Mmunyi muudi mua kukuba bana bebe?

PANYIMA pa mumane kujikija kalasa mu tshilongelu tshia pabuipi nende munkatshi mua bidimu bivule, Wernera wakatuadija tulasa tubandile pamue ne bansonga bakuabu batue ku 3 000 mu tshimenga tshia São Paulo, mu ditunga dia Brésil. Bua musangu wa kumpala, wakamona balongi nende basumbisha ne banua bintu bia lulengu. Bu muvuaye muntu wa tshitupa, katupa kîpi balongi bakulumpe bakamubueja ku bukole mu bilele binyanguke ne bia njiwu.

Eva, muanabu ne Werner wa bakaji, uvua pende ne ntatu. Bu muvuaye musue kuenza muende muonso, wakalonga bikole menemene mu mushindu wa se: wakatshioka ne lungenyi luakamunyunguluka. Anu bu bansonga bakuabu, Werner ne Eva bavua bakengela bukubi bua ku mubidi ne bua mu mpampakenu. Bana bebe badi bakengela diambuluisha dia mushindu kayi? Mmunyi muudi mua kubalongolola bua nsombelu wa buntu bukulumpe? Bushuwa, mmatuku kayi atshilualua audi ujingila bana bebe?

Badi bakengela bivule kupita dikuatshisha dia ku mubidi

Ela meji kakese bua lutatu ludi baledi bapeta mu dikuba bana babu lelu’eu. Bua dinyanguka dia nsombelu wa dîku ne divula dia bupele, bungi bua bana badi basombele mu misesu budi buenda buvula mu matunga a bungi. Dienzeja bana midimu mikole ntshipeta tshia dipangila kukuba bansonga ku dikengeshibua. Dinua dia bintu bia lulengu didi kabidi dinyanga bansonga bavule. Tshilejilu, pakalua nsonga kampanda wa mu Brésil munu wa bintu bia lulengu, ditalala diakajimina mu dîku diabu. Kusakidila ku disumpakana divua nadi baledi bende, bine aba bavua baluangana bua kupeta mfranga ya dimondapisha nayi, kabidi basumbishi ba bintu bia lulengu kabayi luse bavua balua kunana mabanza kumbelu kuabu.

Kadi nansha mudiku bifinakaji bia mu nsombelu, baledi ba bungi badi batungunuka ne kuluangana bua kupetesha bana babu ki ng’anu biakudia, bia kuvuala ne muaba wa kulala kadi badi babakuba kabidi ku tshinyangu, dinua bintu bia lulengu ne ku ntatu mikuabu. Aa mmadikolela malenga, kadi mmakumbane anyi? Bidi munyi bua dibakuba ku dinyanguka dia mu mpampakenu ne mu nyuma? Bavule badi bajingulula ne: dikolesha bana didi dipatula bipeta bimpe didi dilomba kuluisha ntatu idi itangila balunda badi bana babu basungula ne dijikija lutetuku. Kadi, mmunyi mudi baledi mua kuepuka dikuba dinekesha anyi dilekelela dinekesha? Tudi tukulomba bua kukonkonona mandamuna adi mu tshiena-bualu tshidi tshilonda.

[Mêyi adi kuinshi]