Malu a kuvuluka bua mpungilu
Dîba: Programe neatuadije pa dîba dia 8:20 matuku onso asatu. Kadi bua mpungilu yenzeka mu bimenga binene ebi: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, yoyi neyikale ituadija pa dîba dia 9:20. Mu bimenga bikese, bantu nebabange kubuela muaba wa mpungilu mu 7:00, mu bimenga binene mu 8:00. Padibu bamba ne: mizike ikadi pa kubanga, tuetu bonso tuye bua kusomba pa miaba yetu bua mpungilu kutuadijaye bimpe. Mu bimenga bikese, mu Ditanu ne mu Disambombo, mpungilu neajike mu 15:55; kadi mu Dia lumingu, neajike mu 14:40. Mu bimenga binene, mu Ditanu ne mu Disambombo, neajike mu 16:55; kadi mu Dia lumingu, neajike mu 15:40.
‘Tutumbishayi Yehowa ne misambu’: Katshia ku kale batendeledi ba Nzambi bavua batumbisha Yehowa ne misambu. Lelu eu misambu itshidi anu tshitupa tshinene tshia ntendelelu mulelela. (Mus. 28:7) Tshitupa tshionso tshia mpungilu wetu wa rejon tshidi tshituadija ne mizike. Ki mmizike mimpe patupu to, kadi mmilongolola bua tumone mua kulonga malu a Yehowa ne kumutendelela. Nanku, padi mulombodi umanyisha ne: mizike ikadi pa kutuadija, ke tshikondo tshia tuetu kusomba ne kuteleja mizike ayi ne dianyisha. Tuetu benze nanku, tudi tuleja dianyisha kudi bana betu ba mu tshisumbu tshia bimbi ba misambu tshia bulongolodi buetu. Misangu ibidi ku tshidimu bana betu ba balume ne ba bakaji aba badi batula makuta abu bobu nkayabu bua kuya ku Patterson, mu New York bua kutuimbila misambu mimpe eyi. Panyima pa bamane kuteleja mizike ya mbangilu eyi, muntu yonso udi mua kutumbisha pende Yehowa padiye wimba misambu yetu ya Bukalenge.
Dikuatshila miaba ya kusomba: Anu bantu badi ku nzubu kuenu anyi banudi benze nabu luendu pamue peshi baudi ulonga nabu Bible ke baudi mua kukuatshila muaba.
Mvuadilu muimpe: Mvuadilu wetu mu tshikondo tshia mpungilu udi ne bua kuikala muimpe, kayi uleja mishindu ya mvuadilu ya pa buayi ya pa buloba ebu. (1 Tim. 2:9) Patudi tuya kukeba miaba ku nzubu wa tshilala benyi anyi patudi pambelu pa miaba eyi, peshi kumpala kua mpungilu anyi padiye ujika, tudi ne bua kuepuka bua kuikala ne tshimuenekelu tshibi anyi kuvuala buvualavi. Tudi kabidi ne bua kuikala ne disanka dia kuvuala kamanyinu ketu ka mpungilu, ne katuyi tumvua bundu bua kuyisha padi mpunga umueneka. Tshimuenekelu tshietu tshimpe ne bikadilu bietu bimpe patudi tubuela mu mpungilu udi kumpala eku nebikoke ntema ya bantu ba muoyo muimpe ku mukenji wa mu Bible udi ufila muoyo, ne nebisankishe kabidi Yehowa.—Sef. 3:17.
Tuikale ne bukalanga patudi tuenza mudimu ne biamu bietu: Tudi tuleja mutudi ne bukalanga padi mpungilu wenda wenzeka patudi tuteka telefone wetu anyi biamu bietu bikuabu mu mushindu udibi kabiyi mua kunyanga ntema ya bakuabu. Wewe ne kamera, tshiamu tshia foto, tablete anyi tshiamu tshikuabu, udi mua kuleja bakuabu bukalanga, kubenga kunyanga ntema yabu anyi kubajika bua kabamonyi. Tudi kabidi tuleja bukalanga patudi katuyi tufundilangana mesaje kakuyi bualu padi mpungilu wenda wenzeka. Kubikidi bakuatshi ba foto ba pambelu bua kulua kuyikuata muaba wa mpungilu to. Wewe mumone bena pambelu aba bakeba kukuatangana foto muaba wa mpungilu, kubalombi bua kukukuatabu pebe to.—Yone 2:13-17.
