Mpungilu ya distrike mmushindu muimpe wa kumanyisha bulelela
1. Bibilu kampanda bivua bena Isalele benza bivua bibapesha mpunga wa kuela meji ne kuyikila malu a Nzambi a mushindu kayi?
1 Bena Isalele bavua badisangisha misangu isatu tshidimu tshionso bua kuenza bibilu kampanda. Nansha muvuabi ne: anu bantu balume ke bavua ne tshia kubuelamu, misangu ya bungi bena mu mêku bonso bavua benza ngendu batangile ku Yelushalema bua kubuelamu. (Dut. 16:15, 16) Tshivua tshikondo tshia kuela meji ne tshia kuyikila malu a Nzambi. Amue a kudiwu mmalu kayi? Bumue bua kudiwu budi ne: Yehowa utu ufila bintu ne muoyo mujima, ne dinanga dionso. (Dut. 15:4, 5) Bukuabu budi ne: Yehowa ke muntu udi mua kutulombola ne kutulama bimpe. (Dut. 32:9, 10) Bena Isalele bavua bavuluka kabidi ne: bu muvuabu tshisamba tshivua ne dîna dia Yehowa, bavua ne bua kuenza malu makane anu bu yeye. (Dut. 7:6, 11) Mpungilu itutu petu tuenza tshidimu tshionso lelu idi ituambuluisha.
2. Malu a mu mpungilu wa distrike neatokeshe malongesha a mu Bible mushindu kayi?
2 Mpungilu udi ukenkesha butoke: Mu mpungilu ya distrike, mutu miyuki ne drama ne manaya a bilejilu ne dielangana nkonko bitu bituambuluisha bua kumvua bimpe malongesha a mu Bible ne bua kuatumikila. (Yone 17:17) Bakadi balongolole malu a bungi bua mpungilu utuenza. Bulongolodi bua Yehowa mbulongolole bua bakule bua majinga adiku lelu mu matunga onso. (Mat. 24:45-47) Udiku ujinga ne muoyo kulukulu bua kumona ne kumvua malu aa anyi?
3. Tudi mua kuenza tshinyi bua mpungilu kutuambuluisha?
3 Kadi bua mpungilu kutuambuluisha bikole, anu tuetu babuelamu matuku onso asatu, ne bateleje malu onso bimpe. Pawikala kuyi muanji kuyikila ne mfumuebe wa mudimu, ndaku umulombe bua kuenji mudimu matuku au to. Bua wewe kuteleja miyuki ne ntema, wikale ulala kumpala kua dîba. Wewe kabidi utangila anu kudi muntu udi wakula ku tshiakuidi, ufundaku tu malu tukese, neushale ne ntema. Enza bua telefone webe kakupangishi wewe anyi bantu bakuabu bua kulonda miyuki. Lekela kuyikila, kufunda mu telefone anyi kudia padibu benda benza miyuki.
4. Leja tshidi baledi mua kuenza bua mpungilu kuambuluisha bana babu.
4 Pavua bena Isalele badisangisha mu bidimu bia Nsabatu ne mu Tshibilu tshia bitandatanda, bavua babadila Mikenji. Bavua baya ne ‘bana babu bakese’ bua ‘bumvue, bayile lungenyi.’ (Dut. 31:12) Bitu bienza disanka dia bungi bua kumona bana ne baledi babu basombe, pamue bateleja miyuki ne ntema. Dilolo dionso, nuikalaku nubalulula malu anuvua bafunde, nuyikila bua malu avua matambe kunusankisha. Bu mudi ‘bupote busuikibue mu mutshima wa muana,’ baledi badi ne bua kulama bana babu (nansha aba bakadi babandile) mu dikisha dia mu midi, pamutu pa kubalekela ‘nkayabu.’—Nsu. 22:15; 29:15.
5. Mmunyi mudi ngikadilu wetu muimpe mua kutumbisha malongesha a mu Bible?
5 Bikadilu bietu bilenga bidi bitumbisha malongesha a mu Bible: Bikadilu bietu bimpe mu musoko udi mpungilu wenzekela, bidi bitumbisha malu atutu tulongesha. (Tito 2:10) Bampulushi ne banene bakuabu ba mbulamatadi batu bamona padi bantu balonda mikenji ya bena Kristo ne padibu ne lutulu ne kanemu ne bantu bakuabu bonso. (Kolos. 4:6) Tshilejilu, tshidimu tshishale, mu umue muaba, mfumu wa malu a manaya wakafundila bena komite wa mpungilu, wamba ne: “Ndi nnuela tuasakidila wa manza tente bua kanemu ne mankenda a bantu bavua baya mu tshibilu tshienu.”
