Bakenza disua dia Yehowa

Yezu udi utuma bayidi 70

BIVUA mu muvu wa automne wa mu 32 B.B. Kuvua kushale anu ngondo isambombo bua Yezu kufua. Nenku, bua kuvudija lubilu lua mudimu wa diyisha ne kabidi dilongesha dia bamue ba ku balondi bende, wakasungula bayidi 70 ne ‘kubatuma kumpala kuende ku babidi ku babidi mu misoko yonso ne mu miaba yonso yakadiye wamba kuya.’​—Luka 10:1.a

Yezu wakatuma bayidi bende ‘kumpala kuende’ bua bantu bamone mua kupangadija pa lukasa bikalabu bavua anyi kabavua ku luseke lua Masiya pakadiluila Yezu pashishe. Kadi bua tshinyi wakabatuma “ku babidi ku babidi”? Bushuwa, bivua bua se: bamone mua kuikala bakankamijangana pavuabu mua kupeta buluishi.

Muikale wela kashonyi pa mitalu ya dienza nayi mudimu wabu wa diyisha, Yezu wakambila balondi bende ne: “Bia kunowa mbivule, kadi banowi mbakese; nenku nulombe Mfumu wa budimi, atume bena mudimu ku budimi buende.” (Lukase 10:2, MMM) Difuanyikija ne dinowa divua diakanyine, bualu dijanguluka dionso mu tshikondo tshia dinowa divua mua kufikisha ku dijimija dia biakudia bia mushinga. Bia muomumue, bu bayidi ne bua kulengulula mudimu wabu wa diyisha, mioyo ya mushinga mukole ivua mua kujimina!​—Yehezekele 33:6.

Ba-ministre kabayi ne ditanaji

Pashishe Yezu wakalongesha bayidi bende ne: ‘Kanuyi ne tshibombi tshia mpalata ne nsapu wa bintu bikuabu, anyi bisabata bikuabu; kanuedi muntu [“mu tshitupa bua kumuela,” NW] muoyo musangu mule mu njila.’ (Luka 10:4) Bivua tshibidilu bua muena luendu kuambulaye ki ng’anu tshibombi ne biakudia kadi uvua kabidi wambula mukolo mukuabu wa bisabata, bualu bidiatshilu bivua mua kupeluka ne nshinga ivua mua kutuka. Kadi bayidi ba Yezu kabavua ne bua kusumpakana bua malu bu aa. Kadi, bavua ne bua kuikala ne dieyemena dia se: Yehowa uvua mua kubatabalela ku diambuluisha dia binabu bena Izalele, bavua ne tshibidilu tshia kuakidilangana.

Kadi bua tshinyi Yezu wakambila bayidi bende bua kabedi muntu mu tshitupa bua kumuela muoyo? Bavua ne bua kuikala kabayi ne musangelu, peshi bena malu makolakane anyi? Nansha kakese! Muaku wa tshiena-Greke a·spaʹzo·mai, udi umvuija kuela mu tshitupa bua kuela muoyo, udi mua kumvuija bivule kupita “muoyo” anyi “betuabu” muela mu bukalanga. Udi kabidi mua kumvuija dituangana mishiku dia pa tshibidilu, diupukilangana, ne diyukilangana dia mutantshi mule didi mua kutuadija padi bantu babidi bamanyangane bapetangana. Muedi wa nseka kampanda udi wamba ne: “Dielangana muoyo munkatshi mua bena ku Orient kadivua dishindamene pa dipuekesha tshinu anyi mutu kakese, peshi dioluelangana tshianza anu bu mudidi munkatshi muetu, kadi divua dienzeka mu diupukilangana misangu ya bungi ne dinama misangu ya bungi, ne nansha dipuekelela panshi ne mubidi mujima. Bionso ebi bivua bilomba dîba dia bungi.” (Fuanyikija ne 2 Bakelenge 4:29.) Nenku Yezu wakambuluisha balondi bende bua kuepuka bitanaji bia patupu, nansha muvuabi tshibidilu.

