Ntshinyi tshikala matuku atshilualua bua buloba buetu ebu?

Tshikandakanda kampanda tshidi tshiamba ne: “Kakuena siekele mukuabu mumanyike udi diatshimue ne siekele wa 20 bua tshinyangu tshia bantu tshienza ne tshikisu, bua bungi bua mvita miluangana, misumba ya bena tshimuangi idi mipatuke, bantu miliyo mivule bashipa mu mvita ne mfranga mivule mitula bua ‘didikuba.’” Nsombelu eu neashintulukeku anyi?​—World Military and Social Expenditures 1996.

Mupostolo Petelo wakavuluija bena nkristo dilaya dienza kudi Nzambi siekele mivule kumpala ne: “Bilondeshile dilaya [dia Nzambi], tudi bindile diulu dipiadipia ne buloba bupiabupia, muajamabo kudi buakane.” (2 Petro 3:13, MMM) Mêyi aa avua diambedi mu mulayi wa Yeshaya. (Yeshaya 65:17; 66:22) Izalele wa kale wakamona dikumbana dia kumpala pakapingajabu tshisamba etshi mu buloba bulaya kunyima kua bupika mu Babilone munkatshi mua bidimu 70. Mu diambulula kabidi dilaya dia “diulu dipiadipia ne buloba bupiabupia,” Petelo wakaleja ne: mulayi eu uvua ne bua kukumbana mu mushindu mutambe kualabala​—pa buloba bujima!

Dijadika dia nsombelu miakane pa buloba bujima ndisua dia Nzambi, ne nedienzeke ku diambuluisha dia Bukalenge buende bua mu diulu budi ne Kristo bu Mukalenge. ‘Tshisamba tshikuabu katshiena tshibisha muele wa mvita bua kuluisha nawu tshisamba tshikuabu, ne kabena bayila lungenyi lua kuluangana nalu mvita kabidi.’ (Yeshaya 2:4) Ditalala ne bukubi bia tshishiki bia mushindu’eu pa buloba ke bualu buvua Yezu mulongeshe balondi bende bua kutekemena ne bua kusambila mu tshitu bantu babikila ne: Tatu wetu, anyi Disambila dia Mukalenge, bamba ne: ‘Bukalenge buebe bulue. Benze pa buloba muudi musue bu mudibu benza mu diulu.’​—Matayo 6:9, 10.

Neusanke bua kuikala ne muoyo mu bulongolodi budi buakane bu mudi diulu anyi? Adi ke ditekemena didi Bible uleja kudi muntu yonso udi ukeba ne muoyo mujima bua kumanya Nzambi ne kuikala ne nsombelu mumvuangane ne njila yende miakane.