Tukoleshayi ditabuja dietu mu Dîyi dia Nzambi

BANTU bavule mbabale Bible kupita mukanda kayi wonso mukuabu. Kadi mbantu bungi munyi badi baleje ditabuja mu mukenji wende? Bible muine udi umvuija ne: ‘bonso kabena ne ditabuja.’ (2 Tesalonike 3:2) Bulelela, katuena baledibue ne ditabuja. Tudi ne bua kudidima. Nansha aba badi ne ndambu wa ditabuja kabena ne bua kudiangata bu tshintu tshimana kupeta. Ditabuja didi mua kunyanguka ne kufua. Pa nanku, bidi bikengela madikolela bua kushala ‘balenga mu ditabuja.’​—Tito 2:2.

Nenku, ne kabingila kimpe, Kasumbu Kaludiki ka Bantemu ba Yehowa kavua kasungule tshiena-bualu tshia “Ditabuja mu Dîyi dia Nzambi” bua mulongolongo wa mpuilu yabu ya distrike ya 1997/98. Nenku Bantemu ne bantu bakuabu miliyo mivule bavua bapete disanka dia kusangila pamue bua kukolesha ditabuja diabu mu Dîyi dia Nzambi.

Dîyi dia Nzambi didi bulelela​—Nshindamenu wa ditabuja dietu

Ke tshivua tshiena-bualu tshia dituku dia kumpala dia mpuilu. Tshiakatuadija ne mêyi a ka-lumbandi kudi bateleji bonso. Dikala mu mpuilu eu divua tshijadiki tshia kanemu bua Bible. Kadi, bakela nkonko ivua yelesha meji pa bidi bitangila ngikadilu wa ditabuja dietu: ‘Tudiku bakumbane bua kubingisha mitabuja etu, pa kutumika ne Dîyi dia Nzambi bu tshieyemenu anyi? Tutuku tuanyisha biakudia bia mu nyuma, katuyi tupepeja Bible, bisangilu bia tshisumbu ne mikanda mishindamene pa Bible anyi? Tudiku tukola mu dinanga, dimanya dijalame ne busunguluji anyi?’ Ngamba-malu wakakankamija bantu bonso bua kuteleja ne ntema, wamba ne: “Mpuilu eu wa Distrike wa ‘Ditabuja mu Dîyi dia Nzambi’ uvua mulongolola bua kutuambuluisha bua tudikonkonone ne tutete bunene ne ngikadilu wa ditabuja ditudi nadi muntu ne muntu.”

Muyuki wa nshindamenu uvua ne tshiena-bualu tshia: ‘Tuendayi bua ditabuja, ki mbua dimona.’ (2 Kolinto 5:7, NW) Ngamba-malu wakamba ne: “Ditabuja dia aba badi balua Bantemu ba Yehowa kadiena dia bitabataba.” Mbulelela menemene! Ditabuja dia bushuwa ki ndifofome nansha. Ndishindamene pa malu malelela. Ebelu 11:1 (NW) udi wamba ne: “Ditabuja ndindila dishindika dia malu matekemena, dileja patoke dia malelela nansha mudiwu kaayi amueneka.” Ngamba-malu wakaleja ne: “Bituikala bushuwa ne bua kuenda bua ditabuja, tudi tukengela ditabuja didi dishindame bimpe.” Bu mutudi tuenda bua ditabuja, kabiyi bua dimona, katuena tukengela mumvuija adi atangila mushindu ne dîba dikala Yehowa mua kukumbaja tshitupa tshionso tshia dilongolola diende. Bitukadi bamane kumanya pa bidi bimutangila bidi bitupesha dieyemena dia tshishiki mu bukole budiye nabu bua kukumbaja malaya ende mu dinanga ne mu buakane.

