Bua tshinyi batu basangila?

TSHIDIMU tshionso Bantemu ba Yehowa pa buloba bujima batu basangila binunu bivule mu mpungilu. Muine amu, badi bapeta bulunda ne bateleja ndongamu (programe) mulenga wa dilongesha dia mu Bible. Bamue badi benza madikolela mavule bua kubuela mu mpungilu eyi. Tshilejilu, tshidimu tshishale, mu ditunga dia Malawi mulume kampanda ne mukajende bavua ne bidimu bipite pa 60, pamue ne muanabu wa balume ne muana wa katoto, bakenza luendu lua kilometre 80 ku dikalu bua kubuela mu mpungilu. Bakumbuka mu musoko wabu pa dîba isambombo wa dinda ne kufikabu pa muaba wa mpungilu kunyima kua mêba 15.

Mu ditunga dia Mozambique, bantu kasumbu bakenza luendu lua matuku asatu ku makalu bua kubuela mu mpungilu. Bumue butuku, pavuabu balale pambelu, kumvuabu ntambue ikungula pabuipi menemene. Nansha muakakupabu nkunyi ya mudilu ku luseke luvua nyama ayi, ntambue yakashala anu pabuipi apu too ne pa bitala. Ntemu mukuabu uvua uya ku muine mpungilu eu wakatuilangana mpala ne mpala ne ntambue mu njila. Wakashala muimane mupuwe kayi unyunga too ne pakaya ntambue. Mu mpungilu, Bantemu aba bakalonda ne disanka dionso muvuabu ‘bapandishibue mukana mua nyama wa ntambue.’​—2 Timote 4:17.

Bantemu ba Yehowa bavule badi benza madikolela a bungi bua kubuela mu mpungilu anyi mene mu bisangilu bia tshisumbu bia ku lumingu luonso bua kutendelela. Bua tshinyi? Biena-bialu bidi bilonda ebi nebikuambuluishe bua kumvua bua tshinyi disangila pamue didi ne mushinga wa bungi.