Tuanyishayi masangila a bena nkristo

“Tukenketanganayi bua kusakangana ku dinanga ne ku midimu milenga, katuyi tulekela disangila dietu pamue.”​—EBELU 10:24, 25, NW.

1, 2. (a) Bua tshinyi ndiakalenga bua kubuela mu disangila dia bena nkristo balelela? (b) Mmu ngumvuilu kayi mudi Yezu muikale mu masangila a balondi bende?

NDIAKALENGA kayipu dia kubuela mu disangila dia bena nkristo, nansha diodi dienza ne bantu bashadile ku dikumi anyi ne binunu bivule bia batendeledi ba Yehowa, bualu Yezu wakamba ne: “Ndi bianyi munkatshi mua bantu babidi anyi basatu badi badisangisha mu dina dianyi”! (Matayo 18:20) Mu bulelela, pavuaye wenza dilaya adi, Yezu uvua wakula malu a dikosa bilumbu avuabu ne bua kujikija mu mushindu mujalame kudi aba badi balombola tshisumbu. (Matayo 18:15-19) Kadi tudiku kabidi mua kutumika ne mêyi a Yezu bua masangila onso a bena nkristo adibu batuadija ne bajikija ne disambila mu dîna diende anyi? Eyowa. Vuluka ne: pavua Yezu mutume balondi bende bua kuenza mudimu wa divuija bantu bayidi, wakalaya ne: ‘Monayi, ndi nenu matuku onso too ne ku nshikidilu kua tshikondo etshi.’​—Matayo 28:20.

² Kakuena mua kuikala mpata bua se: Mfumu wa tshisumbu tshia Buena-nkristo, Mfumu Yezu Kristo, udi utabalela bikole masangila onso a balondi bende ba lulamatu. Kabidi, tudi mua kuikala bashindike ne: udi nabu ku diambuluisha dia spiritu munsantu wa Nzambi. (Bienzedi 2:33; Buakabuluibua 5:6) Yehowa Nzambi udi pende utabalela disangila dietu pamue. Tshipatshila tshia kumpala tshia bisangilu bu ebi ntshia kusamuna Nzambi “munkatshi mua bantu.” (Musambo 26:12, MMM) Dibuela dietu mu bisangilu bia tshisumbu ntshijadiki tshia dinanga dietu kudiye.

3. Mbua tubingila kayi tua mushinga butudi tuanyishila masangila a bena nkristo?

³ Kudi tubingila tukuabu tua mushinga tutudi tuanyishila masangila a bena nkristo. Kumpala kua kumbukaye pa buloba, Yezu Kristo wakateka bayidi bende bela manyi bua kuenza mudimu bu “mupika wa lulamatu ne wa budimu” mu difila biakudia bia mu nyuma mu tshikondo tshiakanyine kudi bena mu nzubu wa ditabuja. (Matayo 24:45, NW) Mushindu wa mushinga udi difila edi dia biakudia bia mu nyuma dienzeka nku diambuluisha dia bisangilu bia tshisumbu pamue ne masangila manene​—mpuilu ne mpungilu. Mfumu Yezu Kristo udi ulombola mupika wa lulamatu eu bua kufila mamanyisha a mushinga mukole mu masangila a nunku bua bonso badi basue kupanduka ku ndekelu wa ndongoluelu eu mubi ne kupeta muoyo mu bulongolodi bupiabupia ne buakane bua Nzambi.

4. ‘Ntshilele’ kayi tshia njiwu tshidibu batele mu Bible, ne ntshinyi tshiatuambuluisha bua kutshiepuka?

⁴ Pa nanku, muena nkristo nansha umue kêna mua kudipesha bukenji bua kudima tshilele tshia njiwu tshileja kudi mupostolo Paulo, wakafunda ne: “Tukenketanganayi bua kusakangana ku dinanga ne ku midimu milenga, katuyi tulekela disangila dietu pamue, anu bu mudi tshilele tshia bamue, kadi tukankamijanganayi, ne tutambe kuenza nunku bu munudi numona dituku dienda disemena pabuipi.” (Ebelu 10:24, 25, NW) Diela meji pa diakalenga ne masanka a dibuela mu masangila a bena nkristo nedituambuluishe bua kutua masangila bu aa nyama ku mikolo ne bulamatshi buonso ne muoyo mujima.

