Ubikile bantu

1. Ndîba kayi dituatuadija kubikila bantu mu mpungilu?

¹ Wewe ulongoluela balunda bebe anyi bena mu dîku diebe tshiakudia tshia pa buatshi tshidi tshikulomba bua kudienzeja ne kutula makuta a bungi bua kutshilamba, newikale ne disanka bua kubabikila ku didia edi. Bia muomumue, tudi badienzeje bua kulongolola biakudia bia mu nyuma bikalabu mua kufila mu mpungilu wetu udi kumpala eku. Mbingu isatu kumpala kua mpungilu kutuadijaye, Yehowa udi utupesha diakalenga dia kubikila bantu bua balue kubuelamu. Ntshinyi tshiatuambuluisha bua kufila mabeji a dibikila nawu bantu ne disanka?

2. Ntshinyi tshiatusaka bua kudifila bikole mu mudimu wa diabanya mabeji a dibikila nawu bantu?

² Tuetu tuelangana meji ne dianyisha dionso bua masanka atudi tupeta adi afumina ku biakudia bia mu nyuma bidi Yehowa utupesha mu mpungilu yetu, netudifile bikole mu mudimu eu. (Yesh. 65:13, 14) Tudi ne bua kuvuluka kabidi ne: diabanya dia mabeji a dibikila nawu bantu ditutu tuenza ku tshidimu tshionso didi dipatula bipeta bimpe. (Bala kazubu ka “Didi dipatula bipeta bimpe.”) Bamue bantu batudi tubikila nebalue kubuela netu mu mpungilu bakuabu kabakulua to. Kadi nansha bantu ba bungi kabayi balue kuitaba ku dibikila dietu, didifila dietu ne muoyo mujima mu tshikondo tshia diabanya mabeji a dibikila neditumbishishe Yehowa ne nedileje luse luende.—Mus. 145:3, 7; Buak. 22:17.

3. Mmunyi mutuikala mua kuabanya mabeji a dibikila nawu bantu?

³ Kasumbu ka bakulu konso kadi ne bua kuleja mudi bena mu tshisumbu mua kuabanya mabeji a dibikila, kuleja kabidi tshidibu mua kuenza bua bantu badi kabayi ku nzubu yabu anyi mushindu udibu mua kuafila muaba udi bantu ba bungi mu teritware wabu. Mu Disambombo dionso patudi tuabanya mabeji aa, koku mushindu netufile kabidi bibejibeji. Patudi tujikija diabanya dia mabeji edi, netuikale ne disanka dia bungi bua kumona ne: tuvua badifile ne muoyo mujima ne tuvua babikile bantu ba bungi bua kulua kudia netu biakudia bia mu nyuma bidi Yehowa mulongolole.

Didi dipatula bipeta bimpe

Kukadi bidimu ndambu, muanetu wa bakaji kampanda uvua wenza kampanye bua kubikila bantu, uvua udiebeja bikala malu onso avuaye wenza bua kubikila bantu mikale ne mushinga. Wakadiebeja ne: ‘Bantu nebitabe bua kulua kubuela netu mu mpungilu anyi?’ Mu Disambombo mu dinda dituku dia mpungilu, wakamona nsongalume kampanda wa mu tshitendelelu tshia Sikh musombe pabuipi nende, ke yeye kukeba bua kuyukila nende. Biakamueneka ne: uvua mulue mu mpungilu au bualu uvua mupete dibeji dia dibikila. Wakela muanetu wa bakaji au nkonko ne yeye kumuandamuna. Wakamba muvuaye muanyishe malu avuabu balongeshe ne wakakema bua mvuadilu ne bikadilu bia bantu bavua balue mu mpungilu. Pashishe dituku dimue dimue adi, muanetu wa bakaji eu wakatuadija kuyukila ne bena dibaka kampanda bavua basombe pabuipi nende. Bavua pabu bapete dibeji dia dibikila ne bavua balue mu mpungilu ku bise. Bavua banyishe mpungilu bikole ne bavua balongolole bua kulua kabidi mu Dia lumingu. Ke muanetu wa bakaji au kumonaye ne: mudimu wetu wa kubikila bantu mu mpungilu udi ne mushinga wa bungi.
Mu mpungilu udi muenzeke matuku abidi aa, mulume kampanda ne mukajende badi bampanda-njila bakayukila ne bena dibaka kampanda bakavua bakulakaje. Bakabambila ne: uvua musangu wabu wa kumpala wa kulua mu mpungilu. Bampanda-njila abu bakabebeja ne: “Uvua munubikile nnganyi?” Bakandamuna ne: “Dituku kampanda patuvua bapingane kumbelu, tuvua basangane dibeji dia dibikila muinshi mua tshiibi.” Bakabala dibeji dia dibikila ne kuujabu muaba uvua panyima padi. Bantu bakuabu bavua mu mpungilu au bakadia biakudia ne bena dibaka abu. Bakanyisha bikole malu avuabu balongeshe, ke bobu kulongolola bua kulua dituku divua dilonda. Bakalongolola bua kuya kubatangila ne kukolesha dijinga diabu.