Mushindu wa kulama disanka mu mudimu wa ku dîba ne ku dîba

DIKUMBANA dia milayi ya mu Bible didi dileja patoke ne: tudi mu matuku a ku nshikidilu wa ndongoluelu eu mupetudi wa Nzambi. Bikale ne bualu ebu mu lungenyi, basadidi ba Yehowa Nzambi ne meji onso badi bapitshisha dîba divule ditambe didibu bapeta mu ditangalaja lumu luimpe lua Bukalenge buende. Bantemu ba Yehowa bapite pa 600 000 mbalongolole nsombelu yabu bua kumona mua kudifila mu mudimu wa ku dîba ne ku dîba. Bamue ba kudibu mbamanyishi ba Bukalenge ba ku dîba ne ku dîba badibu babikila ne: bampanda-njila. Bakuabu mbena budisuile ba ku Betele ku bilombuelu bia Société Watch Tower anyi ku biro bia filiale yende. Kabidi bakuabu mba-misionere ne batangidi bena ngendu.

Bible udi uleja ne: mu matuku a ku nshikidilu, “bikondo bikole mua kupita nabi” bivua ne bua kuikalaku. (2 Timote 3:1-5, NW) Mvese wa mu Bible wa tshiena-Greke udi utumika ne tshiambilu kampanda tshitudi mua kuandamuna ne: “bikondo bijadika bia tshikisu.” Pa nanku, muntu nansha umue kêna ne bua kutekemena nsombelu udi kayi wa ntatu mu matuku etu aa. Bua bamue ba-ministre bena nkristo, ntatu idi mua kumueneka mikole menemene mu mushindu wa se: badi mua kufika ku didiebeja ne: ‘Ndi mua kutungunuka mu mudimu wa ku dîba ne ku dîba anyi, peshi ndi ne bua kuimanyika?’

Mmalu kayi adi mua kusaka muntu kampanda bua kutangilula nsombelu wende bu mpanda-njila, muena budisuile wa ku Betele, mutangidi muena ngendu anyi misionere? Bidi mua kuikala disama dikole. Pamu’apa mulela kampanda ukadi mukulakaje anyi mulema udi ujinga dimutabalela dia ku musangu ne ku musangu. Bidi mua kuikala ne: bena dibaka baselangane mbasue kupeta muana. Eu yonso udi wimanyika mudimu wa ku dîba ne ku dîba bua tubingila bu etu ne bua malu-malomba a mu Mifundu, kêna ne bua kumvua bundu bua kuangata dipangadika diakajilula bu edi ne kulekela mudimu wa ku dîba ne ku dîba.

Kadi netuambe tshinyi bikala muntu udi ulongolola bua kuimanyika mudimu wa ku dîba ne ku dîba bua dipangila dia disanka? Pamu’apa mpanda-njila kampanda udi umona disankidila dikese mu mudimu wende ne udi udiebeja ne: ‘Bua tshinyi kutungunuka ne nsombelu wanyi wa didifila padi bantu bakese menemene bateleja?’ Pamu’apa muena budisuile wa ku Betele kêna menemene ne disanka bua mudimu wende mumupesha. Anyi bidi mua kuikala ne: bubedi bua ku mubidi budi butatshisha, nansha kabuyi bupangisha mudimu wa bumpanda-njila, ndekelu wa bionso budi bubafula disanka divua muntu nadi. Mmunyi mudi bantu ba nunku mua kulama disanka diabu? Tuanjibi kukonkonona tshidi bamue ba-ministre bapiluke bamba.

Tutantamene diteketa ku muoyo

Anny, mufumine ku Suisse, wakabuela mu Tshilongelu tshia Bible tshia Watchtower tshia Gilada mu 1950. Uvua mutekemene bua kumutumabu bu misionere muaba mukuabu pa kumbusha ku Mputu. Pakamutumabu tshiakabidi mu mudimu wa ku Betele ku Mputu, Anny wakateketa ku muoyo. Nansha nanku, wakitaba mudimu wende mumupesha mu Tshibambalu tshia Dikudimuna ne utshidi wenza mudimu au. Mmunyi muakatshimunaye diteketa ku muoyo diende? Anny udi umvuija ne: “Kuvua ne kudi mudimu wa bungi wa kuenza. Nyanji yanyi ne malu andi musue kabiena ne mushinga bu wa mudimu.”

Bituateketa ku muoyo bua mudimu wetu mutupesha, tudi mua kuleja pamu’apa mmuenenu wa Anny. Malu etu atudi basue kaena ne mushinga wa kumpala nansha. Tshidi ne bualu menemene ntshia se: midimu yonso kabukabu misuikakaja ku ditangalaja dia mukenji wa Bukalenge yenzeke bimpe. Nsumuinu 14:23 (MMM) udi utuambila ne: “mudimu wonso udi ne diawo difutu.” Kakuyi ditangila mudimu udibu batupeshe, kuwenza ne lulamatu luonso kudi kuambuluisha bua kukumbaja mudimu wa Bukalenge. Ne kudi mua kuikala disankishibua dinene​—eyowa, disanka—​mu mudimu bu eu mufila kudi Nzambi.​—Fuanyikija ne 1 Kolinto 12:18, 27, 28.

