Bulelela budi buandamuna nsombelu

MBIA dibungama kadi mbilelela se: nsombelu ya bantu ba bungi lelu’eu mmikole, ya njiwu mene. Bidiku mua kuenzeka bua bantu ba nunku kupetabu diakalenga anyi? Bamue mbabundi ba bibawu ne badi anu bakengesha bantu nabu. Badiku mua kulua bena bululame mu tshinsanga tshia bantu anyi? Diandamuna dia nkonko eyi yonso didi ne: eyowa. Bantu badi mua kushintuluka. Nsombelu idi mua kuandamuka. Mupostolo Paulo wakaleja mushindu udibi mua kuenzeka pakafundaye ne: “Nuandamuke pa kukudimuna tshieledi tshienu tshia lungenyi, bua numone mua kudijinguluila nkayenu disua dia Nzambi dimpe ne dianyishibue ne dipuangane.”​—Lomo 12:2, NW.

Ditela dia “disua dia Nzambi . . . dipuangane” didi mua kutuvuluija tshivua Yezu muambile bayidi bende bidimu bipite pa 20 kumpala kua Paulo kufundaye mêyi adi kuulu eku. Yezu wakamba ne: “Nenumanye bulelela, bulelela pabu nebunupikule.” (Yowanese 8:32, Mukanda wa Mvidi Mukulu) Mu ditela “bulelela,” Yezu uvua umvuija mamanyisha menzeja ku spiritu wa Nzambi​—nangananga mamanyisha adi atangila disua dia Nzambi—​adi matulamina mu Bible. (Yone 17:17) Bulelela bua mu Bible budi bushuwa bupikula bantu anyi? Kuikala ne nsombelu mumvuangane ne disua dia Nzambi kudi bushuwa kuandamuna nsombelu anyi? Eyowa. Tangila bilejilu bikese ebi.

Dipeta tshipatshila mu nsombelu

Matuku makese adi panshi aa, mu buloba bua Gibraltar, muvua Moisés, muntu uvua ukenga bikole. Udi wamba ne: “Mvua kanuayi ne mvua ndala mu njila. Mvua ndiumvua tshiyi ne ditekemena. Butuku buonso mvua ndomba Nzambi bua amfuile luse ne bua kamfikishi ku dituku dikuabu. Mvua ndila pamvua nkonka Nzambi bua tshinyi mvua muledibue bingikala mvua muntu wa tshianana, tshiyi ku mudimu, tshiyi ne dîku ne tshiyi ne wa kungambuluisha. Bua tshinyi mvua ne bua kutungunuka ne kuikala ne muoyo?” Pashishe, bualu kampanda buakenzeka.

Moisés udi utungunuka ne: “Mvua mumanye se: Nzambi uvua mumvue disambila dianyi pangakapetangana ne Roberto, uvua Ntemu wa Yehowa. Roberto wakampesha Bible umue ne kopi umue wa broshire udi wambuluisha bua kulonga Bible wa Ntshinyi tshidi Nzambi utulomba?a Dituku dionso tuvua tulonga Bible pamue pa tshibasa tshimvua ndala butuku. Panyima pa ngondo umue Roberto wakaya nanyi mu tshisangilu ku Nzubu wa Bukalenge wa Bantemu ba Yehowa mu muaba au. Katupa kîpi, bulelela bua mu Bible buakakudimuna mmuenenu wanyi mujima. Tshitu kabidi ndala pambelu; nansha nnua maluvu anyi makanya. Nsombelu wanyi mmushintuluke, ne ndi ne disanka. Ndi mutekemene bua kutambula mu katupa kîpi emu ne kusadila Yehowa bu Ntemu wende.”

Ndiandamuka kayipu! Padi bantu kabayi ne ditekemena, bitu misangu mivule bua dipanga dia dimanya. Ki mbamanye malu adi atangila Nzambi anyi malongolola ende matambe bulenga. Bua bidi bitangila Moisés, pakapetaye dimanya edi, diakamupesha makanda ne dikima bua kushintulula nsombelu wende. Bua Moisés, disambila edi dia mufundi wa misambu kudi Nzambi diakapeta diandamuna: “Tumaku butoke buebe ne bulelela buebe, bindeje njila, bimfikishe ku mukuna webe wa tshijila too ne mu Tshisombelu tshiebe.”​—Misambo 43:3, MMM.

Mu ditunga dia Belize, Daniel uvua ne malu a muomumue. Daniel kavua ulala pambelu​—uvua ne mudimu wa bunême. Kadi munkatshi mua bidimu 20 wakaluisha tshibidilu tshia dinua bintu bia lulengu ne maluvu ne uvua ne nsombelu wa buendenda. Nansha muvuaye mukolesha bu muena Katolike, Daniel kavua umona tshipatshila tshia muoyo, ne uvua wela mpata bua dikalaku dia Nzambi. Wakaya mu ekleziya mishilashilangane wenda ukeba diambuluisha kadi kumonaye se: bavule ba ku balunda bende bàvuà batantshila ekleziya, ne nansha bamue ba ku balunda bende bamfumu ba bitendelelu bavua banua bintu bia lulengu anyi maluvu. Eku, mukajende ukavua pa kushipa dibaka.