Biakudia bia mu midi: Tudi tunulomba bua kulua ne biakudia bungi bukumbanyine kadi bidi mua kudisha mubidi, bu mudi: mampa, mikata, bimuma (bibote), tumbele, bitumbula anyi tuto. Bua kuepuka njiwu, panudi nulua ne bintu bu mudi mâyi, kafe anyi tshiayi, nubiele mu bintu bidi kabiyi mua kutayika to. Mbakandike bua kulua ne maluvu adi akuatangana mu mpungilu. Tuetu balue ne bietu biakudia anyi bietu bia kunua, katuakukeba bua kusumba bintu kudi badi babipanyisha muaba wa mpungilu to. Kuepuka basumbishi ba bintu aba ndilongesha dinene, kudi kuleja mutudi ne mankenda. (Numanye ne: Bapanyi ba bintu bia kudia kabena ne bua kubuela nabi muaba udi mpungilu wenzekela to, nansha kakese.—Yone 2:13-17).
Mapa: Bua kuleja dianyisha dietu bua malu onso adibu balongolole bua mpungilu, tuikalaku tuela makuta mu tushete tua mapa a mudimu wa pa buloba bujima tua ku Nzubu wetu wa Bukalenge anyi tudi muaba udi mpungilu wenzekela. Muntu yeye muele sheke wa makuta bu dipa mu mpungilu, udi ne bua kufundapu “Association ‘Les Témoins de Jéhovah’” bu muntu udiye upesha makuta au.
Diangata manga: Pawikala ne masama kampanda, ulue ne manga ebe bungi bukumbane, bualu kabakuikala nawu mu mpungilu to. Bintu bu mudi nshingi ya bena disama dia diabete, nuyele muaba muimpe, kanuyedi muaba udibu bimansha bintu bia butshiafu bikuabu to, bualu idi mua kutapa bantu.
Njiwu ne masama a tshimpitshimpi: Padi bualu bua disama dia tshimpitshimpi bumueneka dîba ditudi mu mpungilu, bikila muanetu wa ku bakididianganyi udi pabuipi nebe bua amanyishe diakamue bena Tshibambalu tshia diondopangana; dîba adi bana betu badi mu tshibambalu atshi badi mua kuteta kumona bukole bua disama ne kukeba tshia kuenza.
Formilere ya Veuillez suivre l’intérêt (S-43): Tshikondo tshia mpungilu, padi muntu uleja dijinga dia kumanya malu makuabu, tuenzayi mudimu ne formilere wa S-43. Paudi umuwuja, uye kumushiya ku Tshibambalu tshidi tshitangila malu a mikanda anyi kudi sekretere wa tshisumbu tshienu panuapingana mu tshisumbu.
Restoran: Wikale ne ngikadilu mimpe bua kutumbisha dîna dia Yehowa paudi uya bua kudia mu restoran. Uvuale mu mushindu udi uleja ne: udi muena Kristo. Bilondeshile tshilele tshia muaba unudi, udi mua kupesha muena mudimu tumakuta bua kumuela tuasakidila.
Miaba itudi batudile:
Kanusombi anyi kanuladi mu nzubu bantu bungi bupite budi muntu udi munuakidile munuanyishile to.
Wewe mumone ne: kuakuya muaba uuvua mulombe bua kutudila, umanyishe kumpala kua dîba.
Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge, bua bakuleje tshia kuenza.
Bobu batuanyishile bua kuenza bualu kampanda, katunekeshi to. Enza malu ne nkatshinkatshi.
Dituku dionso, ikala ushiya muaba uuvua mulale ne mankenda, mulongolola kabidi bimpe. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda.
Uleje muanetu udi munuakidile anyi bana betu bakuabu banudi nabu muaba umue ngikadilu ya dimuma dia nyuma wa Nzambi.—Gal. 5:22, 23.
Mudimu wa bena budisuile: Muntu yonso udi musue kuenza midimu eyi, udi mua kuya ku Tshibambalu tshia bena budisuile. Bana badi ne bidimu muinshi mua 16 badi pabu mua kuenza mudimu eu ne diambuluisha dia baledi babu anyi muntu mukole udi baledi babu banyishe.