Tumvuangane ne bakuabu

Mudimu wa ku dîba ne ku dîba udi ulomba dipetangana bikole ne bantu ba mishindu yonso​—mu mudimu wa budimi, ku Betele, mu nzubu wa ba-misionere, anyi mu dikumbula bisumbu bu mutangidi muena ngendu. Pa nanku, mu bualabale kampanda disanka ndisuikakaja ku diumvuangana bimpe ne bakuabu. Kadi, ‘bikondo bia tshikisu’ bidianjila kumanyisha bua matuku aa a ku nshikidilu bidi binyanga bikole malanda a bantu. Mmunyi mudi ministre kampanda mua kuepuka dijimija dia disanka diende, nansha biamubungamija muntu mukuabu? Pamu’apa tudi mua kulongela tshintu kansanga kudi Wilhelm.

Wilhelm wakalua muena dîku dia Betele kampanda wa ku Mputu mu 1947. Panyima, uvua mu mudimu wa bumpanda-njila ne kabidi bu mutangidi muena ngendu. Wilhelm udi umvuija ne: “Pandi meme ne mukajanyi tumona malu atudi tuela meji ne: kaena mimpe anyi adi atubungamija pa nkayetu, tudi tuambila Yehowa mutudi tumvua ne pashishe tumushila malu au bua kuajikijaye.”​—Musambu 37:5.

Pamu’apa wewe nkayebe uvua mubungamija kudi ngikadilu wa muena nkristo nebe uvua muakule nebe mu mushindu mubule kanemu anyi meji. Vuluka ne: buonso buetu tutu tulenduka misangu ya bungi mu ngakuilu wetu. (Yakobo 3:2) Nenku bua tshinyi kubenga kutumika ne nsombelu eu bua kusemena bikole pabuipi ne eu ‘Udi umvua milombu’? (Musambu 65:2) Ambila Yehowa tshilumbu atshi, ne pashishe umushiletshi mu bianza biende. Biasua Nzambi kuenza mashintuluka, neenze nanku. Bidi bikengela bua aba badi basombele mu nzubu wa ba-misionere kulamabu bualu ebu mu lungenyi bikalabu ne ntatu ya muomumue, ne ebi nebibambuluishe bua kulama disanka diabu mu mudimu wa Yehowa.

Padiku butekete bua mubidi

Bantu bakese ke badi misangu ya bungi ne makanda mimpe a mubidi. Nansha aba badibu bamba ne: badi mu nsombelu muimpe badi mua kupeta tunyinganyinga anyi disama. Disama ditu dienzeja bamue bua kulekelabu mudimu wa ku dîba ne ku dîba, kadi pashishe batu benza mudimu mulenga bu bamanyishi ba Bukalenge. Kadi bakuabu batu ne bukole bua kutungunuka ne mudimu wa ku dîba ne ku dîba nansha mubidi muikala ne butekete. Tshilejilu, tangila bualu bua Hartmut ne Gislind.

Hartmut ne Gislind mbena dibaka badi benze bidimu 30 bu bampanda-njila, ba-misionere, ne mu mudimu wa butangidi buena ngendu. Bonso babidi mbapete mikumu ya masama makole adi mabashiye imue misangu bazengele mu mubidi ne mu mpampakenu. Nansha nanku, mbenze mudimu mulenga ne badi ne mushindu wa kukankamija bakuabu badi ne ntatu ya muomumue. Mmibelu kayi idibu bafila? “Tangila ku matuku atshilualua ne kutangidi panyima. Enza tshidi tshitambe buimpe mu nsombelu yonso. Dituku dionso didi ne bua kutupesha mpunga kampanda bua kusamuna Yehowa. Tumika ne mpunga au, ne umusankidile.”

Tangila muanda wa Hannelore. Mmubungamija kudi ditua-dipinga dia disama munkatshi mua bidimu biende 30 bu mpanda-njila, misionere, mu mudimu wa butangidi buena ngendu ne bayende, ne wa ku Betele. Hannelore udi wamba ne: “Ndi nshindamena pa milandu mijula kudi Satana​—ya se: bantu badi basadila Yehowa anu padi dienza nenku dikale dibapepelele. Mu ditantamena mateta, ndi mua kuikala ne tshianyi tshitupa mu dijadika ne: Satana ki mmubinge.” Etshi mbukole budi busonsola. Vuluka ne: bulamatshi buebe nkayebe kudi Yehowa paudi mu mateta budi ne mushinga kudiye.​—Yobo 1:8-12; Nsumuinu 27:11.

