Dibikila dia pa buadi
1. Ndîba kayi dituatuadija kubikila bantu mu mpungilu wa 2014?
1 Wewe ulongoluela balunda bebe anyi bena mu dîku diebe tshiakudia tshia pa buatshi tshidi tshikulomba bua kudienzeja ne kutula makuta a bungi bua kutshilamba, newikale ne disanka bua kubabikila ku didia edi. Bia muomumue, tudi badienzeje bua kulongolola biakudia bia mu nyuma bikalabu mua kufila mu mpungilu wetu wa distrike wa 2014 ne mu mpungilu ya bantu bafume mu matunga a bungi. Mbingu isatu kumpala kua mpungilu wetu kutuadijaye, netuikale ne diakalenga dia kubikila bantu bua balue kubuela pabu mu mpungilu eu. Ntshinyi tshiatuambuluisha bua kufila mabeji a dibikila nawu bantu ne disanka?
2. Ntshinyi tshiatusaka bua kudifila bikole mu mudimu wa diabanya mabeji a dibikila nawu bantu?
2 Tuetu tuelangana meji ne dianyisha dionso bua masanka atudi tupeta adi afumina ku biakudia bia mu nyuma bidi Yehowa utupesha mu mpungilu yetu, netudifile bikole mu mudimu eu. (Yesh. 65:13, 14) Tudi ne bua kuvuluka kabidi ne: diabanya dia mabeji a dibikila nawu bantu ditutu tuenza ku tshidimu tshionso didi dipatula bipeta bimpe. Bamue bantu batudi tubikila nebalue kubuela netu mu mpungilu. Kadi nansha bantu ba bungi kabayi balue kuitaba ku dibikila dietu, didifila dietu ne muoyo mujima mu tshikondo tshia diabanya mabeji a dibikila neditumbishishe Yehowa ne nedileje luse luende.—Mus. 145:3, 7; Buak. 22:17.
3. Mmunyi mutuikale mua kuabanya mabeji a dibikila nawu bantu?
3 Bakulu badi ne bua kuleja mudi bena mu tshisumbu mua kuabanya mabeji a dibikila nawu bantu, ne kuleja kabidi tshidibu mua kuenza bua bantu badi kabayi ku nzubu yabu anyi mushindu udibu mua kuafila muaba udi bantu ba bungi bunguila mu teritware wabu. Mu Disambombo dionso dia tshikondo tshia diabanya mabeji aa, koku mushindu netufile kabidi bibejibeji. Kadi Disambombo dia kumpala dia ngondo diodi dikumbane mu tshikondo tshia diabanya mabeji aa, nutambe kuakula bua diabanya dia mabeji a kubikila nawu bantu pamutu pa kuimanyina pa dikeba bantu ba kulonga nabu Bible. Patudi tujikija diabanya dia mabeji edi, netuikale ne disanka dia bungi bua kumona ne: tuvua badifile ne muoyo mujima ne tuvua babikile bantu ba bungi bua kulua kudia netu biakudia bia mu nyuma bidi Yehowa mulongolole!