Bisangilu bidi bikolesha

5. (a) Mbuenzeji kayi budi ngakuilu wetu ne bua kuikala nabu mu bisangilu? (b) Bua tshinyi katuena ne bua kujingakana bua kubikila basankididi bua kubuela mu bisangilu?

⁵ Bu mudi bena nkristo basambila bua spiritu munsantu wa Yehowa kuenzaye mudimu mu bisangilu biabu, muntu yonso udi ubuelamu udi ne bua kudienzeja bua kuenza malu mu diumvuangana ne spiritu eu ne ‘kubenga kubungamija spiritu munsantu wa [“Nzambi,” NW].’ (Bena Efeze 4:30, Mukenji Mulenga) Pavua mupostolo Paulo mufunde mêyi aa menzeja ku spiritu, uvua wakula bua dikuata mudimu bimpe ne ngakuilu. Misangu yonso bitudi tuamba bidi ne bua kuikala bitumika nabi ‘bua kukolesha muntu ku muoyo pa bualu budiye nabu, ne bua kulengelela bantu badi babiteleja.’ (Bena Efeze 4:29, MMM) Ebi bidi nangananga ne mushinga mu masangila a bena nkristo. Mu mukanda wende mutumina bena Kolinto, Paulo wakela kashonyi pa se: bisangilu bidi ne bua kuikala bikolesha, bilongesha ne bikankamija. (1 Kolinto 14:5, 12, 19, 26, 31) Bonso badimu badi bapetela masanka ku bisangilu bu ebi, ne bapiabapia badi babuelamu kabidi, bine aba badi mua kukoma ne: “Bushuwa, [“Nzambi,” NW] udi munkatshi muenu.” (1 Bena Korente 14:25, MMM) Bua kabingila aka, katuena ne bua kujingakana bua kubikila basankididi bapiabapia bua basangile netu, bualu dienza nenku nedikoleshishe lukasa didiunda diabu.

6. Ng’amue malu kayi adi ambuluisha bua kuvuija tshisangilu muanda udi ukolesha?

⁶ Bonso badibu bapeshe miyuki, diela nkonko, anyi manaya a bilejilu mu tshisangilu kampanda tshia bena nkristo badi ne bua kuikala bashindike ne: ngakuilu wabu udi ukolesha ne udi mu diumvuangana ne Bible, Dîyi dia Nzambi difunda. Kusakidila ku diakula bimpe, tudi ne bua kuleja nyanji ne mpampakenu bidi mu diumvuangana ne bumuntu bua dinanga bua Nzambi ne bua Kristo. Bikala bonso badi benza midimu mibapesha mu ndongamu wa tshisangilu bamanye mua kuleja ‘mamuma a spiritu wa Nzambi’ bu mudi disanka, muoyo-mule ne ditabuja, nenku bonso badi babuelemu nebadiumvue bakolesha bushuwa.​—Galatia 5:22, 23, NW.

7. Mmunyi mudi aba bonso badi babuela mu bisangilu mua kuenza tshiabu tshitupa bua disangila dikale dikolesha?

⁷ Nansha mudibi se: anu bantu bakese ke badi mua kuikala ne midimu ya kuenza mu ndongamu wa bisangilu bia tshisumbu, bonso badi mua kuenza tshiabu tshitupa bua disangila dikale dikolesha. Misangu mivule kutu mpunga bua bateleji kuandamunabu nkonko. Ebi mbikondo bia tuetu kumanyisha patoke ditabuja dietu. (Lomo 10:9) Katuena ne bua kutumika nabi bu mpunga wa kuleja ngenyi yetu nkayetu, kuditambisha bua malu atudi benze anyi kutobolola muena kuitabuja netu kampanda. Abi kabiakubungamija spiritu wa Nzambi anyi? Bilumbu ne bena kuitabuja netu mbimpe kubijikija pa nkaya mu lungenyi lua dinanga. Bible udi wamba ne: ‘Nulejangane kalolo, nuikalangane ne mitshima ya luse, nulekelangane malu mabi enu bu muakanulekelela Nzambi malu mabi enu mu Kristo.’ (Efeso 4:32) Bushuwa, masangila a bena nkristo adi atupesha mpunga muimpe wa kutumikila mubelu eu mulenga. Bua kumona mua kuenza nanku, bavule batu bafika mu bisangilu kumpala kua dîba ne bashala mutantshi panyima pa biobi bimane kujika. Muanda eu udi kabidi wambuluisha basankididi bapiabapia, badi ne dijinga dia pa buadi dia kudiumvua bakidila bilenga. Nenku bena nkristo bonso badilambule badi ne mudimu wa kuenza mu divuija bisangilu muanda udi ukolesha pa ‘kukenketangana ne kusakangana ku dinanga ne ku midimu milenga.’