Paudi ukeba mua kuangata dipangadika dia nkatshinkatshi bua bidi bitangila makanda ebe a mubidi, tangila bimanyinu bibidi bia mulayi wa Yezu Kristo udi wamba bua nkomenu wa ndongoluelu eu wa malu. Yezu wakadianjila kumanyisha bua bipupu bia masama ku muaba ne ku mukuabu. Wakamba kabidi ne: “Lumu luimpe elu lua bukalenge neluyishibue pa buloba buonso buasa.” (Matayo 24:3, 14, NW; Luka 21:11) Yezu uvua mumanye se: mu matuku a ku nshikidilu, balondi bende bavua ne bua kuluangana ne masama. Kadi wakajingulula ne: bavua mua kukumbaja mudimu wa diyisha ki ng’anu kudi bantu badi ne makanda mimpe a mubidi, kadi kabidi kudi bantu badi ne masama makole. Bituikala ne mushindu wa kutungunuka ne mudimu wa ku dîba ne ku dîba nansha padi mubidi usama, Yehowa kakupua muoyo dinanga ditudi tuleja bua dîna diende nansha.​—Ebelu 6:10.

Tulame disanka nansha bantu buobu ne kalèngù

Mmuenenu wetu udi mua kuikala muenzeja kudi mushindu udi bantu bandamuna ku mudimu wa diyisha Bukalenge. Ministre mukuabu mupiluke wakamba ne: “Nansha bampanda-njila badi bamona bikole bua kutuadija diyuki ne muena nzubu. Buonso buetu tudi ne bua kuluangana bua kulama disanka dietu.” Eyowa, kalèngù ka bantu kadi mua kukepesha disanka dietu mu mudimu wa budimi. Nenku mmunyi mudi mpanda-njila udi utuilangana pa tshibidilu ne kalèngù mua kulama disanka diende? Ba-ministre bapiluke badi bafila ngenyi idi ilonda eyi yakatumikabu nayi.

Kalèngù kadi kaleja tshipumbishi, kadi kakena kasua kumvuija ne: mbatutshimune. Kalèngù katangalake kuoku nkayaku ki nkabingila ka kulekela mudimu wa ku dîba ne ku dîba to. Tudi mua kulama disanka dietu kumpala kua kalèngù bituadilamina tshikondo tshiakanyine bua kuenza dilonga dia tshisumi dia Mifundu. Idi ‘itulongolola bua midimu yonso mimpe,’ ne abi bidi biumvuija kuyukila ne aba badi bajibika matshi abu ku lumu luimpe. (2 Timote 3:16, 17) Nansha muvua bantu kabayi basue kuteleja muprofete Yelemiya, abi kabiakamuimanyika to. (Yelemiya 7:27) Patudi tulonga Bible ku diambuluisha dia mikanda ya bena nkristo, tudi mua kupeta dikuatshisha dinene bituatabalela ngenyi idi ikolesha ditabuja dietu ne ituambuluisha bua kumanya mua kupita ne kalèngù.

Bajadike ne: kalèngù ntshipumbishi, tukonkononayi mmuenenu wetu kudi aba batudi tuyisha. Bua tshinyi badi balengulula? Tshilejilu, kamue kabingila ka kalèngù kadi katangalake ku Mputu, mmuyuki udi ubungamija wa bitendelelu bia dishima. Bantu kabatshiena bamona muaba wa bitendelelu mu nsombelu yabu, ki mbasue mene bualu nansha bumue budi bubitangila. Tudi ne bua kuikala bapepele, tuyukila ne bantu pa malu adi abatonda, bu mudi bulofua, makanda a mubidi, bibawu, dibenga kumvuangana, nyunguluilu, ne mvita.

Mu mêyi etu a ntuadijilu kudi muena nzubu, tudi mua kuleja malu adi akoka ntema ya bantu ba muaba au. Ke tshivua Dietmar uteta mua kuenza pavuaye uyisha mu musoko kampanda muvua disankidila dikese. Muntu mukuabu wa mu musoko au wakaleja ne: mu musoko muvua muenzeke bualu kampanda bua buôwa dituku dimue kumpala. Pashishe, ku tshiibi tshionso Dietmar wakaleja kanyinganyinga ne muoyo mujima bua bualu abu bua buôwa. Wakamba ne: “Diakamue bantu kubangabu kuyukila. Bualu abu bua buôwa buvua mu lungenyi lua muntu yonso. Dituku adi ngakayukila bikole ne bantu bualu ngakatabalela nsombelu yabu.”