Muyuki wa “Bansonga bena nkristo​—Tshitupa tshia mushinga mukole mu tshisumbu” wakavuluija bansonga mushindu udibu ne mushinga mukole ku mêsu kua Yehowa. Bavua bakankamija bua kukola mu nyuma pa kudifundila bipatshila bu mudi kubala Bible mujima ne kukumbaja malu-malomba bua didilambula ne batismo. Ditungunuka ne malonga a pa mutu mbualu bua muntu nkayende bua kupangadija ne baledi bende, kadi biwadituamu, tshipatshila tshidi ne bua kuikala misangu yonso tshia kulua mukumbane bua kusadila Nzambi mu mushindu udi upatula bipeta bimpe menemene. Malonga a mu bulongolodi ebu adi mua kuikala ne dikuatshisha dilenga patudi ‘tujadika malu adi makane’ adi umvuangana ne ditabuja dietu.​—Filipoi 1:9, 10.

Pashishe kuakalonda muyuki mukosolola wa bitupa bisatu uvua ne tshiena-bualu tshia: “Mmêyi-makulu a nganyi autu utumikila?” Ditabuja mu Dîyi dia Nzambi didi ditusaka bua kulamata ku mêyi-makulu a mu Bible. Bena nkristo badi banemeka mikenji ne mêyi-maludiki a Yehowa. Tshilejilu, Mifundu idi itubela bua kubenga kutumika ne ngakuilu mubole ne munyanguke. (Efeso 4:31, 32) Ngamba-malu wakebeja ne: “Padibu bakusuya peshi bakufiikisha munda, utu usamina muena dibaka nebe peshi bana bebe anyi?” Bushuwa, abi kabiakumvuangana ne Buena-nkristo. Nzambi udi kabidi ne mêyi-makulu adi atangila mmuenekelu wetu. Bena nkristo badi ne bua kuvuala “bilamba bilongolola bimpe, ne budipope.” (1 Timote 2:9, 10, NW) Muaku “budipope” udi ufila lungenyi lua didinemeka, lua lumu ne lua nkatshinkatshi. Tudi basaka kudi dinanga dietu bua bakuabu ne tudi balombola kudi mêyi-maludiki a mu Bible ne kudi ngumvuilu wa tshidi tshiakanyine.

Mu miyuki ibidi ivua ilonda muvua dikonkonona dia Ebelu 3:7-15 ne 4:1-16 mvese ku mvese. Mvese eyi ya mu Bible idi itudimuija ku njiwu ya dikala “bapapisha kudi bukokeshi budingi bua mpekatu.” (Ebelu 3:13, NW) Mmunyi mutudi mua kutshimuna mu mvita itudi tuluangana ne mpekatu? Yehowa udi utuambuluisha ku butuangaji bua Dîyi diende. Bushuwa, ‘dîyi dia Nzambi didi ne muoyo ne bukole, didi dijingulula lukasa meji ne malu adi mutshima musue kuenza.’​—Ebelu 4:12.

Muyuki wa ndekelu bua dituku dia kumpala dia mpuilu uvua wa: “Mukanda bua bantu bonso.” Wakazangika bulelela, bujalame ne mushinga mukuatshishi wa Bible. Ndisanka kayipu dia kumvua ngamba-malu umanyisha dipatuka dia broshire mupiamupia wa mabeji 32 uvua ne tshiena-bualu tshia: Un livre pour tous (Mukanda bua bantu bonso)! Broshire eu mupiamupia uvua mulongolola nangananga bua bantu badi ne dimanya dikese pa Bible, nansha mudibu balonge bikole. Muyuki eu wakakoma ne mêyi aa: “Bantu badi bakengela kudikonkonuena Dîyi dia Nzambi. Tudi batekemene se: bikalabu mua kuenza dikonkonona dia buludiludi, nebafike ku dijingulula se: mukanda eu wa pa buawu, Bible, udi bushuwa mukanda bua bantu bonso!”

