“Nuikale ne bikadilu bimpe munkatshi mua bisamba bikuabu”

1. Bua tshinyi bidi ne mushinga bua tuetu kuikala ne bikadilu bimpe mu mpungilu wetu wa distrike udi kumpala eku?

¹ Tutu tukoka ntema ya bantu mu tshikondo tshia mpungilu tshidimu tshionso, ke bualu kayi tudi ne bua kuikala ne bikadilu bimpe bidi bileja Nzambi utudi tutendelela. (Lew. 20:26) Bukalanga buetu, mvuadilu wetu ne tshimuenekelu tshietu bidi ne bua kuleja patoke ne: tudi bayidi balelela ba Kristo. Mmunyi mutudi mua ‘kuikala ne bikadilu bimpe munkatshi mua bisamba bikuabu’ ne kutumbisha Tatu wetu wa mu diulu patuabuela mu mpungilu wetu wa distrike anyi wa bantu bafume mu matunga a bungi udi kumpala eku?—1 Pet. 2:12.

2. Mpunga kayi utuikala nende bua kuleja buena Kristo buetu mu mpungilu wetu?

² Tuleje buena Kristo buetu: Dinanga ditudi tulejangana ne mushindu utudi tuenzela “bantu badi pambelu” malu mmushilangane kule ne kule ne lungenyi lua pa buloba ebu. (Kolos. 3:10; 4:5; 2 Tim. 3:1-5) Tudi ne bua kuikala ne bulenga, lutulu patudi tuyukila ne bena ku nzubu ya tshilala benyi ne ku restoran, nansha koku kujuke tshilumbu. Tudi kabidi ne bua kuleja bukalanga ne kanemu kudi bantu badi bambuluishangana miaba eyi.

3. Ntshinyi tshidibu balombe baledi bua kuenza? Bua tshinyi?

³ Baledi badi ne bua kutabalela bana babu bikole mu muaba wa mpungilu, mu restoran ne mu nzubu wa tshilala benyi. (Nsu. 29:15) Mamu mukuabu uvua wenza mudimu mu nzubu wa tshilala benyi wakambila bena dibaka bakuabu ne: “Tudi banunange nuenu Bantemu. Bena mu mêku enu ne bana benu badi ne bukalanga. Bantu bonso batudi tuenza nabu mudimu bavua bakula anu bua bualu buenu, ne tuvua tujinga bua nuikale nulua muaba eu mu Disambombo ne Dia lumingu dionso.”

4. Patudi pa muaba wa mpungilu, bua tshinyi tudi ne bua kutabalela tshimuenekelu tshietu?

⁴ Mvuadilu muimpe: Mvuadilu wetu mu tshikondo tshia mpungilu udi ne bua kuikala muimpe, kayi uleja mishindu ya mvuadilu ya pa buayi ya pa buloba ebu. (1 Tim. 2:9) Patudi tuya kukeba miaba ku nzubu wa tshilala benyi anyi patudi pambelu pa miaba eyi, peshi kumpala kua mpungilu anyi padiye ujika, tudi ne bua kuepuka bua kuikala ne tshimuenekelu tshibi anyi kuvuala buvualavi. Tudi kabidi ne bua kuikala ne disanka dia kuvuala kamanyinu ketu ka mpungilu, ne katuyi tumvua bundu bua kuyisha padi mpunga umueneka. Tshimuenekelu tshietu tshimpe ne bikadilu bietu bimpe patudi tubuela mu mpungilu wetu wa distrike wa tshidimu tshia 2014 nebikoke ntema ya bantu ba muoyo muimpe ku mukenji wa mu Bible udi ufila muoyo, ne nebisankishe kabidi Yehowa.—Sef. 3:17.

Malu a kuvuluka bua mpungilu wa distrike wa 2014

▪ Dîba: Programe neatuadije pa dîba dia 8:20 matuku onso asatu. Kadi bua mpungilu yenzeka mu bimenga binene ebi: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, yoyi neyikale ituadija pa dîba dia 9:20. Mu bimenga bikese, bantu nebabange kubuela muaba wa mpungilu mu 7:00, mu bimenga binene mu 8:00. Padibu bamba ne: mizike ikadi pa kubanga, tuetu bonso tuye bua kusomba pa miaba yetu bua mpungilu kutuadijaye bimpe. Mu bimenga bikese, mu Ditanu ne mu Disambombo, mpungilu neajike mu 15:55; kadi mu Dia lumingu, neajike mu 14:40. Mu bimenga binene, mu Ditanu ne mu Disambombo, neajike mu 16:55; kadi mu Dia lumingu, neajike mu 15:40.

▪ Dikuatshila miaba ya kusomba: Anu bantu badi ku nzubu kuenu anyi banudi benze nabu luendu pamue peshi baudi ulonga nabu Bible ke baudi mua kukuatshila muaba.

▪ Biakudia bia mu midi: Tudi tunulomba bua kulua ne biakudia bungi bukumbanyine kadi bidi mua kudisha mubidi, bu mudi: mampa, mikata, bimuma (bibote), tumbele, bitumbula anyi tuto. Bua kuepuka njiwu, panudi nulua ne bintu bu mudi mâyi, kafe anyi tshiayi, nubiele mu bintu bidi kabiyi mua kutayika to. Mbakandike bua kulua ne maluvu adi akuatangana mu mpungilu. Tuetu balue ne bietu biakudia anyi bietu bia kunua, katuakukeba bua kusumba bintu kudi badi babipanyisha muaba wa mpungilu to. Kuepuka basumbishi ba bintu aba ndilongesha dinene, kudi kuleja mutudi ne mankenda. (Numanye ne: Bapanyi ba bintu bia kudia kabena ne bua kubuela nabi muaba udi mpungilu wenzekela to, nansha kakese.—Yone 2:13-17).

