Udi muvuluke anyi?

Udiku mumone nimero ya ndekelu ya Tshibumba tshia Nsentedi mikale ne dikuatshisha kuudi anyi? Nunku bua tshinyi kubenga kuteta tshivulukidi tshiebe ne nkonko idi ilonda eyi?

◻ Armagedone neikale mushindu kayi? (Buakabuluibua 16:14, 16)

Kakuikala mvita ya nikleere anyi tshipupu kampanda tshikebesha kudi bantu nansha. Tòo, neikale mvita ya Nzambi bua kujikija mvita yonso ya bantu, ne kubutula butubutu aba bonso badi basonsola mvita ya nunku, ne kutuala ditalala dia bushuwa bua aba badi banange ditalala. Kakujanguluka nansha. (Habakuka 2:3)​—15/4, dibeji dia 17.

◻ Ntshibilu tshia dibaka tshia mushindu kayi tshidi tshipesha Yehowa lumu?

Tshibilu tshia dibaka tshidi ne malu a mu nyuma mazangika kupita njila ya mu bulongolodi ebu bushuwa netshipeshe Yehowa lumu. Bena nkristo nebasankidile tshikondo etshi biadilamabu ku bilele binyanguke bia mu bulongolodi ebu, bitabataba biabu, ne dinekesha mu ngenzelu; biabengabu kulekela tshibilu etshi tshipangisha midimu ya teokrasi ya pa tshibidilu; ne bialejabu budipope pamutu pa lutambishi bua biuma.​—15/4, dibeji dia 26.

◻ Ntshinyi tshidi tshisunguluja muntu wa muoyo-mutoke?

Muntu wa muoyo-mutoke udi mua kueyemenyibua, ki ng’anu kudi bantu nende kadi, bia mushinga mukole, kudi Nzambi. Bukezuke bua mutshima bua muntu wa nunku budi bumuenekela mu bienzedi biende. Kêna ne lubombo. Kêna ne njila mikonyangale anyi minyanguke. (2 Kolinto 4:2)​—1/5, dibeji 6.

◻ Bua tshinyi Yelemiya wakamba ne: “Bidi bimpe bua muntu wa mukitshi ambule tshikokedi mu tshikondo tshia bunsonga buende.” (Muadi 3:27, NW)

Kulonga mua kupita ne matetshibua patshidi muntu nsonga kudi kuambuluisha pa kulongolola muntu eu bua kuakamaye ntatu ya ku bukulumpe. (2 Timote 3:12) Masanka a lulamatu mmapite kule ne kule disulakana kayi dionso dia tshitupa tshîpi didi ditupa ku mikenji mua kutuala.​—1/5, dibeji dia 32.

◻ Dimueneka dia Mozese ne Eliya mu tshikena-kumona tshia dikudimuka mpala divua mundidimbi wa tshinyi?

Mu mvese idibu bakula bua dikudimuka mpala, Mozese ne Eliya bavua bimfuanyi biakanyine bia bana babu ne Yezu bela manyi. Muanda wa se: “bakamueneka mu butumbi” pamue ne Yezu uvua tshimfuanyi tshia bena nkristo bela manyi ba lulamatu bavua ne bua ‘kutumbishibua pamue’ ne Yezu mu ndongoluelu wa Bukalenge bua mu diulu. (Luka 9:30, 31; Lomo 8:17, NW; 2 Tesalonike 1:10)​—15/5, mabeji 12, 14.

◻ “Bualu busokoka bua tshijila” bua Nzambi ntshinyi? (1 Kolinto 2:7, NW)

“Bualu busokoka bua tshijila” bua Nzambi mbushindamene pa Yezu Kristo. (Efeso 1:9, 10, NW) Kadi, ki ndisunguluja patupu dia Yezu bu Masiya mulaya. Budi butangila mbulamatadi wa mu diulu, Bukalenge bua Nzambi bulombola kudi Masiya, ne bukonga mudimu udibu bapeshe Yezu bua kukumbaja mu dilongolola dia Nzambi.​—1/6, dibeji dia 13.

