Mmalaya a nganyi audi mua kueyemena?

MU 1893 kasumbu ka bantu 74 bapiluke mu malu a nsombelu kakasangila mu Fware wa Buloba bujima mu Chicago bua kuyukila pa matuku atshilualua. (Muaba au mmuleja kuulu eku.) Bidimu 100 kumpala kua 1993, bakadianjila kuamba malu avua mua kulua bu mudi aa: “Bantu ba bungi nebikale ne bidimu 150 bia muoyo.” “Maloko neakepele, ne dishipa dibaka nedilue kaditshiyi ne dikuatshisha.” “Bulongolodi bua ditunga nebuikale butambe kupepela, bu muikala bunene bulelela bua ditunga butangile misangu yonso ku dipepela.”

Bia muomumue, mu 1967 mukanda kampanda (The Year 2000) wakadianjila kuamba ne: “Pabuipi ne tshidimu tshia 2000, ordinatere idi pamu’apa mua kufuana, kuidikija, anyi kupita amue makokeshi mavule a lungenyi ‘adi bu a muntu,’ kukonga pamu’apa ne imue ya ku nzanzu yende ya dilengeja bintu ne dibifumba.” “Lungenyi lua biamu bia robot bia mushinga mutshintshikila bidi bienza mivule ya ku midimu ya mu nzubu . . . ludi lumueneka lutambe kuakanyina pabuipi ne tshidimu tshia 2000.”

Dipangila dia bantu bua kudianjila kumona malu enzeka mu matuku atshilualua ndishilangane bikole ne bukokeshi bua Nzambi. Tshilejilu, fuanyikija malu madianjila kuamba atuatedi aa, ne tshikavua Bible mumane kuamba kukadi kupite siekele bu 20 pa bidi bitangila matuku etu aa: ‘Bantu nebikale badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena bunsonge, kabayi mua kudikanda, bena luonji, kabayi basue malu mimpe, nebikale batungidianganyi, bena lukuluku, bûjibue ne diambu, banangi ba masanka, kabayi banangi ba Nzambi; nebikale ne tshimuenekelu tshia buimpe bua Nzambi, kadi bamane kudiula bukole buabu.’​—2 Timote 3:1-5.

Mulayi eu wa mu Bible udi utangila “matuku a ku nshikidilu” udi anu umue wa ku milayi mivule idi mikumbane mu matuku etu aa. Dîyi dia Nzambi diakadianjila kuamba ne: “tshimanyinu” tshia dikalaku dia Yezu tshivua ne bua kukonga mvita ya buloba bujima, dipangika dia biakudia, bipupu, bikumina, ne diyisha dia lumu luimpe lua Bukalenge bua Nzambi pa buloba bujima.​—Matayo 24:3-14; Luka 21:11.

Bujalame bua malaya a Nzambi budi kabuyi mua kutupakana buakasaka mufundi mukuabu wa Bible bua kuamba siekele mivule kale ne: “Dîyi nansha dimue dia ku mêyi mimpe onso adi Yehowa Nzambi wenu munuambile ki ndipangile. Onso mmalue malelela kunudi. Dîyi nansha dimue dia kudiwu ki ndipangile.”​—Yoshua 23:14, NW.

Eyowa, tudi mua kushindika ne: malaya onso a Nzambi neakumbane mu katupa emu. Bukalenge bua Nzambi nebujikije masama, dibunda bibawu, dinua bintu bia lulengu, nzala, ne mvita​—buloba bujima nebulue mparadizu. (Musambu 37:10, 11, 29; Buakabuluibua 21:3, 4) Udi mua kutekemena dikumbana dia mulayi eu! Ng’wa kudi Mufuki wetu, “udi ka[y]i mua kudinga.”​—Tito 1:2; fuanyikija ne Ebelu 6:13-19.

[Mêyi a dianyisha bua tshimfuanyi mu dibeji 32]

Cleveland State University Archive