▪ Mankenda: Bitu bimueneka ne: bana betu batu baya kusumbila biakudia muaba wa mpungilu ke batu bimansha bintu bu mudi: mabeji, tubudimbu, tutotola ne bintu bikuabu. Muntu yeye musumbe biakudia kudi basumbishi ba bintu (bu mudi bonbon, biskui, tuto, makopo a misanyi anyi bintu bikuabu), udi ne bua kuya kuela tubudimbu ne mabeji anyi bizubu bia bintu ebi muaba udibu babilongoluele bua kubiela, pamutu pa kubiela panshi. Kadi tuetu bamone muntu muele bintu bu mudi tubudimbu anyi mabeji panshi, tubiangule, tubiele mu tshintu tshia kuela bintu bia butshiafu. Bana betu, bu nuenu mua kusua, tuenzayi muetu muonso bua kulamaku muaba utudi tuenzela mpungilu ne kumpenga kuawu kuonso ne mankenda. Mankenda ntshilumbu tshia muntu yonso udi ubuela mu mpungilu. Muntu yonso yeye muikale uditatshisha bua mankenda nunku, dituku dionso ku ndekelu kua mpungilu muaba utudi tumuenzela newikale ushala amu ne mankenda. Tudi basue kuleja ne: tudi ne ngikadilu ya buena ya Nzambi wa tshijila utudi tutendelela.—1 Pet. 1:15, 16; Ekes. 19:10; Dut. 23:14.

▪ Mapa: Bua kuleja dianyisha dietu bua malu onso adibu balongolole bua mpungilu, tuikalaku tuela makuta mu tushete tua mapa a mudimu wa pa buloba bujima tua ku Nzubu wetu wa Bukalenge anyi tudi muaba udi mpungilu wenzekela. Muntu yeye muele sheke wa makuta bu dipa mu mpungilu, udi ne bua kufundapu “Association ‘Les Témoins de Jéhovah’” bu muntu udiye upesha makuta au.

▪ Njiwu ne masama a tshimpitshimpi: Padi bualu bua disama dia tshimpitshimpi bumueneka dîba ditudi mu mpungilu, bikila muanetu wa ku bakididianganyi udi pabuipi nebe bua amanyishe diakamue bena Tshibambalu tshia diondopangana; dîba adi bana betu badi mu tshibambalu atshi badi mua kuteta kumona bukole bua disama ne kukeba tshia kuenza.

▪ Diangata manga: Pawikala ne masama kampanda, ulue ne manga ebe bungi bukumbane, bualu kabakuikala nawu mu mpungilu to. Bintu bu mudi nshingi ya bena disama dia diabete, nuyele muaba muimpe, kanuyedi muaba udibu bimansha bintu bia butshiafu bikuabu to, bualu idi mua kutapa bantu.

▪ Dikuata foto: Paudi ukuata foto dîba ditudi munkatshi mua mpungilu, kutemeshi flashe to. Kubikidi bakuatshi ba foto ba pambelu bua kulua kuyikuata muaba wa mpungilu to. Wewe mumone bena pambelu aba bakeba kukuatangana foto muaba wa mpungilu, kubalombi bua kukukuatabu pebe to.—Yone 2:13-17.

▪ Formilere ya Veuillez suivre l’intérêt (S-43): Tshikondo tshia mpungilu, padi muntu uleja dijinga dia kumanya malu makuabu, tuenzayi mudimu ne formilere wa S-43. Paudi umuwuja, uye kumushiya ku Tshibambalu tshidi tshitangila malu a mikanda anyi kudi sekretere wa tshisumbu tshienu panuapingana mu tshisumbu.

▪ Restoran: Paudi uya bua kudia mu restoran, wikale ne ngikadilu mimpe. Uvuala mu mushindu udi uleja ne: udi muena Kristo. Bilondeshile tshilele tshia muaba unudi, udi mua kushila muena mudimu makuta adi ashala.

▪ Miaba itudi batudile:

Kanusombi anyi kanuladi mu nzubu bantu bungi bupite budi muntu udi munuakidile munuanyishile to.
Wewe mumone ne: kuakuya muaba uuvua mulombe bua kutudila, umanyishe kumpala kua dîba.
Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge, bua bakuleje tshia kuenza.
Bobu batuanyishile bua kuenza tshintu, katunekeshi to. Enza malu ne nkatshinkatshi.
Batendeledi ba Nzambi bonso badi ne bua kuikala ne mankenda. Dituku dionso, ikala ushiya muaba uuvua mulale ne mankenda, mulongolola kabidi bimpe. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda.
Uleje muanetu udi munuakidile anyi bana betu bakuabu banudi nabu muaba umue ngikadilu ya dimuma dia nyuma wa Nzambi.—Gal. 5:22, 23.

▪ Mudimu wa bena budisuile: Muntu yonso udi musue kuenza midimu eyi, udi mua kuya ku Tshibambalu tshia bena budisuile. Bana badi ne bidimu muinshi mua 16 badi pabu mua kuenza mudimu eu ne diambuluisha dia baledi babu anyi muntu mukole udi baledi babu banyishe.