Bidi bitukengela kufila bumanyishi bua Bukalenge kudi bantu muaba wonso utudi tubasangana. Bumanyishi bua ku mpukapuka budi mua kupatula bipeta bimpe, ne tudi mua kudibidija mu mudimu eu pa kutumika ne ngenyi-mifila mileja mu mikanda idi mishindamene pa Bible. Disanka didi mua kufumina ku mêyi makese a bulunda anyi ku dishila mutuyukidishi kopi ya bibejibeji bia Tshibumba tshia Nsentedi ne Réveillez-vous! Bituikala benze makumbulula ne batuadije kulombola dilonga dia Bible ne muntu kampanda udi usankidila bulelela, tudi mua kupeta disangu dia kuapukila pa kuamba ne: “Udiku mumanye muntu mukuabu udi ujinga kulonga Bible anyi?” Ebi bidi mua kufikisha ku dipeta dilonga dikuabu dia Bible. Mu mishindu yonso, tuikalayi ne lungenyi luimpe, tueyemene Yehowa ne muoyo mujima, katulekedi kalèngù katutekesha mu mikolo.

Dikankamija didi difumina kudi bakuabu

Jürgen ne Christiane mbenze bumpanda-njila ne mbadifile mu mudimu wa butangidi buena ngendu munkatshi mua bidimu bipite pa 30. Musangu mukuabu bakapeta mudimu uvua utangila diyisha mu tshitupa tshivua bantu bikale balengulula ne bena tshitshiu kabidi. Jürgen ne mukajende bakajinga bikole bua kupeta amue makankamija! Kadi bua tubingila kampanda, mu tshisumbu bakuabu kabakatabalela majinga abu nansha.

Nenku Jürgen mmumanyine ku malu mamona se: “bamue bampanda-njila batu mu nsombelu mukole. Badi bakengela dikankamija divule dia kudi bakulu ne kudi bamanyishi bakuabu.” Nzambi wakambila Mozese bua kukankamija ne kukolesha Yoshua. (Dutelonome 3:26-28) Ne bena nkristo badi ne bua kuikala mpokolo wa dikankamijangana. (Lomo 1:11, 12) Bamanyishi ba Bukalenge badi mua kukankamija aba badi mu mudimu wa ku dîba ne ku dîba ku diambuluisha dia mêyi adi ibaka ne pa kubafila mu mudimu ku musangu ne ku mukuabu.

Disanka dia Yehowa​—Lumbu luetu

Bena nkristo badi bapitshishe tshitupa tshinene tshia matuku abu a muoyo bu bampanda-njila anyi ba-misionere, basadila ku Betele, anyi bakumbula bisumbu mu mudimu wa butangidi buena ngendu mbasokolole ne: ntatu mivule itu ya tshitupa tshîpi, kadi imue itu ya munanunanu. Nansha ntatu mikese idi kayiyi imueneka bu idi ijimina kayena ne bua kutubafula disanka dietu nansha. Ramon, eu udi musadile ku babende munda mua bidimu bipite pa 45, udi ufila lungenyi elu: dîba dionso didi ntatu itubungamija, “tudi ne bua kuela meji ku mabenesha mavule atudi nawu ne ku binunu bia bakuabu badi ne ntatu mipite bunene.” Bushuwa, bena kuitabuja netu badi bapeta makenga mu buloba bujima, ne bushuwa Yehowa udi ututabalela buonso buetu.​—1 Petelo 5:6-9.

Bua nenku, bikala nsombelu yetu nkayetu ikumbana bua tuetu kuenza mudimu wa ku dîba ne ku dîba ne kushalamu, tulamayi disanka dietu pa kueyemena Tatuetu wa mu diulu. Udi ukolesha basadidi bende, ne buonso buetu tudi ne bua kuvuluka ne: ‘disanka dia Yehowa [“ndumbu,” NW] luetu.’​—Nehemiya 8:10.

[Tshimfuanyi mu dibeji 21]

“Nyanji yanyi ne malu andi musue kabiena ne mushinga bu wa mudimu”

[Tshimfuanyi mu dibeji 22]

“Tudi tuambila Yehowa mutudi tumvua ne pashishe tumushila malu au”

[Bimfuanyi mu dibeji 23]

“Enza tshidi tshitambe buimpe mu nsombelu yonso. Dituku dionso didi ne bua kutupesha mpunga kampanda bua kusamuna Yehowa”

[Tshimfuanyi mu dibeji 23]

“Mu ditantamena mateta, ndi mua kuikala ne tshianyi tshitupa mu dijadika ne: Satana ki mmubinge”

[Bimfuanyi mu dibeji 24]

“Bamue bampanda-njila batu mu nsombelu mukole. Badi bakengela dikankamija divule dia kudi bakulu ne kudi bamanyishi bakuabu”

[Tshimfuanyi mu dibeji 24]

“Tudi ne bua kuela meji ku mabenesha mavule atudi nawu”