6. Mmunyi mutudi mua kutumbisha malongesha a mu Bible mu mvuadilu wetu mu musoko mudi mpungilu wenzekela?
6 Patudi tuvuala kamanyinu ketu, bidi biambuluisha Bantemu netu bua kutumanya, bilongesha kabidi bantu ba tshianana. Bena mu musoko mudi mpungilu nebamone bantu ne tumanyinu ne mvuadilu muimpe wa kanemu, kabayi bavuale bilamba kabiyi bikoma anyi bidi bijula bantu majinga mabi. (1 Tim. 2:9, 10) Nunku, tudi ne bua kuvuala bimpe patudi mu musoko mudi mpungilu wenzekela. Tshilejilu, ki mbimpe kuvuala tupanu tua bitupa ne tupila to. Nansha nuenzela mpungilu mu tshipalu tshia ndundu, nuikalayi amu ne mvuadilu muimpe. Nansha patudi tushintulula bilamba anyi tuya kudia mu restoran, tudi anu babikidibue ba mu mpungilu, katuena ne bua kuvuala buvualavi to.
7. Leja mushindu umue utudi mua kukolesha buobumue buetu.
7 Mu bibilu biabu, bena Isalele bavua basanka pavuabu bapetangana ne bana babu ba mu misoko anyi matunga makuabu; bivua bikolesha buobumue buabu. (Bien. 2:1, 5) Bu wetu buetu butu bumueneka mu mpungilu ya distrike bimpe menemene. Bitu bimueneka anu bu ne: tudi mu mparadizu. (Mus. 133:1) Tuikalayi tuya ne biakudia bikumbane bua kubidila muaba utudi tuenzela mpungilu, pamutu pa kupatuka mu dikisha dia midi bua kusumba bintu pambelu. Kuenza nunku nekutuambuluishe bua kumanyangana ne kuyikila ne bana betu badi basombe netu pamue.
8. Bilondeshile tshitudi, mmalu kayi mimpe adi mua kutusaka bua kuenza mudimu mu mpungilu?
8 Bantu bakuabu batu bakema patubu bumvua ne: bena budisuile ke batu benza bua mpungilu yenzeke mu bulongame. Neudifile pebe “ne disanka” bua kuenza mudimu mu mpungilu anyi? (Mus. 110:3) Bamue baledi batu benza midimu mu mpungilu pamue ne bana babu bonso bua kubibidija bua bikale bambuluisha bantu bakuabu. Pawikala utu utshina bantu, mbimpe kuenza mudimu mu mpungilu bua umanyangane ne bana betu bakuabu. Tshilejilu, muanetu wa bakaji munga wakamba ne: “Meme mvua mumanye anu bena dîku dietu ne balunda banyi bakese. Kadi pangakenza mudimu wa diteka mankenda, ngakamanyangana ne bana betu ba bungi. Ngakumvua bimpe be!” Patudi tubuela mu mpungilu, tudi tuvudija bungi ba balunda betu: bidi bitupesha disanka dia bungi. (2 Kol. 6:12, 13) Pawikala kutu muanji kuenza mudimu mu mpungilu, webeje bakulu bua kumanya tshiudi mua kuenza.
9. Netuenze tshinyi bua kubikila bantu mu mpungilu?
9 Bikila bakuabu bua bateleje Dîyi dia Nzambi: Anu bu mu bidimu bishale, netubange mudimu wa dibikila bantu mbingu isatu kumpala kua mpungilu wetu kutuadijaye. Mbimpe bisumbu bienze muabi muonso bua kuabanya bikole mabeji a dibikila nawu bantu mu teritware yabi. (Tangila kazubu ka “Mushindu utuabanya mabeji a kubikila nawu bantu.”) Mabeji adi ashala, nulue nawu mu mpungilu. Bualu bantu badi balua mu mpungilu nebayishe nawu mu musoko udi mpungilu, padi mpunga umueneka.
10. Londa malu adi aleja ne: bantu batu bitaba bua kulua mu mpungilu.
10 Tshidimu tshionso, bantu batu bitaba bua kulua mu mpungilu anyi? Mu mpungilu kampanda, umue wa ku bana betu bavua bakidila bantu wakambuluisha muntu mulume ne muena kuende bua kupetabu muaba wa kusomba. Bakamuambila ne: pavuabu bapete dibeji dia dibikila, “malu avuamu akabasankisha.” Bobu kuangata mashinyi abu, kuenda kilometre mipite pa 320. Muanetu wa bakaji mukuabu wakapesha muntu kampanda dibeji dia kumubikila nadi pavuaye uyisha ku nzubu ne ku nzubu, muntu au kumueneka bu uvua ukeba kumanya malu a mu mpungilu. Ke yeye kutuadija kumumvuija malu avua mu dibeji adi. Abidi mmale, asatu mmîpi, yeye kumona muntu au ne mulunda wende mu mpungilu ne mukanda uvua ufuma ku dipatuka.