Bu muvuaye kayi ne ditekemena, Daniel wakadifundisha mu muaba wa dilengeja bena bibidilu bibi. Nansha nanku, uvua mumanye ne: panyima pa dipatuka diende, kavua ne bua kunenga bua kupingana ku bintu bia lulengu bikalaye kayi mupete diambuluisha. Kadi ndiambuluisha dia mushindu kayi? Mu Lumungulu 1996, matuku abidi panyima pa dipatuka mu muaba au wa dilengeja bena bibidilu bibi, Daniel wakapetangana ne Ntemu wa Yehowa umue ne wakamukemesha pakamusengelelaye ne: “Longa nanyi Bible, bu wewe mua kusua.” Ntemu eu wakalongolola bua kulonga Bible misangu ibidi ku lumingu ne Daniel, ne katupa kîpi Daniel wakatuadija kuakaja nsombelu wende bilondeshile disua dia Nzambi, ne pamutu pa balunda bende ba kale, wakapeta balunda bena nkristo bavua kabayi banua bintu bia lulengu anyi maluvu ne bavua babenga buendenda. Nenku Daniel wakamona se: tshidi Bible wamba ntshilelela: “Udi wenda ne bena meji udi ulua muena meji, kadi udi ubuelakana ne ba[p]ote neakenge bua bualu ebu.” (Nsumuinu 13:20) Matuku kaanji kuvula, wakamba ne: “Eu mmusangu wa kumpala mu matuku anyi a muoyo undi mumanye tshidi kuikala ne kuondo ka muoyo kakezuke kumvuija.” Nsombelu wa Daniel wakandamuka pende.

Mu ditunga dia Porto Rico, muntu mukuabu wakandamuka mu mushindu wa dikema. Uvua mu buloko ne bavua bamuangata bu muntu wa njiwu ya bungi, bualu ukavua mushipe bantu ndambu. Bulelela bua mu Bible buvua mua kumushintulula anyi? Eyowa. Ntemu wa Yehowa kampanda wakamupa bimue bibejibeji bia Tshibumba tshia Nsentedi ne bia Réveillez-vous! ne wakalomba bikuabu ne lukasa luonso. Wakatuadija kulonga nende Bible, ne bu muakatuadija bulelela bua mu Bible kulenga mutshima wende, mashintuluka akenzaye akamueneka kudi bonso. Tshimue tshia ku bijadiki bia kumpala bia dishintuluka diende tshivua se: wakakosesha nsuki yende ikavua mile ne kubeya muedi wende musalakane.

Bible udi wamba ne: Nzambi udi ubuikidila benji ba mpekatu badi banyingalala bushuwa ne bashintulula nsombelu wabu. Paulo wakafunda ne: ‘Kanuena bamanye ne: bantu babi kabena bapiana bukalenge bua Nzambi anyi? . . . Bakuabu benu bakadi nunku; kadi nuakuvuwibua.’ (1 Kolinto 6:9, 11) Kakuyi mpata, mêyi au ne aa adi mu Bienzedi 24:15 (NW) akasamba muntu eu: “Nekuikale dibiishibua dia bakane ne bakena bakane.” Wakamba ne: “Ndi musue bua kuikalapu padi dibiishibua dia bafue dienzeka bua meme kulomba luse bua bantu bamvua mushipe.”

Dîku dipiadipia

Dimue dituku bakaleja Luis, mumuangalaji wa evanjeliyo wa ku dîba ne ku dîba wa mu Bantemu ba Yehowa ba mu ditunga dia Argentine, nsongalume kampanda uvua ne nsombelu wa lutatu. Mulekela kudi baledi bende pakamulelabu, uvua mukolesha kudi malongolodi kabukabu. Pakavuaye ne bidimu bu 20, wakamanya muaba uvua mamuende musombele ne wakapangadija bua kuya kusomba pamue nende. Wakenza mudimu mukole, kubumba mfranga ya bungi ne kuenzaye luendu mutangile mu tshimenga muvua mamuende. Mamu kuanyisha bua kusomba nende too ne pakajika mfranga yende, ne pashishe kumuambilaye bua umbuke. Wakasua kudishipa bua dimubenga edi.

Kadi, Luis wakapeta mushindu wa kuyisha nsongalume eu bulelela bua mu Bible. Bulelela abu budi bukonga dishindika edi: “Nansha biandekela tatu wanyi ne mamu wanyi, Yehowa neangambule.” (Musambu 27:10) Nsongalume eu wakamona se: uvua ne Tatu wa mu diulu uvua kayi mua kumulekela nansha kakese. Udi mpindieu ne disanka dia kuikala muena mu dîku dipiadipia, dîku dia Yehowa.