Idikija “Mupuangaji wa ditabuja dietu”

Tshiena-bualu etshi tshia dituku dibidi dia mpuilu tshiakakoka ntema kudi Yezu Kristo, “Mupuangaji wa ditabuja dietu.” Tudi ne bua ‘kumulonda mu makasa ende.’ (Ebelu 12:2, NW; 1 Petelo 2:21) Batu bambila bantu bavule ba mu Bukua-buena-nkristo ne: ‘Itabuja Mukalenge Yezu, ne neusungidibue!’ Kadi ke tshionso tshidi tshikengela bua kuikala ne ditabuja anyi? Bible udi wamba ne: “ditabuja didi kadiyi ne midimu ndifue.” (Yakobo 2:26, NW) Pa nanku, kusakidila ku ditabuja Yezu, tudi ne bua kuenza midimu yakenzaye, nangananga mu diyisha lumu luimpe lua Bukalenge bua Nzambi.

Programe wa mu dinda wakashindamena pa mudimu wa dimuangalaja dia evanjeliyo. Anu bu Paulo, tudi ne bua kuikala ne dijinga dikole dia kuamba lumu luimpe lua lupandu. (Lomo 1:14-16) Yezu wakayisha bantu miaba yonso. Nansha mudi mudimu wetu wa pa tshibidilu wa ku nzubu ne ku nzubu upatula bipeta, bantu ba bungi kabatu kumbelu patudi tukumbula. (Bienzedi 20:20) Bavule badi mu tulasa, ku midimu, ku disumba dia bintu, anyi ku ngendu. Pa nanku, tuetu kabidi tudi ne bua kuyisha mu miaba ya patoke ne mu miaba yonso itudi mua kusangana bantu.

Muyuki wa: “Ikalayi bele miji ne bashindame mu bulelela” wakatuvuluija bungi buvule bua bayidi bapiabapia badi benda batambula​—muayene wa bantu bapite pa 1 000 ku dituku dionso! Mbia mushinga mukole bua bapiabapia aba bele miji ne bashindame mu ditabuja. (Kolosai 2:6, 7) Ngamba-malu wakumvuija ne: miji miena dîna idi ikoka mâyi ne biakudia eku kabidi imanyika anyi ikuata mutshi. Bia muomumue, ku diambuluisha dia bibidilu bimpe bia dilonga ne malunda mimpe, bayidi bapiabapia badi mua kushindama mu ditabuja.

Mibelu eyi ivua miakanyine nangananga balumbidi ba batismo. Eyowa, mu dituku dibidi dia mpuilu, bayidi bapiabapia bisumbu ne bisumbu bakatambula, balonda tshilejilu tshia Yezu. Muyuki wa: “Ditabuja mu Dîyi dia Nzambi didi difikisha ku batismo” wakavuluija balumbidi ba batismo bua se: kuinyibua ne kasuki mu mâyi ntshimanyinu tshiakanyine tshia difua diabu mu nsombelu wabu wa kale wa budisui. Ditundubuka diabu mu mâyi didi dileja dibavuija ne muoyo bua kuenza disua dia Nzambi.

Muyuki wa: “Luanganayi mvita mikole bua ditabuja” uvua mushindamene pa mukanda wa mu Bible wa Yuda. Bavua batukankamije bua kukuba ditabuja dietu pa kukandamena buenzeji bubi, bu mudi tshiendenda, buntomboji ne butontolodi. Pashishe, bakaleja ntema ya pa buayi kudi baledi​—nangananga batatu—​mu muyuki wa: “Petesha bena mu nzubu muebe bidibu bakengela.” Kukumbaja majinga a dîku a mu nyuma, a ku mubidi ne a mu mpampakenu ndîyi-dituma dia mu Mifundu. (1 Timote 5:8) Ebi bidi bilomba dîba, diyukilangana ne disomba pamue. Yehowa Nzambi udi bushuwa usanka bua mudimu wonso mukole udi baledi bena nkristo benza bua kukolesha bana babu mu bulelela.

