Bakashala bashindame mu dikengeshangana dia bena Nazi

MUOYO-MUTOKE kauyi buôwa wa Bantemu ba Yehowa mu Allemagne wa bena Nazi mmushilangane bikole ne mmuenenu uvua nende ekleziya ya Bukua-buena-nkristo. Bualu ebu mbumona kudi profesere wa malu a kale John Weiss mu mukanda wende wa Ideology of Death (Ngenyi mikulu ya lufu). Udi ufunda ne:

“Mu 1934 ekleziya Evanjelike wakamba ne disuminyina dionso ne: bavua ne bua ‘kuakidila bimpe bena Nazi kudi bena Luther,’ ne wakela ‘Mfumu Nzambi’ tuasakidila bua muvuaye mupeshe bena Allemagne ‘mfumu munene munemeki wa Nzambi ne wa kueyemena.’ . . . Muepiskopo kampanda muena Mishonyi wakafundila bena diende se: ‘[Hitler] mmututumina kudi Nzambi.’” Weiss udi utungunuka ne: “Ekleziya Metodiste wa bena Allemagne . . . wakumvuangana ne Muepiskopo Dibelius bua se: Hitler uvua mupandishe Allemagne ku dishintulula dia malu dia ba-Bolshevik dikavua pabuipi, pa kufila ditalala ne dishindama . . . Ekleziya wa ba-Mormon wakabela bena kuitabuja bende ne: kutuila Hitler nkanana kuvua kushipa kua mukenji wa ba-Mormon.” Ne udi usakidila ne: “Bavua bambile bena Katolike ne: ditumikila mbulamatadi eu mupiamupia divua bualu bulomba bua tshijila, bualu bulomba abu kabuakumbuka nansha panyima pa bamfumu ba tshitendelelu bamane kumanya malu manene a buôwa menza ku Est.”

Kadi netuambe tshinyi bua Bantemu ba Yehowa? Profesere Weiss udi uleja ne: “bu tshisumbu, anu Bantemu ba Yehowa ke bakakandamena bena Nazi.” Bakakuata bantu binunu bivule ba kudibu, ke mudi Profesere Weiss utungunuka, “pabi Ntemu yonso mutuma mu kamponya ka disubishangana bavua mua kumulekela pa kutua tshiala patupu pa mukanda bua kubenga ditabuja diende.”

Bua muoyo-mutoke wa Bantemu ba Yehowa, Profesere Weiss udi wela nseka ne: “Tshilejilu tshiabu tshidi tshileja bukokeshi bua pa buabu bushindame ne bua bukitu buvua nabu Buena-nkristo bua kumpala diambedi dilua diabu bu ndongoluelu mujadika ne dibuelakana diabu mu malu a nsangilu wa bantu kabiyi bianji kutshimuna dijinga dia kuikala ne nsombelu udi kayi wa ditupa ku mikenji. Bu muakafunda mpasata mukuabu muena Mishonyi bua bualu buabu, ‘Ki ng’ekleziya minene nansha, kadi mbantu aba bavuabu bashiminyina malu ne baseka ke bavua ba kumpala bua kukandamena luonji lua demon wa bena Nazi, ne bakimina kutua nkanana bilondeshile ditabuja diabu.’”