‘Usangishe bantu’
1. Mpungilu ya distrike ne ya bantu bafume mu matunga a bungi mmifuanangane ku tshinyi ne disangisha dinene divua bena Isalele benze katupa kîpi bobu bamane kupatuka mu Ejipitu?
1 Matuku makese bena Isalele bamane kupatuka mu Ejipitu, Yehowa wakambila Mose bua ‘asangishe bantu’ ku Mukuna wa Sinai bua kumvuabu dîyi dia Yehowa, bua bamutshine ne bua balongeshe bana babu njila yende. (Dut. 4:10-13) Bulelela, kadivua dituku dia kupua muoyo to! Divua dituku divua dikolesha ditabuja dia bantu! Mu ngondo mikese emu, bantu ba Yehowa nebadisangishe mu mpungilu ya distrike ne ya bantu bafume mu matunga a bungi bua Yehowa abalongeshe. Tudi mua kuenza tshinyi bua mpungilu eyi kutuambuluisha bikole?
2. Ntshinyi tshitudi ne bua kuenza bua ‘kudilongolola’ bua mpungilu wetu?
2 ‘Udilongolole’: Yehowa wakambila bena Isalele bua “badilongolole” bua tshibilu tshinene tshivuabu benze ku Mukuna wa Sinai atshi. (Ekes. 19:10, 11) Bia muomumue, bantu bonso badi ne bua kudilongolola bimpe bua kubuela mu mpungilu too ne bana betu badi ne midimu ya kuenzamu. Tshilejilu, bantu ba bungi nebikale dijinga ne kulomba bamfumu babu ba mudimu. Pamuapa nsombelu webe udi mua kupetangana ne wa Nehemiya. Uvua musue kulekela mudimu wende wa kuikala kuelela mukalenge Atashasete mvinyo mu dikopo bua kuya ku Yelushalema ne kuambuluisha bua kuibakabu bimanu bia Yelushalema, kadi uvua mumanye ne: mukalenge kakuanyisha to. Nehemiya wakasambila ne pashishe kuyaye ne dikima kudi mukalenge bua kuenza dilomba diende ne dîyi dimpe. Mukalenge wakamuanyishila bua kuyaye ne kumupeshaye bimue bintu bivua mua kubambuluisha bua kujikija mudimu au! (Neh. 2:1-9) Pa kumbusha dilomba dikisha ku mudimu, ukadiku mudilongolole bua luendu ne bua muaba wa kutudila anyi? Bakulu nebikale ne disanka dia kuambuluisha muanetu yonso udi dijinga ne diambuluisha. Dilongolola bua kufika kumpala kua tshitupa tshionso kutuadija ne ikala mudiakaje bua ‘kutamba kuteleja’ malu onso ikalabu mua kulongesha.—Eb. 2:1.
3. Ntshinyi tshidi mua kutuambuluisha bua kulongolola mioyo yetu bua mpungilu?
3 Bualu bukuabu budi ne mushinga mu didilongolola dietu nkuakaja muoyo wetu bua kuteleja ne kulonga. (Eze 7:10) Nebele kumpala kua dîba mu adrese wetu wa jw.org programe wa mpungilu ne biena-bualu bionso bia muyuki ne mvese umue anyi ibidi ya nshindamenu. Tudi mua kuangata malu aa ne kuakonkonona mu Ntendelelu wa mu dîku mu mbingu ya kumpala kua mpungilu utuikala mua kubuela. Bamue bamanyishi batu bapatula programe eu ne benza nende mudimu bua kufunda malu makese adi ne mushinga mu tshikondo tshia mpungilu.
4. Mmunyi mudi baledi mua kuenza mudimu ne malu a mu mpungilu bua kulongesha bana babu?
4 ‘Longesha bana bebe’: Tshimue tshia ku bipatshila tshivua bena Isalele benzele mpungilu ku Mukuna wa Sinai tshivua bua baledi bena Isalele “balongeshe bana babu.” (Dut. 4:10) Mpungilu udi upesha baledi mpunga muimpe wa kuenza bia muomumue. Baledi badi ne bua kusomba ne bana babu ku luseke luabu mu tshikondo tshia mpungilu ne kubambuluisha bua bikale ne ntema. Ku ndekelu kua programe wa dituku dionso ne mu tshikondo tshia ntendelelu wa mu dîku, bena mu dîku badi mua kuyukila pamue bua malu a mu mpungilu.
5. Mmasanka kayi atuapeta tuetu babuele mu mpungilu wetu udi kumpala eku?
5 Mpungilu munene uvua muenzeke ku Mukuna wa Sinai wakambuluisha bena Isalele bua kuanyishabu diakalenga dia pa buadi divuabu nadi dia kuikala bantu ba Nzambi. (Dut. 4:7, 8) Mpungilu wetu utuikala mua kuenza matuku kumpala eku, mmuenza pende bua kutuambuluisha mu mushindu wa muomumue. Mu matuku asatu a mpungilu eu, netuikale bakumbane bua kuikala kule ne bulongolodi bubi bua Satana ebu ne kuikala ne disanka dia kukankamijangana ne kukoleshangana ne bana betu mu mparadizu wetu wa mu nyuma. (Yesh. 35:7-9) Bu mudi dituku dia Yehowa dienda disemena pabuipi, tudi ne bua kuenza muetu muonso bua kubenga kupangila diakalenga ditudi nadi dia kudisangisha ne bana betu bua kukoleshangana nabu!—Eb. 10:24, 25.