Udilongolole bimpe

8. (a) Mmadikolela kayi makanyine ka-lumbandi adi bamue benza bua kubuela mu bisangilu? (b) Ntshilejilu kayi tshidi Yehowa ufila bu mulami?

⁸ Nansha mudibi mua kuikala bipepele ndambu bua bamue kubuela mu masangila a bena nkristo, bua bakuabu bidi bilomba madikolela a munanunanu. Tshilejilu, mamu kampanda muena nkristo udi ne bua kuenza mudimu wa ku mubidi bua kupeta bintu bidi bikengedibua bua bena mu nzubu muende udi pa tshibidilu upingana kumbelu mupungile. Nenku udi pamu’apa ne bua kulamba biakudia ne kuambuluisha bua bana bende badilongolole bua tshisangilu. Bakuabu bena nkristo badi mua kuikala ne mitantshi mile ya kuenda bua kufika mu bisangilu, anyi badi mua kuikala belela mikalu kudi bulema anyi bukulakaje. Bushuwa, Yehowa Nzambi udi umvua nsombelu wa mubuedi yonso wa mu bisangilu udi ne lulamatu, anu mudi mulami wa dinanga ujingulula bintu bia pa buabi bidi mukoko wonso udi mu tshikumbi tshiende ukengela. Bible udi wamba ne: ‘[Yehowa] neadishe tshisumbu tshiende tshia mikoko bu mudi mulami wa mikoko uyidisha, neambule bana ba mikoko mu maboko ende, neabatuale mu tshiadi tshiende, ne nealombole mikoko idi imuamushila bana bitulu bitulu.’​—Yeshaya 40:11.

9, 10. Mmunyi mutudi mua kupetela masanka mavule ku bisangilu?

⁹ Aba badi ne bua kuenza madikolela mavule bua kumona mua kubuela mu bisangilu pa tshibidilu badi mua kuikala belela mikalu pa bidi bitangila bungi bua dîba didibu mua kupitshisha mu dilongolola malu a dikonkonona. Kuenda pamue ne ndongamu wa dibala dia Bible dia ku lumingu luonso kudi kuvuija dibuela mu Kalasa ka Mudimu wa Teokrasi bualu budi busankisha bikole. Bia muomumue, kudianjila kudilongolola bua bisangilu bikuabu, bu mudi Dilonga dia Tshibumba tshia Nsentedi ne Dilonga dia Mukanda dia Tshisumbu, kudi kuvuija bisangilu ebi bipeteshi bia masanka. Mu didianjila kubala malu a dilonga ne mu ditabalela nansha imue ya ku mvese mitela ya mu Bible, aba badi ne majitu a mu dîku adi angata dîba dia bungi nebatambe kuikala badiakaje bua kudifila tshishiki mu mayuki a mushinga aa a mu Bible.

¹⁰ Bakuabu, badi ne nsombelu idi ibapesha dîba dia bungi badi mua kupitshisha dîba divule mu dilongolola bisangilu. Tshilejilu, badi mua kuenza makebulula pa mifundu mitela patupu kadi mêyi kaayi mafunda. Nenku bonso badi mua kudilongolola bua kupetela masanka mavule ku bisangilu ne kudifila bilenga mu dikolesha tshisumbu ku diambuluisha dia miyuki ne nseka yabu. Mu dikala badilongolole bimpe, bakulu ne basadidi ba mudimu nebafile tshilejilu tshilenga mu difila mandamuna mîpi ne majalame. Bua kanemu ka ndongoluelu ya Yehowa, aba badi mu bisangilu nebepuke bibidilu bionso bidi bifila ditanaji munkatshi mua bisangilu.​—1 Petelo 5:3.

