Mbapika ba bantu anyi mbasadidi ba Nzambi?

“BANTEMU BA YEHOWA mba kuanyina mu bualabale kampanda.” Ke mudi mukanda wa bena Allemagne wa Seher, Grübler, Enthusiasten (Balungidiki, Bedianganyi ba meji, Bena lulamatu) wamba. Nansha mudiwu utobolola Bantemu mu mushindu kampanda, udi witaba ne: “Pa tshibidilu, badi ne nsombelu kayi kadiwu ne wa nkatshinkatshi. Badi badifila mu mudimu wabu wa ku mubidi ne tshisumi ne muoyo umue, mbena-muabu ba bupole ne bafutshi ba bitadi bena bululame. Badi badikanda ku dikeba dinekesha dia bubanji anu mudibu badikanda bua masanka a mu bulongolodi ebu. . . . Bukalanga buabu mu mpungilu mbuakanyine ka-lumbandi. Lungenyi luabu lua didipangisha amue masanka ndufuanangane ne lua tshisumbu kayi tshionso tshia malu a Nzambi; bua mudimu wa buambi mbapite bakuabu bonso. Kadi tshidi tshibabandisha ku mutu kua ekleziya mikuabu yonso ne tusumbu tua bena nkristo tua matuku etu aa ndipangadika kadiyi ditenkakana didi bavule ba kudibu bamanyisha nadi malongesha abu mu nsombelu yonso ne nansha mu njiwu ya mishindu yonso. . . . Badi bilejilu bia pa buabi ne bia mpatshi, mbakanyine kanemu kondoke.”a

Nansha muvuaku ditua makumbu edi dilenga, imue ngenyi yakajuka mu Allemagne ne mu makuabu matunga mabala ku minu ileja Bantemu mu munga mushindu. Mu matunga mavule pa buloba bujima, Bantemu mbenze patoke masangisha abu a ntendelelu munkatshi mua makumi a bidimu kakuyi tshipumbishi. Bantu miliyo mivule mbabamanye, badi babanemeka ne badi bitaba ne: badi ne bukenji bua kulonda tshitendelelu tshiabu. Nenku, bua tshinyi kudi dielakana pa tshidi Bantemu ba Yehowa?

Pamu’apa kabingila kamue ka dielakana edi kadi se: mu matuku adi panshi aa, bisumbu bikuabu bivule bia ntendelelu mbilue kubuelakana mu dinyanga dia bana bua masandi, didishipa dia musumba wa bantu ne dibundangana dia tshikisu. Bushuwa, bikadilu bikonyangale bu ebi bidi miaba yonso, ki ng’anu munkatshi mua batendeledi. Kadi bua bitendelelu, bantu ba bungi mbalue bena mpata, bakuabu mene baluishi.

Njiwu ya dilonda bantu

“Kasumbusumbu” nkumvuija bu “kasumbu ka bantu badi balamate dilongesha kampanda disunguluke anyi mulombodi kansanga.” Bia muomumue, aba badi mu “katendelelu” badi ne “bulamate bukole kudi muntu, lungenyi anyi tshintu kankenga.” Bushuwa, bena mu kasumbu kayi konso ka ntendelelu badi balamate bikole kudi balombodi ba bantu ne ku ngenyi yabu badi mu njiwu ya kulua bapika ba bantu. Malanda makole matangija kudi mulombodi kampanda adi mua kufikisha ku mpampakenu idi kayiyi mimpe ne ku dipanga budikadidi bua mu nyuma. Njiwu eyi idi mua kuvula padi muntu muikale mukoleshila mu kasumbusumbu kampanda katshia ku buana.

Bua njiwu ya mushindu’eu, tshiena-bualu kampanda tshia mu tshikandakanda tshia bena Allemagne tshiakadimuija matuku adi panshi aa ne: “Bilondeshile bashikuluji ba malu a tutendelelu, bana ne bansonga bafike ku 200 000 mu Allemagne badi mu njiwu ya dibanyanga lungenyi.” Aba badi bamba malu a nunku badi bushuwa baya mua tshianana padibu batumika ne mmuenenu idibu balamate bikole bua Bantemu ba Yehowa. Badi mua kuamba ne: Bantemu mbena mu bulongolodi bua malu Nzambi budi bukuata benamu ku bupika, buikale bubakokesha, buelela budikadidi buabu mikalu mu mushindu munekesha, ne bubavuija bantu badi kabayi balonda malu a mu nsangilu mujima wa bantu. Kadi malu aa mmashindamene pa bulelela anyi?

Bantemu ba Yehowa badi bakubikila bua udikonkonuene nkayebe. Panyima pa dikonkonona dienza ne ntema, ufikile ku nkomenu yebe nkayebe. Bantemu mbasadidi ba Nzambi, mudibu bamba anyi, peshi bushuwa mbapika ba bantu? Ntshinyi tshidi mpokolo wa bukole buabu? Biena-bualu bibidi bidi mu mabeji 12-23 nebifile mandamuna adi asankisha ku nkonko eyi.

[Mêyi adi kuinshi]