“Tshilejilu tshia buobumue ne tshia buena-muntu”

Ke mushindu uvua muntu mukaji kampanda mumvuije bienzedi bia Bantemu ba Yehowa pakajimijaye ne dibungama dionso muena mu dîku diende. Udi umvuija ne:

“Mu dîna dianyi ne dia dîku dianyi, ndi musue kusakidila Bantemu ba mu tshisumbu tshia muakulu wa tshiena-Italie mu Freiburg, mu ditunga dia Allemagne. Pa kumbusha mukuluanyi wa balume Antonio ne mukajende Anna, bena mu dîku dianyi ki m’Bantemu ba Yehowa nansha. Nansha mututu bajane musangu mule disungula dia tshitendelelu tshiabu etshi, tutu anu tutshinemeka.

“Kadi mpindieu tudi ne bua kushintulula ngenyi yetu. Bushuwa, tudi bamone tshilejilu tshia buena-muntu ne dinanga bituvua katuyi mua kutekemena nansha.

“Bia dibungama, Anna wakafua kumpala kua dîba mu njiwu ya mashinyi. Bu mutudi basombele mu Italie, tuakashala pamue ne muanetu Antonio ne bana bende too ne mu tshikondo kampanda. Bana babu Bantemu bakalua kumuambuluisha ku dikalapu diabu, mêyi abu, ditabuja diabu, ne dikuatshisha dia ku mubidi, dia mu lungenyi ne dia mfranga. Bu mundi meme nkayanyi tshiyi mua kusakidila tshisumbu, ndi musue kubasakidila ku butuangaji bua tshibejibeji tshienu bua tshilejilu tshiabu tshia buobumue ne tshia buena-muntu bituikala katuyi mua kupua muoyo.”

Tudi banyishe malu malenga mamba kudi mukaji eu. Anu bu muakamonaye, Bantemu ba Yehowa badi benza buena-muntu bua buloba bujima. (1 Petelo 2:17) Badi badima disuangana dikole munkatshi muabu, bamanye ne: dinanga “didi tshisuikidi tshipuangane tshia buobumue.” (Kolosai 3:14, NW) Nansha mu nsombelu mitambe bubi idi mua kutufikila buonso buetu, Bantemu ba Yehowa mbalamate bikole kudi Nzambi ne kudi bantu bende.​—Nsumuinu 18:24; Muambi 9:11; Yone 13:34, 35.