11. Kubuela tshidimu tshionso mu mpungilu ya distrike kudi ne mushinga bua tshinyi?
11 Bu muvua Yehowa munange bena Isalele, uvua muenzeje bibilu abi bua bamone mua ‘kumukuatshila mudimu ne muoyo wonso udi kauyi ne lubombo.’ (Yosh. 24:14) Bia muomumue, kubuela tshidimu tshionso mu mpungilu yetu ya distrike kudi kutuambuluisha bua kutungunuka ne ‘kuenda mu bushuwa’; kubuelamu mene ngumue mushindu munene utudi tutendelela Nzambi. (3 Yone 3) Yehowa ambuluishaku bantu bonso badi banange bulelela bua babuele mu mpungilu eyi, bua yibambambuluise bikole!
[Lungenyi lunene lua mu dibeji 4]
Bikadilu bietu bimpe mu musoko udi mpungilu wenzekela, bidi bitumbisha malu atutu tulongesha
[Lungenyi lunene lua mu dibeji 5]
Netubange mudimu wa dibikila bantu mbingu isatu kumpala kua mpungilu wetu kutuadijaye
[Kazubu mu mabeji 3-6]
Malu a kuvuluka bua mpungilu wa distrike wa 2012
▪ Dîba: Programe neatuadije pa dîba dia 8:20 matuku onso asatu. Kadi bua mpungilu yenzeka mu bimenga binene ebi: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, yoyi neyikale ituadija pa dîba dia 9:20. Mu bimenga bikese, bantu nebabange kubuela muaba wa mpungilu mu 7:00, mu bimenga binene mu 8:00. Padibu bamba ne: mizike ikadi pa kubanga, tuetu bonso tuye bua kusomba pa miaba yetu bua mpungilu kutuadijaye bimpe. Mu bimenga bikese, mu Ditanu ne mu Disambombo, mpungilu neajike mu 15:55; kadi mu Dia lumingu, neajike mu 14:40. Mu bimenga binene, mu Ditanu ne mu Disambombo, neajike mu 16:55; kadi mu Dia lumingu, neajike mu 15:40.
▪ Dikuatshila miaba ya kusomba: Anu bantu badi ku nzubu kuenu, banudi benze nabu luendu pamue, anyi baudi ulonga nabu Bible ke baudi mua kukuatshila muaba.—1 Kol. 13:5.
▪ Biakudia bia mu midi: Tudi tunulomba bua kulua ne biakudia bungi bukumbanyine kadi bidi mua kudisha mubidi, bu mudi: mampa, mikata, bimuma (bibote), tumbele, benyi anyi tuto. Bua kuepuka njiwu, panudi nulua ne bintu bu mudi mâyi, kafe anyi tshiayi, nubiele mu bintu bidi kabiyi mua kutayika to. Mbakandike bua kulua ne maluvu adi akuatangana mu mpungilu. Tuetu balue ne bietu biakudia anyi bietu bia kunua, katuakukeba bua kusumba bintu kudi badi babipanyisha muaba wa mpungilu to. Kuepuka basumbishi ba bintu aba ndilongesha dinene, kudi kuleja mutudi ne mankenda. (Numanye ne: Bapanyi ba bintu bia kudia kabena ne bua kubuela nabi muaba udi mpungilu wenzekela to, nansha kakese.—Yone 2:13-17.)
▪ Mankenda: Bitu bimueneka ne: bana betu batu baya kusumbila biakudia muaba wa mpungilu ke batu bimansha bintu bu mudi: mabeji, tubudimbu, tutotola ne bintu bikuabu. Muntu yeye musumbe biakudia kudi basumbishi ba bintu (bu mudi mbombo, bisukuita, tuto, makopo a misanyi anyi bintu bikuabu), udi ne bua kuya kuela tubudimbu ne mabeji anyi bizubu bia bintu ebi muaba udibu babilongoluele bua kubiela, pamutu pa kubiela panshi. Kadi tuetu bamone muntu muele bintu bu mudi tubudimbu anyi mabeji panshi, tubiangule, tubiele mu tshintu tshia kuela bintu bia butshiafu. Bana betu, bu nuenu mua kusua, tuenzayi muetu muonso bua kulamaku muaba utudi tuenzela mpungilu ne kumpenga kuawu kuonso ne mankenda. Mankenda ntshilumbu tshia muntu yonso udi ubuela mu mpungilu. Muntu yonso yeye muikale uditatshisha bua mankenda nunku, dituku dionso ku ndekelu kua mpungilu muaba utudi tumuenzela newikale ushala amu ne mankenda. Tudi basue kuleja ne: tudi ne ngikadilu ya buena ya Nzambi wa tshijila utudi tutendelela.—1 Pet. 1:15, 16; Ekes. 19:10; Dut. 23:14.