Ku ndekelu, Yezu wakambila bayidi bende ne: pavuabu babuela mu nzubu kampanda ne babakidila, bavua ne bua ‘kushala mu nzubu amu, badia, banua [bivuabu mua] kubapa.’ Kadi biabuelabu mu tshimenga kansanga ne kabayi babakidila bimpe, bavua ne bua ‘kupatuka mu misesu yatshi bamba ne: Lupuishi lua mu tshimenga tshienu luvua lulamate ku makasa etu, tudi tulututula bua kunushilalu.’ (Lukase 10:7, 10, 11, MMM) Kututula anyi kukupula lupuishi lua mu makasa a muntu kuvua mua kumvuija se: ne ditalala dionso bayidi bavua bumbuka ku nzubu anyi mu tshimenga tshivua katshiyi tshiakidile mukenji bua kupetatshi bipeta bivua ndekelu wa bionso mua kufuma kudi Nzambi. Kadi aba bakakidila ne bulenga buonso bayidi ba Yezu bakaditeka mu mulongo bua kupeta mabenesha. Munga musangu Yezu wakambila bapostolo bende ne: “Muntu udi unuakidila, udi ungakidila meme; kabidi udi ungakidila, udi wakidila udi muntume. Yonso wapesha umue wa ku bakese aba tshiakunua, nansha dikopo dia mayi matalale, bua padiye mulongi wanyi, bulelela ndi nnuambila ne: kakubula diende difutu.”​—Matewuse 10:40, 42, MMM.

Malongesha buetu tuetu

Mudimu wa kuyisha lumu luimpe lua Bukalenge bua Nzambi ne wa kuenza bayidi badi benda baukumbaja mpindieu pa buloba bujima kudi Bantemu ba Yehowa bapite pa 5 000 000. (Matayo 24:14; 28:19, 20) Badi bajingulula ne: mukenji wabu ng’wa mitalu. Pa nanku, badi batumika biakane ne dîba diabu, bepuka matanaji adi mua kubapangisha bua kufila ntema mikole ku mudimu wabu wa mushinga.

Bantemu ba Yehowa badi badienzeja bua kuikala bena bulunda ne bantu bonso badibu bapetangana nabu. Nansha nanku, kabatu babuela mu miyuki ya tshianana, ne kabatu baditua mu dielangana mpata pa malu a mu nsombelu peshi a mushindu udi bulongolodi ebu bupangile bua kujikija tunsungasunga. (Yone 17:16) Kadi, badi bashindika diyuki diabu pa Bukalenge bua Nzambi​—dijandula dimuepele bua ntatu ya bantu dialua pashishe.

Pa tshibidilu, batu bamona Bantemu ba Yehowa benza mudimu babidi babidi. Kabavua mua kukumbaja bivule bu yonso wa kudibu mua kuenza mudimu nkayende anyi? Imue misangu. Nansha nanku, lelu’eu bena nkristo mbajingulule dikuatshisha dia kuenza mudimu pamue ne muena kuitabuja nabu kampanda. Bidi bifila ndambu wa bukubi padibu bafila bumanyishi mu miaba ya njiwu. Kutumika ne muinetu wa mudimu kudi kabidi kuambuluisha bapiabapia bua kupetela dikuatshisha ku dimanya dia bamanyishi ba lumu luimpe batambe kupiluka. Bushuwa, bonso badi mua kuambuluisha ku dishintakaja dikankamija.​—Nsumuinu 27:17.

Kakuyi mpata, mudimu wa diyisha ke mudimu udi mutambe kuikala wa mitalu udibu bakumbaja mu ‘matuku aa a ku nshikidilu.’ (2 Timote 3:1) Bantemu ba Yehowa badi ne disanka dia kuikala ne dikuatshisha dia buena-muntu bua pa buloba bujima mudibu benza mudimu ‘popamue ne mutshima umue bua ditabuja dia lumu luimpe.’​—Filipoi 1:27.

[Mêyi adi kuinshi]