Muyuki mukosolola uvua ulonda, “Tuyayi ku Nzubu wa Yehowa,” wakakolesha dianyisha bua bisangilu bia bena nkristo. Bidi bifila diikisha ku tunyinganyinga tua mu bulongolodi ebu. Mu bisangilu tudi ne mushindu wa kushintakajangana dikankamija, ne tudi mua kuleja dinanga dietu bua bena kuitabuja netu. (Ebelu 10:24, 25) Bisangilu bidi kabidi bituambuluisha bua kukolesha nzanzu yetu bu balongeshi, ne bidi bikolesha ngumvuilu wetu wa dilongolola dia Nzambi. (Nsumuinu 27:17) Katudilamunyi ku tshisumbu, tuvulukayi mêyi a Yezu aa: “Bualu, padi babidi nansha basatu basangile mu dina dianyi, meme ndi munkatshi muabu.”​—Matewuse 18:20, MMM.

Muyuki wa ndekelu bua dituku adi uvua wa: “Ngikadilu wa ditabuja diebe​—Mmuteta mpindieu.” Ditabuja didi kadiyi diteta ki ndijadikibue bu dilelela, ne ngikadilu wadi kêna mumanyike. Didi mumue ne sheke udi kayi muanji kupetela mfranga. Udi bushuwa ne mushinga wa bungi bua mfranga idipu anyi? Bia muomumue, ditabuja dietu didi ne bua kutetshibua bua kujadika ne: didi ne mushinga ne ngikadilu mulelela. (1 Petelo 1:6, 7) Ngamba-malu wakamba ne: “Ku misangu, bamuangalaji ba ngumu popamue ne bakokeshi mbadingibue kudi bamfumu ba bitendelelu ne batontolodi mu ditutumpila malu, bakonyangaja mitabuja etu a Buena-nkristo pamue ne nsombelu wetu. . . . Netulekele aba badibu bafofomije mêsu kudi Satana batutshingisha, batutekesha mu maboko ne batukuatshisha bundu bua lumu luimpe anyi? Netulekele mashimi pa bidi bitangila bulelela bua ikala ne buenzeji bubi pa dibuela dietu dia pa tshibidilu mu bisangilu ne pa mudimu wetu wa diyisha anyi? Peshi netuimane kashendende ne bikale ne dikima ne bapangadije bikole kupita pa tshibidilu bua kutungunuka ne kumanyisha bulelela pa bidi bitangila Yehowa ne Bukalenge buende?”

Ikala ne muoyo bua ditabuja

Tshiena-bualu tshia dituku disatu dia mpuilu tshivua tshishindamene pa mêyi a Paulo a se: ‘Kakuena muntu udi ubingishibua bua mikenji ku mêsu kua Nzambi; bualu bakamba ne: muntu muakane neikale ne muoyo [bua] ditabuja.’ (Galatia 3:11) Muyuki mukosolola wa: “Mêyi a mulayi wa Yoele bua matuku etu aa” uvua bumue bua ku malu manene a mu dinda. Mukanda wa Yoele udi ufunkuna tshikondo tshietu etshi ne wamba ne mitalu ne: ‘Aka! Bua dituku adi! Bua dituku dia Yehowa didi pabuipi, ne didi dilua bu kubutuka kufume kudi Nzambi Wa-Bukole-Buonso.’ (Yoele 1:15) Mu mushindu wa muomumue ne mpasu idi kayiyi iteketa, bena nkristo bela manyi ki mbalekele tshintu nansha tshimue tshijika njila wa dimanyisha dia Bukalenge mu tshikondo etshi tshia ku nshikidilu.

Mukanda wa Yoele udi kabidi ufila ditekemena, wamba ne: “Muntu yonso [“wabila,” NW] dina dia Yehowa neasungidibue.” (Yoele 2:32) Muanda eu udi umvuija malu a bungi kupita ditumika patupu ne dîna dia Yehowa. Bidi bikengela dinyingalala dienza ne muoyo mujima, ne udi umvuija dilekela malu mabi. (Yoele 2:12, 13) Kakuena dîba dia kujanguluka bualu mu katupa kîpi emu Yehowa neakumbaje dilumbuluisha diende pa bisamba, anu bu muakenzeye bua Moaba, Amona, ne rejon wa mukuna wa Seî mu matuku a Mukalenge Yehoshafata wa Yuda.​—2 Kulondolola 20:1-30; Yoele 3:2, 12.