▪ Mapa: Bua kuleja dianyisha dietu bua malu onso adibu balongolole bua mpungilu, tuikalaku tuela makuta mu tushete tua mapa a mudimu wa pa buloba bujima tua ku Nzubu wetu wa Bukalenge anyi tudi muaba udi mpungilu wenzekela. Muntu yeye muele sheke wa makuta bu dipa mu mpungilu, udi ne bua kufundapu “Association ‘Les Témoins de Jéhovah’” bu muntu udiye upesha makuta au.
▪ Njiwu ne masama a tshimpitshimpi: Padi bualu bua disama dia tshimpitshimpi bumueneka dîba ditudi mu mpungilu, bikila muanetu wa ku bakididianganyi udi pabuipi nebe bua amanyishe diakamue bena Tshibambalu tshia diondopangana; dîba adi bana betu badi mu tshibambalu atshi badi mua kuteta kumona bukole bua disama ne kukeba tshia kuenza.
▪ Diangata manga: Pawikala ne masama kampanda, ulue ne manga ebe bungi bukumbane, bualu kabakuikala nawu mu mpungilu to. Bintu bu mudi nshingi ya bena disama dia diabete, nuyele muaba muimpe, kanuyedi muaba udibu bimansha bintu bia butshiafu bikuabu to, bualu idi mua kutapa bantu.
▪ Dikuata foto: Paudi ukuata foto dîba ditudi munkatshi mua mpungilu, kutemeshi midilu anyi flashe to. Kubikidi bakuatshi ba foto ba pambelu bua kulua kuyikuata muaba wa mpungilu to. Wewe mumone bena pambelu aba bakeba kukuatangana foto muaba wa mpungilu, kubalombi bua kukukuatabu pebe to.—Yone 2:13-17.
▪ Formilere ya Veuillez suivre l’intérêt (S-43): Tshikondo tshia mpungilu, padi muntu uleja dijinga dia kumanya malu makuabu, tuenzayi mudimu ne formilere wa S-43. Bamanyishi balue ne formilere mikese muaba udi mpungilu wenzekela. Paudi umuwuja, uye kumushiya ku Tshibambalu tshidi tshitangila malu a mikanda anyi kudi sekretere wa tshisumbu tshienu panuapingana mu tshisumbu.—Tangila Mudimu wetu wa Bukalenge wa ngondo 5/2011, dibeji 3.
▪ Restoran: Paudi uya bua kudia mu restoran, wikale ne ngikadilu mimpe. Bilondeshile muaba unudi, udi mua kushila muena mudimu makuta adi ashala.
▪ Miaba itudi batudile: 1) Kanusombi anyi kanuladi mu nzubu bantu bungi bupite budi muntu udi munuakidile munuanyishile to. 2) Wewe mumone ne: kuakuya muaba uuvua mulombe bua kutudila, umanyishe kumpala kua dîba. 3) Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge, bua bakuleje tshia kuenza. 4) Bobu batuanyishile bua kuenza tshintu, katunekeshi to. Enza malu ne nkatshinkatshi. 5) Batendeledi ba Nzambi bonso badi ne bua kuikala ne mankenda. Dituku dionso, ikala ushiya muaba uuvua mulale ne mankenda, mulongolola kabidi bimpe. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda. 6) Uleje muanetu udi munuakidile anyi bana betu bakuabu banudi nabu muaba umue ngikadilu ya dimuma dia nyuma wa Nzambi.—Gal. 5:22, 23.
▪ Mudimu wa badisuile: Muntu yonso udi musue kuenza midimu eyi, udi mua kuya ku Tshibambalu tshia badisuile. Bana badi ne bidimu muinshi mua 16 badi pabu mua kuenza mudimu eu ne diambuluisha dia baledi babu anyi muntu mukole udi baledi babu banyishe.
[Kazubu mu dibeji 6]
Mushindu utuabanya mabeji a kubikila nawu bantu
Bua kumona mua kuyisha mu teritware yonso mujima, mbimpe tuakule mêyi makese. Tudi mua kuamba ne: “Muoyo webe au! Tudi tuenda tuabanya mabeji aa pa buloba bujima bua kubikila bantu. Diebe dibeji ndiodi edi. Pawabala, neupete malu makuabu a bungi.” Ikala ne disanka. Panudi nuabanya mabeji aa mu Disambombo anyi mu Dia lumingu, nudi mua kupesha kabidi bantu bibejibeji pikalaku mushindu.