11. Bua tshinyi bidi bikengela didikanda bua kudilongolola bua bisangilu?

¹¹ Midimu ne manaya bidi kabiyi ne mushinga bua makanda etu a mu nyuma bidi mua kudia dîba dietu dia bungi. Bikalabi nanku, tudi ne bua kudikonkonona ne ‘kulekela dilua bapange butshintshikidi’ pa bidi bitangila ditumika ne dîba dietu. (Efeso 5:17, NW) Tshipatshila tshietu tshidi ne bua kuikala tshia ‘kudisumbila tshikondo’ mu malu a mushinga mukese bua kumona mua kupitshisha dîba dia bungi mu dilonga dia Bible dia pa nkaya ne mu dilongolola dia bisangilu, kabidi ne mu mudimu wa Bukalenge. (Efeso 5:16) Bushuwa, kabiena misangu yonso bipepele ne bidi bilomba didikanda. Bansonga badi bateyaku ntema badi basa tshishimikidi tshilenga bua didiunda dia matuku atshilualua. Paulo wakafundila nyanende nsonga mupuekele Timote ne: ‘Unanukile kuikala mu malu aa [mibelu ya Paulo mitumina Timote], udifile ne mutshima webe wonso kudiwu, bua kudiunda kuebe kumueneke kudi bonso.’​—1 Timote 4:15.

Bilejilu bia mu Dîyi dia Nzambi

12. Ntshilejilu kayi tshia pa buatshi tshivua dîku dia Samuele dishiye?

¹² Tangila tshilejilu tshilenga tshishiya kudi dîku dia Samuele, eu uvua pa tshibidilu mu malongolola menza bua kusangila ne batendeledi nende pavua tabernakle wa Nzambi usanganyibua ku Shilo. Anu balume ke bavua balombibue bua kuikala baya ku tshidimu tshionso mu misekelelu ya bibilu. Kadi tatuende wa Samuele, Elekana, uvua wangata dîku diende dijima ‘umuka ku musoko wende ku tshidimu ku tshidimu bua kutendelelaye ne bua kufilaye milambu kudi Yehowa wa misumba ku Shilo.’ (1 Samuele 1:3-5) Lamatayima-sofima, musoko wa Samuele, uvua pamu’apa pabuipi ne ku muelelu wa mâyi ku Rentis wa lelu mu tshibatabata tshia “mikuna ya Efelayima.” (1 Samuele 1:1) Nenku diya ku Shilo divua diumvuija luendu lua kilometre mitue ku 30, luvua luendu lua dipungi mu matuku au. Ke tshivua dîku dia Elekana dienza ne bulamatshi buonso ‘ku tshidimu ku tshidimu [pavuabu baya] ku nzubu wa Yehowa.’​—1 Samuele 1:7.

13. Ntshilejilu kayi tshivua bena Yuda ba lulamatu bashiye mu tshikondo tshivua Yezu pa buloba?

¹³ Yezu kabidi wakakolela mu dîku dinene. Tshidimu tshionso dîku diabu divua dienza luendu kumbukila ku Nazarete mutantshi wa kilometre bu 100 batangile ku Sud bua kubuela mu tshibilu tshia Kupita kua Yehowa mu Yeruzaleme. Kuvua njila ibidi ivuabu mua kuikala balonda. Njila mutambe kuikala wa tshikoso uvua ulomba kupueka mu Tshibandabanda tshia Megido ne kubanda mukuna wa metre matue ku 600 bua kupatukila mu teritware wa Samariya ne kubuela mu Yeruzaleme. Njila mukuabu mulonda kudi bantu ba bungi ng’eu wakalonda Yezu mu luendu luende lua ndekelu ku Yeruzaleme mu 33 B.B. Ebi biakamulomba bua kupuekela mu Tshibandabanda tshia Yordane mutangile muinshi muatshi too ne pakafikaye “ku mikalu ya buloba bua Yudaya . . . [kusabuka] musulu wa Yadene.” (Mako 10:1, Muamda Mulenga Lelu) Kumbukila muaba eu, “njila udi ubanda ku Yelushalema” udi mutantshi wa kilometre mitue ku 30, kuelamu ne mukuna wa metre mapite pa 1 100. (Mako 10:32, MML) Pa tshibidilu, misumba ya babuedi ba mu bibilu ba lulamatu ivua yenza luendu lua lutatu kumbukila ku Ngalileya too ne ku Yeruzaleme. (Luka 2:44) Ntshilejilu kayipu tshilenga bua basadidi ba Yehowa badi mu matunga mabanji lelu’eu, bavule ba kudibu badi mua kubuela mu masangila a bena nkristo mu mushindu mupepele ndambu ku diambuluisha dia mishindu ya tudiendelandela ya buena-lelu!