Mulume mukuabu mu ditunga dimuedimue edi wakambila Ntemu wa Yehowa kampanda ne: uvua wanyisha tshibejibeji tshia Tshibumba tshia Nsentedi. Bua tshinyi? Bualu tshivua tshipandishe dibaka diende. Bidi bimueneka ne: dimue dituku, mulume eu mu diumbuka ku mudimu, wakamona mu tshitunga tshia mabeji mimansha, tshibejibeji tshimue tshia Tshibumba tshia Nsentedi tshikale ne mutu wa bualu ne: “Dishipa dibaka” mu maleta manene. Bu muvua dibaka diende dikale mu ndululu ne yeye ne mukajende batuadije dilumbulula ku kabadi bua kuabulukangana, wakangula tshibejibeji atshi ne wakatuadija kutshibala. Wakaya natshi kumbelu ne wakatshibala pamue ne mukajende. Bena dibaka aba bakateta bua kutumikila mibelu ya mu tshibejibeji etshi miashila pa Bible. (Efeso 5:21–6:4) Mutantshi kaunengi, malanda abu akalengela. Bakalekela dilumbulula bua kuabulukangana ne mpindieu badi balonga Bible bu bena dibaka baselangane, bikale mu buobumue.

Mu ditunga dia Uruguay, muntu kampanda dîna diende Luis kavua muena disanka nansha. Dinua pa tshibidilu bintu bia lulengu, spiritisme, ntendelelu wa mpingu, bunuavi bua maluvu bivua bimue bia ku bintu bivua bikondakaja nsombelu wende. Ndekelu wa bionso, mutekeshibue bikole mu mikolo, Luis wakalua muvidi wa dikalaku dia Nzambi. Mulunda wende kampanda wakamupa mukanda wa La vie: comment est-elle apparue? Évolution ou création?b Biakamufikisha ku dipetangana bua mutantshi muipi ne Bantemu ba Yehowa, kadi Luis kakanenga bua kupingana ku maluvu ne bintu bia lulengu. Mu dîba dia disumpakana dikole, pakadimonaye musombe mu tshina tshiûle ne bukoya, wakasambila, ulomba “tatuende wa Yezu Kristo,” bu muvuaye kayi mujadike dîna dia Nzambi.

Wakalomba Nzambi bua amuleje bikala dikala diende panu ne kipatshila kampanda. Luis udi ulonda ne: “Dituku mene diakalonda, muntu kampanda mumanyangana nende wakampesha mukanda uvuaye katshiyi utumika nawu. Uvua ne mutu wa bualu kayi? Buakabuluibua​—Nkomenu wabu munene ukadi pabuipi!”c Mukanda eu wakamuambuluisha bua kuandamuna lukonko luende. Luis wakalomba kabidi diambuluisha mu disambila bua kupeta tshitendelelu tshivua mua kumuleja mua kusadila Nzambi. Bualu bua dikema! Ngonga wa ku tshiibi wakadila ne Bantemu ba Yehowa babidi bavua bimane pambelu. Anu apu Luis e kutuadija kulonga nabu Bible. Wakalubuluka lukasa ne mpindieu udi udiumvua mubeneshibue bua mudiye Ntemu mutambule. Udi ne nsombelu mukezuke ne udi wambuluisha bakuabu kabidi bua kupetabu tshipatshila mu nsombelu wabu. Buende yeye, mêyi a Musambu 65:2 mmalue malelela: “Wewe udi u[m]vua milombu, bukua bantu bonso nebufike kûdi.”

Mu ditunga dia Philippines, Allan uvua mulongi musonsodi wa ndululu. Uvua muena bulongolodi buvua ne tshipatshila tshia “kutuisha mbulamatadi panshi bua bipungu bivua bilua kumonabi mua kupeta nsombelu wa muomumue bua bantu bonso.” Kadi dimue dituku, wakapetangana ne Bantemu ba Yehowa ne wakalonga mu Bible dilongolola dia Nzambi bua bukua-bantu. Dilongolola adi didi dikonga dilaya edi dienzeja ku spiritu: “Mu mutantshi mukese patupu, ne muntu mubi kakuikalaku kabidi . . . Kadi bena bupuekele bine nebapiane buloba, ne bushuwa nebapete disanka diabu dinene mu ditalala divulavulayi.” (Musambu 37:10, 11, NW) Allan wakamba ne: “Tshiakanenga bua kusokolola ne: tshivua bulongolodi buetu buluila tshikavua tshilaya mutantshi mule mu Bible. Malu onso atuvua tujinga bikole netuapete mu Bukalenge bua Nzambi.” Mpindieu Allan udi ubingisha Bukalenge bua Nzambi ne wambuluisha bakuabu bua kuitabuja bulelela bua mu Bible.

Eyowa, nsombelu idi yandamuka padi bantu balonda bulelela bua mu Bible, Dîyi dia Nzambi. Bushuwa, tshikondo tshilualua tshikala bantu bonso bapanduki mua kuakaja nsombelu yabu mu diumvuangana ne disua dia Nzambi. Nedikale diandamuka dia bushuwa! Apu ke mulayi eu kukumbanawu: ‘Kabiena bienzela bikuabu bintu bibi, kabiena bishipa bikuabu, mu mukuna wanyi wa tshijila wonso; bualu bua buloba nebuikale bûle tente ne kumanya kua Yehowa, bu mudi mâyi a mu mâyi manene abuikila miaba yawu yonso.’​—Yeshaya 11:9.

[Mêyi adi kuinshi]