‘Bakasumba bulelela’!

“SUMBA bulelela buine ne kubupanyishi.” (Nsumuinu 23:23, NW) Ke muakabela muena meji Solomo. Nansha mutudi mua kuamba nunku bua bulelela mu ka-bujima, bidi nangananga nenku bua bulelela butudi tusangana mu Bible, Dîyi dia Nzambi. Bulelela bua mushindu’eu budi mua kufikisha ku muoyo wa tshiendelele! (Yone 17:3, 17) Kadi, bambisha ne: dipeta bulelela ebu kadiena didiluila patupu. Muntu udi ne bua kuikala ne disua dia ‘kubusumba,’ mmumue ne: kufila anyi kulekela tshintu kampanda bua kumona mua kubupeta. (Fuanyikija ne Matayo 13:45, 46.) Pa tshibidilu, bantu kabatu basue kuenza nanku. Kadi mu matunga a bungi, bantu bavule bena dikima badi benda basumba bulelela bua mu Bible​—misangu mivule ku mushinga mukole bua muntu pa nkayende.

Tshilejilu, tangila Bantemu ba Yehowa mu ditunga dia Ghana, mu Afrike wa ku Ouest. Mu Kabalashipu 1989, kuvua bantu bapite pa 34 000 mu ditunga adi bavua bitabe bulelela bua mu Bible ne bavua bikale babuyisha bakuabu ne tshisumi. Pashishe mbulamatadi wakakandika mudimu wabu wa patoke wa diyisha. Nansha nanku, bantu ba mitshima milulame bakatungunuka ne ‘kusumba bulelela’​—nansha muvuaku bipumbishi bia mbulamatadi. Mikandu eyi yakajika mu dia 31 Kasuamansense 1991, ne bu pankatshi pa 1995, anu bidimu bisatu ne tshitupa kunyima kua diumbusha dia mikandu ayi, bungi bua Bantemu ba Yehowa bazanzamuke mu Ghana buvua bubande bufike ku bantu 46 104! Ne tshidimu etshi bungi ebu mbubande bupite pa bantu 52 800.

Ntshinyi tshidi tshikoke bantu ku bulelela bua mu Dîyi dia Nzambi? Mmalu kayi avua bamue bikale ne bua kulekela bua ‘kusumba bulelela’? Bua kuandamuna, tutangilayi malu mamona kudi bena nkristo basatu ba mu Ghana.

Mukoka kudi malongesha a mu Bible

Tuanji kutangila nsongakaji kampanda wa bidimu bipite pa 20. Tatuende uvua mpasata, kadi wakasungula bua kumbuka mu tshitendelelu tshia tatuende. Bua tshinyi? Mbua dinanga diende dia bulelela.

Wakumvuija musangu mukuabu ne: “Bantemu bavua ne tshibidilu tshia kulua kuetu pavuabu benza makumbula abu a ku nzubu ne ku nzubu. Panyima pa dienza nabu miyuki mikese, ngakajingulula se: malu avuabu balongesha avua mashindamene pa Bible. Ngakajula nkonko pa biena-bualu bu mudi Busatu Bunsantu, kapia ka mu inferno, dibenga kufua dia anyima, ne nangananga pa luondapu lua bishima. Mvua ngitaba ne muoyo mujima se: malongesha au avua a mu Bible. Kadi Bantemu bakangambuluisha bua kumvua ne: kabivua nanku to.”​—Bua kuleja mmuenenu wa Bible pa biena-bualu ebi, suaku utangile Mâko 13:32; Lomo 6:23; Bienzedi 10:40; ne 1 Kolinto 13:8-10.

Nsongakaji eu wakasakidila ne: “Kadi, kuvua buluishi bukole bufumina mu dîku dianyi, nangananga kudi tatu. Wakumvua se: bavua benda bampambuisha. Nansha nanku, mvua mumanye se: malu amvua ndonga kudi Bantemu ba Yehowa avua bulelela. Mvua nteta mua kumanyisha tatu malu aa a mu Bible, kadi uvua ubenga kuteleja. Bushuwa, buluishi buakakola.

“Kadi, ngakakolesha muoyo. Mvua mumanye se: anu dimanya dilelela ke didi difikisha ku muoyo wa tshiendelele mu Mparadizu, ne mvua mupangadije bua kulamata dimanya edi. Pakamanya Bantemu ba muaba au ntatu imvua nayi, ne dinanga dionso bakalua kungambuluisha, kunkankamijabu ne kumpeshabu bimue bintu bia mushinga bimvua nkengela. Ebi biakandeja mushinga wa mêyi a Yezu adi mu Yone 13:35 (NW) a ne: ‘Ku bualu ebu bonso nebamanye ne: nudi bayidi banyi, binuikala ne dinanga munkatshi muenu.’ Dituishibua dianyi dia se: Bantemu ba Yehowa mbalamate tshitendelelu tshilelela diakakola. Pashishe, pakamona baledi banyi se: mvua mulengeje nsombelu wanyi, bakanyisha tshiakamonabu, ne mmuenenu wabu kundi wakashintuluka bikole mu mushindu wa se: tatu wakalomba Bantemu bua kulongabu Bible ne mukuluanyi wa balume!”

