Muanda ukena kupua muoyo mu France

“KATUENA BASUE TSHIMENGA TSHIA YEHOWA TO!” ke muvua mamanyisha mafunda maleja mu tshimenga amba. Kasumbu kampanda ka baluishi kakakankamija bantu ne: “Tuetu buonso pamue, tuluishayi mudimu wa Yehowa.” Bushuwa biena-bualu nkama ne nkama bia mu bikandakanda biakamanyisha bantu bonso bualu ebu. Bakatua biala pa mikanda ya ditontolola nayi, ne mushiki wa trakte mipite pa tshitupa tshia muliyo mujima ivua yakula bua mudimu eu yakaloka mu tushete tua mikanda tua muaba au. Uvua mudimu kayi eu wakavuandulula tshimenga tshitalale tshia Louviers, ku Nord-Ouest kua France? Tshivua luibaku luvuabu balongolole bua biro bipiabipia bia filiale ne nzubu ya disombela bia Bantemu ba Yehowa.

Yehowa udi uudiundisha

Mudimu wa Bantemu ba Yehowa mu France mmubange kale ku ndekelu kua siekele wa 19. Nzubu wa kumpala wa dilamina mikanda miumvuiji ya Bible (depo) uvua mukangula mu 1905 mu musoko wa Beauvène, ku Sud kua France, ne mu 1919, biro bikese biakatuadija kuenza mudimu mu Paris. Mu 1930 bakakangula patoke biro bia filiale mu tshimenga etshi, ne tshidimu tshiakalonda benji ba mudimu mu biro bakasombela mu nzubu wa Betele uvua mu Enghien-les-Bains, ku Nord kua Paris. Panyima pa Mvita Mibidi ya Buloba bujima, dîku dia Betele diakapingana mu Paris, ne mu 1959 bakatuma filiale mu nzubu wa bisasa bitanu mu musoko wa pa mpenga wa Boulogne-Billancourt, ku Ouest kua mikalu ya tshimenga tshikulu.

Bua didiunda dia mudimu wa dimanyisha Bukalenge, mu 1973 bakatekela nzubu wa dienzela mikanda ne wa diyabanya mu Louviers, kilometre 100 ku Ouest kua Paris, biro biakashala biobi mu Boulogne-Billancourt. Kadi, divula dia bamanyishi mu France diakavuija nzubu ya mu Louviers mikese, nansha muvuabu basakidile mikuabu mu 1978 ne mu 1985. Nenku bavua balongolole bua kudiundisha ne kusangisha dîku dijima dia Betele kaba kamue. Bu mudibi bileja ku ntuadijilu, bantu bonso kabavua banyishe mudimu eu to. Nansha muvuaku buluishi ebu, bavua bapete muaba mutantshi wa kilometre umue kumbukila ku muaba wa dienzela mikanda. Mu bidimu bisambombo bia mudimu mukuatakane, ne ndekelu wa bionso, panyima pa bidimu 23 bia dikala miaba mitapuluke, dîku dijima dia Betele divua disangisha kaba kamue mu Louviers mu Tshimungu 1996.

Nenku divua disanka dinene bua muvua musumba munene wa bantu 1 187, pamue ne bena dîku dia Betele wa France 300, ne batumibue 329 ba mu filiale mikuabu 42, basangile mu Disambombo dia 15 Kasuabanga 1997, bua kuteleja muyuki wa dibanjija nawu muenza kudi Muanetu Lloyd Barry, muena mu Kasumbu Kaludiki. Kadi, pa kumona muvua dibanjija edi dikale dienzeka mu tshikondo tshivuaku buluishi ne kampanye ka matuku mulongo bua kushiminyina Bantemu ba Yehowa malu kenza ku tudiomba mu France mujima, bavua bele meji ne: Bantemu bonso ba mu France bavua ne bua kuikala ne mushindu wa kusekelela butshimunyi ebu. Nenku, bakalongolola tshisangilu tshia pa buatshi tshivua ne tshiena-bualu tshia “Shalayi mu dinanga dia Kristo” mu Dia lumingu dia 16 Kasuabanga, mu Villepinte, Nzubu munene wa dilejila bintu, anu ku Nord kua Paris. Bantemu ba Yehowa bonso ba mu France pamue ne Bantemu badi bakula Mfualansa ba mu Belgique ne ba mu Suisse bavua babikidibue, pamue ne bisumbu bia mu Allemagne, Grande-Bretagne, Luxembourg ne Pays-Bas.

