“Bible wa munu umue”

MUTEKESHA kudi tuneke kunyima kua dikuatshika disama, Joseph Schereschewsky uvua mua kufunda anu yeye ututa ku mashinyi a mikanda, wenza mudimu ne munu umue. Nansha nanku wakakumbaja tshipatshila tshiende​—tshia kukudimuna Bible mu tshiena-Chine, umue wa ku miakulu mitambe kukola bua muntu muenyi kushikulujaye.

Muena Yuda wa ku tshilelelu, Schereschewsky wakakonkonona ne kuitaba Buena-nkristo pakavuaye mukulumpe. Ndekelu wa bionso wakalua misionere mu ditunga dia Chine. Kuine aku, wakenza midimu mivule ya dikudimuna, wakabanga ku ntuadijilu kua 1866 ne kutungunuka too ne mu bidimu bia kumpala bia siekele wa 20. Bu muvuaye muena Yuda, Schereschewsky uvua muibidilangane bikole ne tshiena-Ebelu kupita bashikuluji nende. Nenku, bakamupesha mudimu wa dikudimuna Mifundu yonso ya tshiena-Ebelu. Pabuipi ne ku ndekelu kua mudimu wende wa matuku a bungi, wakapatula kabidi nkudimuinu wa tshiena-Chine wa Bible mujima muikale ne note ne mvese mifuanangane.

Bu muvuaye mukudimunyi wa Bible, Joseph Schereschewsky uvua mubingishi wa dipoko wa nkudimuinu mivule mu muakulu wa bantu bonso. Kadi mudimu wende kauvua mutekete nansha. Dikuatshisha diende difila bua Bible wa tshiena-Chine ndia pa buadi, mukanda kampanda udi wamba ne: “bualu uvua umvuika bimpe menemene ne uvua mujikija mu ntatu mipite bungi.”​—The Book of a Thousand Tongues.

Kunyima kua bianza biende bimane kutekesha kudi tuneke, Schereschewsky wakatungunuka ne kuenza mudimu wende. Difunda ku mashinyi a mikanda divua dilomba madikolela a bungi, bualu bianza biende kabivua mua kutumika kabidi bimpe. Pa nanku wakabikila nkudimuinu eu ne: Bible wende wa munu umue. Bua kumupatula nansha muvuaye ne bulema, Schereschewsky wakananukila munkatshi mua bidimu 25. Kayi ulekela, wakenza tshiende tshitupa bua se: bantu bumvue Dîyi dia Nzambi mu tshiena-Chine​—muakulu udibu bakula kudi bantu bavule kupita muakulu mukuabu kayi onso.

[Mêyi a dianyisha bua tshimfuanyi mu dibeji 11]

Bimfuanyi bionso bibidi: Ku dianyisha dia American Bible Society Archives