Bamanyishi ba Bukalenge badi balonda

“Mu tshisalu ku dituku ku dituku”

MUPOSTOLO Paulo wakatumika ne mpunga yonso bua kumuangalaja mukenji wa Bukalenge. Bua kumona mua kukeba bantu badi bakanyine, wakeleshangana meji ‘ne bena Yuda mu nsunagoga, ne mu tshisalu ku dituku ku dituku.’​—Bienzedi 17:17.

Lukunukunu bu elu ludi luikale tshimanyinu tshisunguluke tshia batendeledi balelela ba Yehowa kubangila mu siekele wa kumpala B.B. (Matayo 28:19, 20) Bia muomumue lelu’eu, Bantemu ba Yehowa badi batumika ne ngenzelu kabukabu padibu bambuluisha ne lukunukunu bantu bena mitshima milulame bua kufikabu ku dimanya dijalame dia bulelela. (1 Timote 2:3, 4) Bualu bumona budi bulonda ebu bua mu ditunga dia Australie budi tshilejilu tshia muanda eu.

Matuku atanu ku lumingu luonso, Sid ne Harold badi bashilangana matuku mu diya kuteka dia mikanda mikese miumvuiji ya Bible pabuipi ne ku ngala wa kawulu mu tshimenga tshia Sydney. Mbadifile mu dimanyisha lumu luimpe lua Bukalenge bua Nzambi mushindu’eu kukadi mpindieu bidimu bitue ku bitanu. Sid, udi ne bidimu 95, udi umvuija ne: “Pangakakumbaja bidimu 87, tshivua kabidi mua kuendesha vuatire. Biakantekesha mu mikolo bualu mvua musue mudimu wa bumanyishi bua patoke. Dimue dituku pamvua pabuipi ne tshitupa tshitu ne ba-musua-luendu tshibikila ne: Echo Point mu tshimenga tshia Katoomba, ngakamona muzodi kampanda upanyisha bimfuanyi bizola bia bitupa bia maloba. Ngakakonkonona bimfuanyi bizola abi ne meme kuela meji ne: ‘Ndi ne bimfuanyi bimpe mu tshibuta tshianyi tshia buambi kupita biabia naka​—ne bitudi tufila ku mushinga mushadile bikole ku bimfuanyi biabia!’ Nenku ngakapangadija bua kuenza ka-tshitamba kakese, kukasa muaba uvua ba-musua-luendu ba bungi, ne kupesha bapitshi ba njila mikanda miumvuiji ya Bible ya bimfuanyi bilenga miabanya kudi Bantemu ba Yehowa.

“Kukadi bidimu binayi, ngakaya ne ka-tshitamba aka mu Sydney, ne Harold wakantua mu nyima. Tudi tushilangana matuku bua kupana pa ka-tshitamba aka ne kutumika ne bisumbu bietu bia tshimenga etshi.” Harold, udi mpindieu ne bidimu 83, udi wamba ne: “Kubangila mu Dimue too ne mu Ditanu bantu bakese menemene batu ku mabu. Nenku kumanyisha mukenji wa Bukalenge mushindu’eu kudi kututuangaja ne bantu. Pa tshibidilu tutu tupatula bipeta bimpe be. Diabanya dietu dia mikanda ndia pa buadi menemene bua ditunga edi.”

Sid udi wamba ne: “Nansha mutudi basombe mu miaba inayi anyi itanu mishilangane munkatshi mua bidimu bivule, mutantshi kautu unenga bua bantu kutumanyabu. Bamue badi balua kutudi bua kukeba mikanda. Bakuabu badi ne nkonko ne bakeba mandamuna. Ne banga mbasue kuyukila minute mikese patupu.” Udi useka wamba ne: “Ke musangu umuepele udi bantu ba kukumbulula balue kundi.”

Harold udi usakidila ne: “Bulelela bantu ba bungi badi basankidila Bible. Mu ngondo umue bantu banayi bakatuadija kulonga Bible ne Bantemu bu tshipeta tshia mikanda ivuabu bapetele kutudi ne bua nkonko ituvua tuandamuna ku diambuluisha dia Bible. Malu mamona bu au adi atukankamija bikole.”

Bu Sid ne Harold​—ne bu mupostolo Paulo—​miaba yonso, Bantemu ba Yehowa badi batumika ne mishindu yonso idi imueneka bua kumuangalaja mukenji wabu wa mushinga mukole. Nenku, badi batungunuka ne kuyisha ‘lumu luimpe pa buloba buonso buasa.’​—Matayo 24:14, NW.