Mukalenge muikale ne bubanji ne meji

Udi wela meji ne: bubanji budi mua kukuvuija muena disanka anyi? Bikala muntu mukupeshe mukafu munene wa mfranga, kuakuikalaku ne disanka anyi? Pamu’apa newikale nadi. Bumue udi mua kuela meji mushindu wa kuyitula.

KAKUYI mpata, se kudi bintu bia bungi bia kusumba bua nsombelu kuluaye mulenga ne wa disanka. Mfranga idi kabidi mua kuambuluisha bu “bukubi” ku ntatu kayiyi mitekemena, bu mudi disama anyi bulofua.​—Muambi 7:12, NW.

Kadi ndiumvuangana kayi didi pankatshi pa mfranga ne disanka? Udi wela meji anu bu mudi bantu bavule bela ne: bubanji ke budi butuala disanka anyi? Bidi mua kuikala bikole bua kupeta mandamuna a nkonko eyi bualu batu mua kuenza makumi a mfranga anyi kuyibala bipepele, kadi kabatu mua kuenza nanku bua disanka. Kuena mua kuteka disanka pa tshipimu ne kuteta bujitu buadi.

Pashishe kabidi, bamue babanji badi bamueneka bikale ne disanka, eku bakuabu kabayi nadi. Muanda umue-umue eu mmulelela bua aba badi bikale balanda. Kadi, bantu ba bungi​—nansha aba bakadi babanji—​batu bela meji ne: mfranga mivule neyibatuadile disanka ditambe bunene.

Muntu umue wakafunda malu aa uvua Mukalenge Solomo wa mu Izalele wa kale. Uvua umue wa ku bantu babanji ba katshia ne katshia. Udi mua kubala diumvuija dia bubanji buende buvulavulayi mu nshapita wa 10 wa mukanda wa mu Bible wa Bakelenge wa kumudilu. Tshilejilu, tangila mvese wa 14 udi wamba ne: “Bujitu bua or yakangata Solomo ku tshidimu tshimue buakadi ntalanta ya or nkama isambombo makumi asambombo ne isambombo.” (Disendamija miaku ndietu.) Bungi abu budi mumue ne bujitu bua tone 25 ya ngolo. Lelu’eu, ngolo muvule bungi abu udi mua kuikala ne mushinga mupite pa dolare 200 000 000!

Kadi, Solomo kavua mubanji patupu; Nzambi uvua mumubeneshe ne meji. Bible udi ulonda ne: “Mfumu Salomone uvua mupite bamfumu bonso ba pa buloba ku biuma ne ku meji. Bantu bonso bavua bajinga kumonangana ne Salomone bua bapete pabo dipa dia meji divua [“Nzambi,” NW] mumupeshe.” (1 Bamfumu 10:23, 24, Mukanda wa Mvidi Mukulu) Tuetu petu tudi mua kupetela dikuatshisha ku meji a Solomo, bualu mifundu yende idi yenza tshitupa tshia miyuki ya mu Bible. Tutangilayi tshivuaye ne bua kuamba bua diumvuangana pankatshi pa bubanji ne disanka.

[Mêyi a dianyisha bua tshimfuanyi mu dibeji 3]

Biangatshila mu Die Heilige Schrift​-Übersetzt von Dr. Joseph Franz von Allioli. Druck und Verlag von Eduard Hallberger, Stuttgart