Ba-doktere, banzuji ne Bantemu ba Yehowa

MU Luabanya 1995, Bantemu ba Yehowa bakenzeja bisangilu bibidi bia dikeba ngenyi mu ditunga dia Brésil. Bua tshipatshila kayi? Bua kukeba diumvuangana ne buondapianganyi ne bena malu a mikenji padi mubedi udi mu lupitadi muikale Ntemu wa Yehowa ne kayi mua kuitaba diedibua mashi.​—Bienzedi 15:29.

Bia dibungama, mu imue nsombelu ba-doktere bavua balengulule majinga a Bantemu babedi ne bakebe bua kupeta bukenji ku kabadi bua diela mashi ku bukole. Mu nsombelu bu eyi Bantemu bakatumika ne ndongoluelu ya mikenji ivuaku bua kudikuba. Nansha nanku, bakajinga diumvuangana pamutu pa dikokangana. Nenku, bisangilu ebi biakazangika muanda wa se: kudi mishindu mikuabu mivule ya ngondapilu pamutu pa diela mashi mumvuangane, ne se: Bantemu ba Yehowa badi bitaba mishindu eyi ne disanka dionso.a

Tshipangu tshia Nsangilu Mukese wa Ba-munganga tshia mu São Paulo tshikavua tshikuate ku mmuenenu wa Bantemu. Mu Tshiongo 1995 tshipangu etshi tshiakapangadija ne: pikalaku mpata bua ngondapilu kampanda mulombe kudi doktere, mubedi udi ne bukenji bua kubenga ngondapilu au ne kusungula doktere mukuabu.

Biakanyine ka-lumbandi, kudi mpindieu nkama mivule ya bena mudimu wa luondapu mu Brésil badi basue kufila luondapu ludi kaluyi lua mashi kudi babedi babu badi balulomba. Katshia anu ku bisangilu bienza mu Luabanya 1995, diumvuangana pankatshi pa ba-doktere, banzuji ne Bantemu ba Yehowa ba mu Brésil ndiakane mu mushindu wa pa buawu. Mu 1997 tshikandakanda kampanda tshia malu a luondapu tshia mu Brésil (Âmbito Hospitalar) tshiakapatula tshiena-bualu tshivua tshishindamene pa manême a Bantemu ba Yehowa bua kunemekesha mmuenenu wabu pa tshilumbu tshia mashi. Mpindieu mbimanyike miaba yonso anu bu muakamba Nsangilu Mikese ya Ba-munganga ya mu ditunga dia Rio de Janeiro ne dia São Paulo ne: “mudimu wa doktere wa dikuba muoyo wa mubedi wende kawena ne bua kusambuka mudimu wende bua kubenga bukenji bua mubedi bua disungula ngondapilu.”

[Mêyi adi kuinshi]