Dijadikila nkayebe bulelela

‘Disumba bulelela’ didi kabidi lutatu bua bamue bansonga badi bakolesha kudi baledi Bantemu. Bamue bansonga badi ne nginyikilu wa kubenga kuangata bulelela bua mu Bible ne mushinga. Padibu bapanga kubueja malelela aa munda muabu, ditabuja diabu didi ditangila ku diteketa, dienda dilua dia pa mutu pa mutu. (Fuanyikija ne Matayo 13:20, 21.) Nathaniel, muena Ghana wa bidimu bipite pa 30, udi ulonda ‘muakasumbaye bulelela’ patshivuaye muana.

Udi uvuluka ne: “Baledi banyi bakandongesha Bible biangatshile ku buana. Mu dikola dianyi, mvua nya pamue nabu mu mudimu wa diyisha, kadi tshivua bushuwa muangate dipangadika dia kulua Ntemu. Pashishe, ngakafika ku dijingulula se: mvua ne bua kudikonkonuena malu nkayanyi.

“Tshia kumpala, mvua ne bua kutuishibua se: Bible ke Dîyi dia Nzambi, ki mmukanda mukuabu wa tshijila wa malu a Nzambi nansha. Mu didilongela dianyi, ngakamanya ne: udi mukanda umuepele wa tshijila udi ne milayi mivule mitoke ivua mikumbane mu mushindu mujalame. Ngakamanya kabidi ne: Bible udi ne ndambu wa malelela a malu a sianse​—tshilejilu, bulelela bua se: buloba ‘ki mbukuata kudi tshintu.’ (Yobe 26:7, MMM) Mêyi aa avua mafunda binunu bia bidimu kumpala kua bena sianse kumanyabu malu adi atangila ndongoluelu wa dîba ne mabulunge adi. Anu Nzambi nkayende ke uvua mua kuenzeja bantu ku spiritu bua kufundabu malu a nunku!a

“Pashishe, ngakasua bua kusokolola bulongolodi bua malu a Nzambi budi bulongesha ne butumikila malelela malongesha mu Bible. Bitendelelu bivule bidi bilongesha kapia ka mu inferno, Busatu Bunsantu, ne anyima udi kayi ufua udi upanduka ku lufu. Kadi malongesha aa kaavua ne diumvuija kundi. Mvua ngelangana meji ne: Tatu udi utua tshianza tshia muanende mu luesu lua mâyi asaba bua kumunyoka kêna tatu mubi anyi? Nenku, mmunyi mudi Nzambi wa dinanga mua kuela bana bende mu inferno wa kapia bua kubakengesha? Kadi, Bantemu ba Yehowa badi balongesha mu diumvuangana ne mvese ya mu Bible bu mudi Lomo 6:23, udi wamba ne: ‘Difutu dia bubi ndufu’​—ki ng’inferno kampanda wa kapia nansha. Ebi bivua ne diumvuija kundi.

“Ngakamona kabidi ne: Bantemu ba Yehowa badi balomba bua yonso wa kudibu ikale ne nsombelu mumvuangane ne mêyi-makulu a mu Bible, ne se: badi bipata mu tshisumbu aba bonso badi benza mpekatu kakuyi dinyingalala. Pa kumona bionso ebi, ngakakoma se: Bantemu ba Yehowa badi ne bulelela, ne ngakadiangatshila nkayanyi dipangadika dia kulua umue wabu. Ngakenza madikolela bua kukumbaja malu-malomba bua kutambula bu Ntemu.”​—1 Kolinto 5:11-13.

Bualu ebu bua Nathaniel budi buleja bimpe ne: nansha bansonga bakolesha kudi baledi bena nkristo badi ne bua ‘kusumba bulelela.’ Kabena anu ne bua kubuela mu bisangilu bia tshisumbu patupu. Anu bu bena Bereya ba kale, badi ne bua ‘kukebulula mu Mikanda ya Tshijila bua kumona bionso ne bidi bilelela.’ (Malu Menza 17:11, MMM) Ebi bidi bilomba dîba ne madikolela, kadi bidi mua kufikisha ku ditabuja ne ku dituishibua bikole.​—Fuanyikija ne Efeso 3:17-19.