14, 15. (a) Ntshilejilu kayi tshiakashiya Ana? (b) Ntshinyi tshitudi mua kulongela ku mmuenenu mulenga muleja kudi bamue babuedi bapiabapia ba mu bisangilu?

¹⁴ Tshinga tshilejilu ntshia mukaji mukamba wa bidimu 84, dîna diende Ana. Bible udi wamba ne: “kavuaku upangika ku ntempelo.” (Luka 2:37, NW) Kabidi, Ana uvua uleja diditatshisha dia dinanga bua bakuabu. Utua anu mêsu umona Yezu mutshikale muana wa katoto ne umanya se: uvua Masiya mulaya, ntshinyi tshiakenzaye? Wakasakidila Nzambi ne kutuadija ‘kuambila bonso bakadi batekemene bupikudi bua Yeruzaleme bualu buende.’ (Luka 2:38) Eu udi bushuwa mmuenenu mulenga, ne tshitembelu bua bena nkristo lelu’eu.

¹⁵ Eyowa, dibuela ne difila mandamuna mu bisangilu bietu didi ne bua kuikala muanda wa disanka mu mushindu wa se: anu bu Ana, katuena basue kupangikamu. Bantu bapiabapia ba bungi badi mua kumvua dianyisha dia muomumue edi bua bisangilu. Bamane kupatuka mu mîdima ne babuele mu butoke bua Nzambi bua dikema, mbasue kulonga bionso bidibu mua kulonga, ne bavule badi baleja musangelu wa bungi bua bisangilu bia bena nkristo. Ku luseke lukuabu, aba bakadi ne matuku a bungi mu bulelela badi ne bua kudikuba ku ‘dilekela dinanga diabu dia kumudilu.’ (Buakabuluibua 2:4) Ntatu mikole ya ku mubidi anyi malu makuabu adi mapite muntu bukole adi ku misangu mua kukepesha dibuela dia muntu mu bisangilu. Kadi katuenaku ne bua kulekela dinanga dia bintu, dijikija lutetuku, anyi dipanga disankidila bitufikisha ku dikala babuedi ba mu bisangilu badi kabayi badilongolole, ba-kampuwa anyi batumpishi.​—Luka 8:14.

Tshilejilu tshitambe bulenga

16, 17. (a) Ntshinyi tshivua mmuenenu wa Yezu pa bidi bitangila masangila a mu nyuma? (b) Ntshilele kayi tshimpe tshidi bena nkristo bonso ne bua kuteta bua kulonda?

¹⁶ Yezu wakashiya tshilejilu tshia pa buatshi mu dileja dianyisha bua masangila a mu nyuma. Patshivuaye muana wa bidimu 12, wakaleja dinanga diende bua nzubu wa Nzambi mu Yeruzaleme. Baledi bende kabavua bamanye muaba uvuaye, kadi ndekelu wa bionso kumusanganabu mu ntempelo uyukila pa Dîyi dia Nzambi ne balongeshi. Mu diandamuna ku diditatshisha dia baledi bende, ne kanemu konso Yezu wakebeja ne: “Kanuakadi bamanye ne ndi ne bua kuikala mu nzubu wa Tatu wanyi, anyi?” (Luka 2:49, MML) Ne dikokela dionso, nsonga Yezu wakapingana ne baledi bende ku Nazarete. Kuine aku wakatungunuka ne kuleja dinanga diende bua bisangilu bia ntendelelu pa kubuela pa tshibidilu mu nsunagoga. Nenku, pakatuadijaye mudimu wende, Bible udi wamba ne: ‘Yeye wakalua ku Nazarete kuakakolelaye; wakabuela mu nsunagoga dituku dia [“nsabatu,” NW] bu muakadi tshilele tshiende, wakimana bua kubala mukanda.’ (Disendamija miaku ndietu.) Pashishe Yezu wakabala ne kumvuija Yeshaya 61:1, 2, bateleji bakatuadija ‘kukema bualu bua mêyi a luse akalopoka mukana muende.’​—Luka 4:16, 22.