Disangila diende lumu

Bakabanga malongolola bua disangila edi ngondo isambombo kumpala. Pashishe, mbingu ibidi kumpala kua dibanjija, bendeshi ba tuminyo tunene ba mu France bakadiombola mudimu, e kukanga njila minene ne bisumbishidi bia kasolonyi. Nkuasa ne bia mudimu bikuabu bivua mua kufika pa dîba anyi? Dikanga dia njila divua mua kupangisha bana betu bua kuluabu anyi? Muanda wakasulakaja bantu bonso, didiombola mudimu edi diakajika mu lumingu lumue, ne bakakangula kabidi njila. Mu Ditanu dilolo kumpala kua kufika ku ndekelu kua lumingu lua dibanjija, tuminyo 38 tuakafika ne nkuasa 84 000 mu nzubu ibidi mialabale mifutshila bua tshibilu etshi. Bana betu balume ne bakaji bapite pa 800 bakenza mudimu butuku bujima too ne pa dîba tshitema ne tshitupa mu Disambombo mu dinda bua kulongolola bia kusomba, tshiakuidi, biamu bia mêyi, ne biamu binene tshitema bia bindidimbi bia video.

Mu Dia lumingu mu dinda pa dîba 6:00, bakakangula biibi, ne bisumbu bia bantu biakatuadija kubuelamu. Tuwulu tua pa buatu 17 tufutshila tuakalua ne Bantemu bapite pa 13 000 mu tshimenga tshikulu. Bana betu balume ne bakaji ba muaba au bapite pa nkama ibidi bavua ku ngala bua kuakidila bena ngendu ne kubafila pa muaba wa mpungilu. Muanetu wa bakaji umue wakamba ne: ndongoluelu eu wa dinanga wakabapesha “nyanji ya bukubi ne ya disanka.”

Bakuabu bakalua mu Paris ku ndeke anyi ku mashinyi. Kadi bantu bavule bakaluila ku bise 953, pavua eku Bantemu ba mu Paris babuele mu mashinyi atu ambula bantu bonso bua kuya ku Nzubu munene wa dilejila bintu. Ba bungi bavua bende butuku bujima anyi bashiye mbanza yabu patshiatshia, kadi bavua ne disanka dia bungi bua kubuela mu tshisangilu etshi. Mioyo ya musangelu ne diupukilangana dia luya biakaleja disangila dia balunda bavua kabayi bamonangane munkatshi mua bidimu bivule. Bilamba bia mekala bia mu ditunga ne ditunga biakapesha misumba ya disanka ngikadilu musunguluke wa bukua-matunga. Bushuwa, muanda wa dikema uvua munkatshi mua dienzeka.

Pakatuadija ndongamu pa dîba 10:00 mu dinda, kakutshivua kabidi miaba ya kusomba, pabi bantu nkama mivule bavua balua ku munute wonso. Kuonso kuvua muntu utangila, uvua umona mpala mivule mikale ne mimuemue. Bantu binunu bivule bakashala bimane kuulu anyi basombe mu sima. Mu diumvuangana ne buenzeji bua tshiena-bualu tshia mpuilu, ne dinanga dionso bansonga bavule bakimana kuulu bua bantu bakulumpe kusombabu. Bena dibaka kampanda bakafunda ne: “Mmunyipu mutuvua ne disanka bua kushila bana betu balume ne bakaji batuvua katuyi bamanye miaba yetu, kadi batuvua batambe kunanga!” Ba bungi bakaleja mmuenenu mulenga wa didipangisha amue malu: “Tuakimana kuulu munkatshi mua ndongamu mujima ku nseke kua nkuasa ituvua benzele mudimu bua kuyilonga butuku bujima bua mu Ditanu. Kadi dikalamu tshianana diakatusaka ku diuula ne dianyisha bua Yehowa.”

Nansha muvuabu batshioke anyi bapungile, babuedi ba mu tshibilu bakateleja ne ntema mikole luapolo ya mu matunga makuabu ne muyuki wa Lloyd Barry ne wa Daniel Sydlik, udi muikale pende muena mu Kasumbu Kaludiki. Muanetu Barry wakakula pa tshiena-bualu tshia: “Yehowa udi ukumbaja bukole bua muntu udi kayi ne ngulu,” ne mu mushindu mololoke wakaleja mudi Yehowa mubeneshe tshisamba tshiende ne didiunda nansha mudiku mateta kabukabu. Muyuki wa Muanetu Sydlik uvua ne tshiena-bualu tshia: “Disanka didi kudi bantu badi Yehowa muikale Nzambi wabu!” Miyuki eyi yonso ibidi ivua nangananga mienza mu tshikondo tshiakanyine pa kumona buluishi budi Bantemu ba Yehowa bakama mpindieu mu France. Muanetu Sydlik wakaleja ne: disanka dilelela ki ndisuikila ku malu adi amueneka pambelu, kadi ku malanda etu mashême ne Yehowa ne mmuenenu wetu wa muoyo. Lukonko luende luela bateleji ne: “Nudi ne disanka anyi?” luvua luandamuna ne mukungulu wa bikashi.

Muanetu wa bakaji kampanda uvua “mujimije disanka diende” wakafunda pashishe ne: “Diakamue ngakajingulula ne: mvua mua kupeta disanka. Mvua mutangije madikolela anyi kua tshianana, ne ku diambuluisha dia muyuki eu, Yehowa wakandeja mumvua ne bua kushintuluka.” Muanetu wa balume mukuabu wakamanyisha ne: “Mpindieu ndi musue kuluangana bua kusankisha mutshima wa Yehowa. Tshiena musue kulekela tshintu nansha tshimue tshiumbushe disanka dindi mutuadije kumvua munda.”

