu bitanu bua mitshi eyi kubangayi kukuama, diakamue pavuayi inyekama ne misa, dîku dia Lin divua mua kutekemena bua kupeta dolare 77 000 ku tshidimu tshionso. Bu muvua tshikondo tshia dinowa dia kumpala tshisemena pabuipi, dîku dia Lin divua ne bua kuangata dipangadika dia mushinga. Bakavua bamanye ku dilonga diabu dia Bible ne: bena nkristo badi ne bua kudilengeja “ku manyanu onso a mubidi ne a mu nyuma” pa kubenga dikankamija, anyi ditumika ne bilele bipange bukezuke bu mudi dinua makanya, dikuatshika bintu bia lulengu, ne ditshiankunya dia misa ya betel. (2 Kolinto 7:1) Ntshinyi tshivuabu mua kuenza?

Muenzeja kudi kuondo ka muoyo kalubakane, muena-muabu Lin wakapangadija bua kulekela dilonga diende dia Bible. Mu dindila, inabanza Lin wakapana misa ya betel ya ku imue ya ku mitshi yabu ya kale ne wakapeta dolare mipite pa 3 000. Aka kavua patupu ka-diosha ka tshivua mua kuenzeka mu katupa kîpi bu buobu balame mitshi yabu. Kadi kuondo ka muoyo ka muena-muabu Lin kakatungunuka ne kumulubakaja bikole.

Wakaluangana ne tshilumbu etshi too ne pakafikaye dimue edi ku dilomba Bantemu ba muaba au bua kumukoselabu mitshi yende ya betel. Bantemu bakumvuija ne: adi divua dipangadika diende divuaye ne bua kuangata; pa nanku, uvua ne bua ‘kudiambuila bujitu buende’ ne kudikosela mitshi yende nkayende. (Galatia 6:4, 5) Bakamukankamija bua kuvuluka dilaya dia mu 1 Kolinto 10:13, didi diamba ne: ‘Kakuena diteta diakanukuata didi kadiyi dikuata muntu yonso; kadi Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’ Bantemu bakelangana nende kabidi meji, bamba ne: “Bu tuetu mua kukukosela mitshi yebe, udi mua kulua kunyingalala ne kutudiula bua dijimija.” Mutantshi kaunengi, mu dinda dikuabu inabanza Lin wakabika ku tulu bua mutoyi wa nsele (scie) wa mabaya. Bayende ne bana bende bavua munkatshi mua dikosa mitshi ya betel!

Muena-muabu Lin wakamona se: Yehowa udi ukumbaja dilaya Diende. Wakapeta mudimu wakamushiya ne kuondo ka muoyo kakezuke, umupesha mushindu wa kulua musamunyi wa Yehowa. Bakamutambuisha mu mpuilu wa tshijengu wa Bantemu ba Yehowa mu Tshisanga 1996.

Eyowa, bushuwa muena-muabu Lin ‘wakapana bintu biende bionso’ ne kusumba “dibue dia mushinga mutambe bukole.” Mpindieu udi ne diakalenga kadiyi kuamba dia kuikala ne malanda a nsungasunga ne Yehowa Nzambi ne dia kusadila bua bipatshila bia Bukalenge Buende.