¹⁷ Lelu’eu bisangilu bia bena nkristo bidi bilonda tshilejilu etshi tshia nshindamenu. Panyima pa bamane kutuadija tshisangilu ne musambu ne disambila, badi babala ne bumvuija mvese ya mu Bible (anyi mvese mitela mu malu a dilonga dia Bible). Bena nkristo balelela badi ne bua kuidikija tshilele tshimpe tshia Yezu Kristo. Bilondeshile mudi nsombelu wabu ubanyishila, badi bapeta disanka mu dibuela pa tshibidilu mu masangila a bena nkristo.

Bilejilu bia matuku etu aa

18, 19. Mbilejilu kayi bilenga bidi bana betu ba mu matunga mapele bafile pa bidi bitangila bisangilu, mpuilu ne mpungilu?

¹⁸ Mu bitupa bia buloba mudi bupele bua bungi, bavule ba ku bana betu balume ne bakaji badi bafila tshilejilu tshilenga tshia dianyisha masangila a bena nkristo. Mu ditunga dia Mozambique biakalomba mutangidi wa distrike, Orlando, ne mukajende Amélia, mêba 45 bua kuenda kilometre mitue ku 90 pa mukuna mule bua kulombola mpuilu kampanda. Pashishe bavua ne bua kuenza luendu lua muomumue mu dipingana bua kulombola mpuilu uvua ulonda. Ne budipope buonso Orlando wakamba ne: “Tuakumvua ne: katuvua benze tshintu nansha tshimue pa kufuanyikija ne bana betu ba mu tshisumbu tshia Bawa. Bua kubuela mu mpuilu ne kupingana ku mabu biakabalomba luendu lua matuku asambombo lua kilometre mitue ku 400 ku makasa, ne munkatshi muabu muvua muanetu wa balume wa bidimu 60!”

¹⁹ Tuambe tshinyi bua dianyisha bisangilu bia tshisumbu bia ku lumingu luonso? Kashwashwa Njamba mmuanetu wa bakaji muena butekete bua mubidi wa bidimu bipite pa 70. Mmusombele mu Kaisososi, musoko mukese udi mutantshi wa kilometre bu itanu kumbukila ku Nzubu wa Bukalenge udi mu musoko wa Rundu, mu ditunga dia Namibie. Bua kubuela mu bisangilu, udi wenza luendu lua diya ne dialukila lua kilometre 10 mu njila wa tshisuku. Bakadi babunde bakuabu bantu mu njila eu, kadi Kashwashwa udi anu ulua. Tshitupa tshinene tshia bisangilu tshidi tshienzeka mu miakulu idiye kayi umvua. Nenku mmunyi mudiye upeta dikuatshisha mu dibuelamu? Kashwashwa udi wamba ne: “Mu dilonda mifundu, ndi nteta bua kujingulula tshidi muyuki wakuila.” Kadi ki mmumanye mukanda, nenku mmunyi mudiye ulonda mifundu? Udi wandamuna ne: “Ndi nteya ditshi ku mifundu indi mumanye ku muoyo.” Ne munkatshi mua bidimu bivule, mmukuate ku muoyo ndambu muvumvuke wa mifundu. Bua kulengeja nzanzu yende ya ditumika ne Bible, udi ubuela mu kalasa ka dimanya kubala ne kufunda kalongolola kudi tshisumbu. Udi wamba ne: “Ndi munange kubuela mu bisangilu, misangu yonso mutu malu mapiamapia a kulonga. Ndi munange kusangila pamue ne bana betu balume ne bakaji. Nansha mundi tshiyi mua kuakula nabu bonso, misangu yonso batu balua ne bangela muoyo. Ne bualu budi ne mushinga mutambe, ndi mumanye se: mu dibuela mu bisangilu, ndi nsankisha mutshima wa Yehowa.”

20. Bua tshinyi katuena ne bua kulekela masangila etu a bena nkristo?

²⁰ Anu bu Kashwashwa, batendeledi ba Yehowa miliyo mivule pa buloba bujima badi baleja dianyisha diakanyine ka-lumbandi bua masangila a bena nkristo. Bu mudi bulongolodi bua Satana butangile ku kabutu kabu, katuena mua kudipesha bukenji bua kulekela disangila dietu pamue. Kadi, tushalayi batabale mu nyuma ne tulejayi dianyisha diondoke bua bisangilu, mpuilu ne mpungilu. Abi kabiakusankisha patupu mutshima wa Yehowa, kadi nebitupeteshe masanka mavule patudi tupeta dilongesha dia Nzambi didi difikisha ku muoyo wa tshiendelele.​—Nsumuinu 27:11; Yeshaya 48:17, 18; Mâko 13:35-37.

