Bienzedi bimpe bidi bieleshisha ka-lumbandi

TSHIKANDAKANDA tshia bena Italie tshia La Gazzetta del Mezzogiorno tshiakela Bantemu ba Yehowa ka-lumbandi bua dipatula tshiena-bualu tshia “Matera la troglodyte” (Matera tshimenga tshiashila mu nyongolo). Tshiena-bualu etshi tshiakapatuka mu nimero wa dia 8 Kashipu 1997, wa tshibejibeji tshia Réveillez-vous! tshidi tshikale mu miakulu ya bungi. Badi mpindieu bakudimuna Réveillez-vous! mu miakulu 81 ne bapatula kopi miliyo mipite pa 19 pa buloba bujima. Tshikandakanda atshi tshiakumvuija ne: Réveillez-vous! wakajadika tshishiferi tshia pa buatshi tshia mu muvu wa été “pa bidi bitangila difila mamanyisha bua kutumbisha bumpianyi bua malu a kale ne dimanya-kuenza bia tshimenga [tshia Matera].”

Tshikandakanda etshi tshiakela Bantemu ka-lumbandi bua Mpungilu wa Distrike wa “Ditabuja mu Dîyi dia Nzambi” muenzela mu Matera mu 1997. Tshiena-bualu etshi tshiakaleja ne: Bantemu bakenza madikolela “bua kuikala ne bantu 4 000 mu Tshipalu [tshia tshimenga tshidi ne dîna se:] XXI Settembre munkatshi mua été ne mu munya wa lufiondola mbua makoba; bavua batabalela disukula, difitulula mukubu, ne dilongolola dia bintu bia nshindamenu dia muaba eu wa manaya (nangananga nkumba), bionso ebi tshianana, batula nkayabu mfranga bua kusumba bintu bidi bikengedibua.”

Bantemu ba Yehowa badi badienzeja bua kuikala bena mutumba bimpe. (Matayo 22:37-39) Badi kabidi balonda mubelu eu wa mu Mifundu: ‘Nuikale ne bienzedi bienu bimpe munkatshi mua bisamba bia bende, bualu bua, mu mianda idibu banusonguela nuenu bu benji ba malu mabi, bobu batumbishe Nzambi mu dituku dia [“dikonkonona diende,” NW].’​—1 Petelo 2:12.