◻ Mmunyi mudi muena nkristo ne bua kumona bukulakaje anyi disama?

Pamutu pa kumona mateta a nunku bu adi ateka mikalu mu mudimu wende mukuatshila Yehowa, udi ne bua kuatangila bu tshikondo tshia kudiundisha dieyemena diende kudiye. Udi kabidi ne bua kuvuluka ne: mushinga wa muena nkristo utu upimibua, ki ng’anu ku bungi bua bidiye wenza mu mudimu, kadi ku ditabuja diende ne buondoke bua dinanga. (Mâko 12:41-44)​—1/6, dibeji dia 26.

◻ Mmunyi muvua ditumika dia Yehowa ne bantu bua kufunda Bible pamutu pa banjelu dileje meji ende malabale?

Bu kakuyi menemene dikuata mudimu ne bantu, tuvua mua kupeta lutatu bua kujingulula mukenji wa Bible. Kabidi, Bible udi ne luya, malu kabukabu, ne milowo bidi dikuata mudimu ne bantu dimupesha.​—15/6, dibeji dia 8.

◻ Ntshinyi tshidi nsapi wa disanka mu dîku?

Nsapi wa disanka mu dîku udi mu Dîyi dia Nzambi, Bible, ne mu ditumikila mêyi-maludiki ende, bu mudi didikanda, dianyisha bumfumu, diyukidilangana dimpe, ne dinanga.​—15/6, mabeji 23, 24.

◻ Mmunyi muvua luondapu luenza kudi Yezu lushilangane bikole ne tshidibu benza pa tshibidilu lelu’eu kudi aba badi badiamba mudibu ne makole a luondapu?

Kakuvua dipampakana dikole dileja kudi misumba ne ku luseke lua Yezu kakuvua disumpakana dipite nansha. Kabidi, Yezu kavuaku muanji kupangila bua kuondapa balema, udingila ku se: difila diabu dia mfranga kadivua menemene dia kalolo anyi se: kabavua ne ditabuja.​—1/7, dibeji 5.

◻ Mmunyi mudi Yehowa muambuluishe bantu bende bua kuikalabu ne muaba mu dilongolola diende ditambe buimpe didi ditangila dîna diende ne Bukalenge buende?

Tshia kumpala, Yehowa mmupeshe bantu bende bulelela. Tshibidi, mmubapeshe spiritu wende munsantu. Ne tshisatu, tudi ne buena-muntu buetu bua buloba bujima ne ndongoluelu wa Yehowa wa bulongolodi bua ntendelelu.​—1/7, mabeji 19, 20.

◻ Buimpe ntshinyi?

Buimpe budi nsombelu wa tshitembu, kalolo, ngelelu wa meji ne bienzedi biakane. Ki nngikadilu wa bukata, kadi ng’eu udi utumika ne musansamuke. Buimpe budi bumvuija bivule kupita diepuka mpekatu patupu; budi bumvuija dipatshila tshidi tshimpe. (1 Timote 6:11)​—15/7, dibeji dia 14.

◻ Mbumpianyi kayi bua mushinga mukole budi baledi mua kushila bana babu?

Bumpianyi bua mushinga mukole ntshilejilu tshiabu buobu bine tshia dileja bakuabu dinanga. Mu mushindu wa pa buawu, bana badi bajinga bua kumona ne kumvua baledi babu bajikula ne baleja dinanga dilelela dia Nzambi mu tshintu tshionso tshidibu benza.​—15/7, dibeji dia 21.

◻ Ng’amue malu kayi a mushinga adi akengedibua bua dilonga dia mu dîku didi dipatula bipeta?

Dilonga dia mu dîku didi ne bua kuikala dia pa tshibidilu. Nudi ne bua ‘kudisumbila tshikondo’ bua dilonga edi. (Efeso 5:15-17) Vuijayi bikondo bia dilonga bia musangelu bua bana pa kuenza bua Bible atumike. Bua bana kusankidilabu dilonga, badi ne bua kudiumvua babuejamu.​—1/8, mabeji 26, 28.