Bantu bonso bavua bakankamija kudi muyuki wa: “Leja ditabuja pa kuindila Yehowa.” Lelu’eu bu mutukadi baye kule mu tshikondo tshia ku nshikidilu, tudi mua kuela dîsu panyima bua kumona dikumbana dia malaya mavule a Yehowa, ne tudi batabalele bikole malu alua kuenzeka kabidi. Bantu ba Yehowa badi ne bua kutungunuka ne kuikala ne lutulu, bavuluke ne: malu onso adi Nzambi mulaye neenzeke.​—Tito 2:13; 2 Petelo 3:9, 10.

Programe wa mu dinda wakakoma ne drama wa: “Lama dîsu diebe dipepele.” Dileja edi dia nsombelu mulelela mu dinaya diakatukankamija bua kukonkonona mmuenenu wetu pa bipatshila bia ku mubidi. Nansha tuetu muaba kayi, bituasua bua nsombelu wetu kikadi ne tunyinganyinga, tudi ne bua kulonda mubelu wa Yezu wa kulama dîsu dietu dipepele, dituishila bimpe pa Bukalenge bua Nzambi.​—Matayo 6:22, NW.

Muyuki wa patoke uvua ne tshiena-bualu tshivua tshikoka ntema tshia: “Ditabuja ne matuku ebe atshilualua.” Wakafila bijadiki bia se: balombodi ba bantu kabena ne bukole bua kujikija ntatu ya mu bulongolodi ebu. (Yelemiya 10:23) Malu menza kudi bantu kale atu anu a muomumue​—mu mushindu mutambe kualabala ne wa tshinyangu. Mmunyi mudi Bantemu ba Yehowa bela meji bua matuku atshilualua? Tudi tuitaba ne: bukua-bantu buena lulamatu budi ne matuku atshilualua malenga mu Bukalenge bua Nzambi. (Matayo 5:5) Nzambi neakumbaje malaya ende bua diakalenga dia bonso badi ne ditabuja mu Dîyi diende, didi dibela ne: ‘Keba Yehowa paudi mumanye mua kumusangana; umubikile patshidiye pabuipi.’​—Yeshaya 55:6.

Yezu wakajula lukonko lua mushinga mukole mutume meji ku tshikondo tshietu etshi. Wakebeja ne: ‘Palua Muana wa muntu, neasangane ditabuja pa buloba anyi?’ (Luka 18:8) Muyuki wa ndekelu wakambulula programe wa mpuilu ne wakaleja mushindu uvua mpuilu eu mufile tshijadiki tshimpe tshia se: ditabuja mu Dîyi dia Nzambi didiku, nansha mutudi mu bulongolodi bubule ditabuja ne budine mu malu a panu.

Kadi, tudi mua kudiebeja muntu ne muntu ne: ‘Ndi munkatshi mua aba badi ne ditabuja didi kadiyi ditenkakana kudi Nzambi ne Dîyi diende anyi?’ Mpuilu wa Distrike wa “Ditabuja mu Dîyi dia Nzambi” udi ne bua kutuambuluisha bua kuandamuna: eyowa ku lukonko alu. Ne ndianyishapu kayi ditudi nadi kudi Yehowa bua dikolesha ditabuja dietu kudiye ne mu Bible, Dîyi diende dienzeja ku spiritu!

[Bimfuanyi mu dibeji 24]

Bena budisuile bavule bakatumika ne disanka bua kuambuluisha binunu bivule bia baleji-mpala

[Bimfuanyi mu dibeji 25]

Bavua batumike ne bipalu bialabale pa buloba bujima

[Tshimfuanyi mu dibeji 25]

L. A. Swingle muena mu Kasumbu Kaludiki udi uleja dipatuka dia broshire mupiamupia

[Tshimfuanyi mu dibeji 26]

Bavule bakatambula bu tshimanyinu tshia didilambula diabu kudi Yehowa

[Bimfuanyi mu dibeji 27]

Babuedi ba mu mpuilu bakimba misambu ya Bukalenge ne disanka dionso. Tshimfuanyi: drama wa: “Lama dîsu diebe dipepele”