Pakavua tshisangilu tshitangile ku ndekelu, bivua bia musangelu wa bungi pakamanyisha mulombodi bungi bua bantu: 95 888​—disangila ditambe bunene dia Bantemu ba Yehowa dia katshia ne katshia mu France!

Kunyima kua musambu wa ndekelu, wakimba bantu ba bungi ne binsonji bia disanka ku mêsu kuabu, ne disambila dia ndekelu, bana betu bakamata mu njila batangila ku mabu ne nyanji mishilangane. Ngikadilu wa musangelu ne wa bulunda wa disangila edi kavua mupange kukoka ntema. Bendeshi ba bise bakela nseka mivule pa mmuenenu muimpe wa babuedi ba mu tshibilu. Bavua bakemesha kabidi kudi dilongolola diakambuluisha bua bise yonso 953 kumbukayi ku Nzubu munene wa dilejila bintu mu mêba abidi kakuyi dijikangana nansha dikese dia mashinyi mu njila! Tshikadilu tshia babuedi ba mu tshibilu tshivua kabidi tshianyisha bikole kudi bena mudimu ba mu tuwulu ne ba ku mashinyi atu ambulangana. Bakenza mayuki a bungi, ne bakafila bumanyishi buimpe.

“Muaba wa tshitalele mu tshipela”

Mupostolo Paulo wakabela binende bena nkristo ne: “Tukenketanganayi bua kusakangana ku dinanga ne ku midimu milenga, . . . tukankamijanganayi, ne tutambe kuenza nunku bu munudi numona dituku dienda disemena pabuipi.” (Ebelu 10:24, 25, NW) Bushuwa, tshisangilu etshi tshia pa buatshi tshivua mpokolo wa dikankamija dinene kudi bonso, “muaba wa tshitalele mu tshipela” bu muakabileja muanetu wa bakaji kampanda. Bana betu ba mu filiale wa Togo bakafunda ne: “Tuakapingana ne dikanda, bakankamija, bakolesha ne bikale ne dipangadika dikole kupita kuonso eku bua kusanka mu mudimu wa Yehowa.” Mutangidi kampanda wa tshijengu wakamba ne: “Aba bavua baletele mu lungenyi bakalukila kumbelu bikala ne disanka.” Mukuabu wakamanyisha ne: “Bana betu bavua basonsola ne bakolesha.” Bena dibaka kampanda bavua basakibue bua kufunda ne: “Katshia katutu banji kudiumvua batambe kuikala pabuipi ne bulongolodi bua Yehowa nunku.”

Mufundi wa misambu wakamanyisha ne: ‘Dikasa dianyi didi dimana mu muaba mupunga; nemvudijile Yehowa disanka mu masangisha a bantu bende.’ (Musambu 26:12) Masangila a bena nkristo bu aa adi ambuluisha bonso bua kupetulula luendu lujalame mu nyuma mu diakama bipumbishi. Muanetu wa bakaji kansanga wakajadika ne: “Nansha kuoku makenga a mushindu kayi, bikondo ebi bia pa buabi mbijame bikole mu mitshima yetu ne misangu yonso nebikaleku bua kutusamba.” Bia muomumue, munga mutangidi muena ngendu wakafunda ne: “Padi bikondo bikole bijuka, divuluka dia ka-diosha aka ka Mparadizu nedituambuluishe mua kubitantamena.”

Musambu 96:7 udi ubela ne: ‘Nuenu ba mu biota bia bantu, nuambike Yehowa malu ende, nuambike Yehowa butumbi ne bukole.’ Bushuwa, dibanjija dia nzubu mipiamipia ya filiale mu France mbutshimunyi bunene bua Yehowa. Yeye nkayende ke udi muenzeje dikumbana dia mudimu eu mu buluishi bukole ne butangalake. Bantemu ba Yehowa mu France mbapangadije bikole kupita kuonso eku bua ‘kushala mu dinanga dia Kristo’ ne bua ‘kukenkesha butoke buabu.’ (Yone 15:9; Matayo 5:16, NW) Kakuyi didilaminyina, bonso bakabuela mu ndongamu eu wa dibanjija badi ne nyanji ya mufundi wa misambu ya se: “Mudimu eu ngua Yehowa, udi bualu bua kukema ku mesu kuetu.”​—Musambu 118:23.

[Tshimfuanyi mu dibeji 26]

Lloyd Barry

[Tshimfuanyi mu dibeji 26]

Daniel Sydlik

[Tshimfuanyi mu dibeji 26]

Bantu 95 888 bakabuela mu ndongamu wa pa buende mu Villepinte, Nzubu munene wa dilejila bintu

[Bimfuanyi mu dibeji 28]

Bantu binunu bivule bavua babuele bavua bimane anyi basombe mu sima bua kuteleja