Nkonko bua diambulula

◻ Bua tshinyi ndiakalenga bua kubuela mu masangila a bena nkristo?

◻ Mmunyi mudi bantu bonso mua kuenza tshiabu tshitupa bua tshisangilu tshidi tshikale tshikolesha?

◻ Ntshilejilu kayi tshia pa buatshi tshiakashiya Yezu Kristo?

◻ Ndilongesha kayi ditudi mua kulongela kudi bana betu ba mu matunga mapele?

[Kazubu mu dibeji 17]

Badi banyisha bisangilu bia ku lumingu luonso

Bantu miliyo mivule mbasombele mu bimenga bisunsula kudi bupele ne dibunda dia bibawu. Nansha mudiku nsombelu eyi, bena nkristo balelela munkatshi muabu badi baleja dianyisha diakanyine ka-lumbandi bua masangisha abu. Mukulu kampanda udi usadila mu tshimue tshia ku bisumbu bia mu Soweto mu provense wa Gauteng, ku Afrique du Sud, udi wamba ne: “Mu tshisumbu tshia Bantemu ne bamanyishi bakena batambule 60, tutu tubuela mu bisangilu bietu bantu 70 nansha 80, ne imue misangu bapite apu. Nansha mudi bana betu balume ne bakaji kabayi benda mutantshi mule bua kubuelamu, nsombelu udi mu tshitupa etshi tshia Soweto ng’wa tshinyangu. Bakatapa muanetu umue mputa pa nyima pavuaye uya mu tshisangilu. Bakakuata bana betu ba bakaji bapite pa babidi bua kubiba. Kadi ebi kabiena bibapangisha bua kulua. Mu Dia lumingu dionso, tutu ne diambulula dia misambu dia minite mikese panyima pa bamane kujikija tshisangilu ne disambila. Bantu batue ku bia pa lukama 95 batu bashala pa tshibidilu ne bimba misambu yonso ituatumika nayi mu bisangilu bia lumingu ludi lulonda. Ebi bidi biambuluisha basankididi bapiabapia bua kulonga misambu ne kuimba pamue.”

Bantu badi basombele ku misoko badi ne bikuabu bipumbishi, bu mudi mitantshi mile idibu ne bua kuenda bua kumona mua kubuela mu bisangilu misangu isatu ku lumingu. Mulume kampanda ne mukajende basankididi ba bulelela mbasombe mutantshi wa kilometre 15 ne Nzubu wa Bukalenge mu Lobatse, mu ditunga dia Botswana. Bua tshidimu tshishale, mbabuele mu bisangilu pa tshibidilu ne bana babu babidi. Mulume udi utela bisabata bua kukuatshisha dîku. Mukaji udi usumbisha tuntu tukese bua kuvudija lupetu lua dîku bua bamone mua kufuta njila mu diya ne mu difuma mu bisangilu.

Dilolo kampanda mu tshikondo tshia luya tshiashadi etshi, panyima pa tshisangilu ne mutangidi wa tshijengu, dîku edi diakashala ku tshimanyikilu tshia bise too ne pa dîba 21:00 wa dilolo. Bise ikavua milekele dienda kumpala kua dîba bualu kuulu kuvua kubi. Mfumu wa bampulushi kampanda wakimana ne mashinyi ende ne kubebeja tshivuabu benza. Pakumvuaye lutatu luabu, wakabumvuila luse ne kubambula mu mashinyi mu luendu lua kilometre 15 batangile ku nzubu. Mukaji, udi mumanyishi ukena mutambule, wakambila bayende ne: “Tangila, patudi tuteka bisangilu pa muaba wa kumpala, misangu yonso Yehowa udi utukuatshisha.” Mpindieu mulume mmuleje dijinga dia kulua pende muyishi wa lumu luimpe.

[Tshimfuanyi mu dibeji 18]

Bantemu bu aba mu Roumanie badi bafila tshilejilu tshilenga tshia dianyisha masangila a bena nkristo