Kayi musankisha kudi tshitendelelu tshia dishima

Muntu mukuabu muena mu Ghana dîna diende Godwin ukavua ne bidimu bitue ku 70 pakumbukaye mu Ekleziya wa ba-Presbytérien ne mu Kasumbu ka ba-Franc-maçon. Udi wamba ne: “Kuvua malu avua enzeka mu ekleziya amvua ngela mpata. Tshilejilu, kuvua difuilakana dia bungi, ne ditshidi anu ditungunuka. Imue misangu bampulushi bavua ne bua kulua bua kupingajilula ditalala ne bulongame! Tshivua ngela meji ne: ebi bivua biakanyine balondi ba Kristo nansha. Pashishe kuakajuka tshilumbu pankatshi panyi ne muena Presbytérien nanyi. Kabadi ka muaba au kakateleja tshilumbu etshi ne kakapisha muntu mukuabu au. Kadi, ministre wa ekleziya wakatua ku tshia muntu eu mu mushindu kauyi muakane ne wakateta bua kumpisha kumpala kua tshisumbu tshijima! Meme kumuambila avua mangimane pa muoyo ne kupatuka mu ekleziya​—bua kashidi.

“Tshikondo kampanda tshiakapita, ne Bantemu ba Yehowa bakalua kunkumbula kuanyi. Kumpala, ngakateleja patupu bualu tshivua musue kubenga bantu badi bakula malu a Nzambi. Kadi ngakatuadija kubambisha ne: nansha mumvua muena Presbytérien munkatshi mua makumi a bidimu, kuvua malu a bungi a mu Bible amvua tshiyi mumanye. Tshilejilu, tshivuaku mumanye ne: Bible udi ufila ditekemena dia kuikala ne muoyo wa kashidi mu Mparadizu pa buloba.b Ne pangakatuadija kubuela mu bisangilu bia Bantemu ba Yehowa, bikadilu, ne nangananga mvuadilu ne ndengejilu wa mubidi wa bansonga munkatshi muabu biakankemesha bikole bitambe. Aba mbantu bavua bushuwa ne nsombelu mumvuangane ne mêyi-maludiki a mu Bible!”

Kadi, ‘kusumba bulelela’ kuakamulomba bua kuenza amue mashintuluka makole mu nsombelu wende. Godwin udi uvuluka ne: “Mvua muena mu Kasumbu ka ba-Franc-maçon. Ne nansha mudiku kamanyike bu nsangilu wa buena-muntu udi ufila diambuluisha kudi benamu, mvua ndonda mikiya ya ditumika ne tubalubalu ne mifuba kabidi ne dibikila spiritu mibi. Batu bamba mudi spiritu eyi yambuluisha aba badi bakuatshishangana nayi bua kukolabu mu nyuma.

“Malonga anyi akangambuluisha bua kumona se: Yehowa Nzambi udi ubenga dibuelakana dionso ne spiritisme, bualu didi mua kuteka muntu ku buenzeji bua Satana ne makole ende a spiritu mibi.c Mvua mua kutungunuka bu muena mu Kasumbu ka ba-Franc-maçon ne malu aku onso mabuelakane, peshi mvua mua kumbukamu ne kusankisha Yehowa? Ngakasungula bua kusankisha Yehowa. Ngakuosha bintu bionso bia buena-Franc-maçon bimvua nabi, nansha kostime umvua mvuala bua bisangilu bia Kasumbu aka. Ngakadimuena bulelela bua dilaya dia Yezu pakambaye ne: ‘Bulelela nebunupe budishikaminyi’! (Yone 8:32) Mpindieu, ne disanka dionso ndi nyisha bakuabu malu andi mulonge. Tshiena nyingalala bua bualu nansha bumue.”

Bantu binunu bivule ba mitshima milulame mbalekele bia muomumue malu a bungi bua kumona mua ‘kusumba bulelela.’ Anu bu bena nkristo basatu batudi bakule bualu buabu mu tshiena-bualu etshi, kabena ne tunyinganyinga bua mashintuluka akenzabu. Bulelela bua mu Bible mbubapeshe ‘bidi bitekibua bimpe bua matuku alualua, bua buobu balamate muoyo udi muoyo wa bushuwa mene.’ (1 Timote 6:19) Wewe pebe udi mua kupeta bua kashidi ‘muoyo wa bushuwa’ au pamue ne mabenesha onso masuikilaku, ‘biwasumba bulelela.’

[Mêyi adi kuinshi]

[Tshimfuanyi mu dibeji 9]

Nathaniel

[Tshimfuanyi mu dibeji 9]

Godwin