Udi ne “mutshima wa butumike” anyi?

PAKALUA Solomo mukalenge mu Izalele wa kale, wakadiumvua kayi mukumbane. Pa nanku wakalomba Nzambi meji ne dimanya. (2 Kulondolola 1:10) Solomo wakasambila kabidi ne: “Udi ne bua kupa musadidi webe mutshima wa butumike bua kulumbuluisha bantu bebe.” (1 Bakelenge 3:9, NW) Bu Solomo muikale ne “mutshima wa butumike,” uvua mua kulonda mikenji ya Nzambi ne kupeta dibenesha dia Yehowa.

Mutshima wa butumike ki mbujitu nansha, kadi mpokolo wa disanka. Mupostolo Yone wakafunda ne: “Etshi ke tshidi dinanga dia Nzambi diumvuija: tulame mêyi-matuma ende; ne mêyi-matuma ende mene kaena bujitu.” (1 Yone 5:3, NW) Bushuwa, tudi ne bua kutumikila Nzambi. Tuamba eku tuela eku Yehowa udi Mufuki wetu Munene. Yeye ke muena buloba ne bionso bidipu, nansha tshiamu tshionso tshia argent ne tshia ngolo. Nenku katuena bushuwa mua kupesha Nzambi tshintu nansha tshimue tshia ku mubidi, nansha mudiye utuitabila bua kutumika ne biuma bietu bua kumuleja dinanga dietu. (1 Kulondolola 29:14) Yehowa mmutekemene bua tuetu kumunanga ne kuenda nende ne budipuekeshi, mu dienza disua diende.​—Mika 6:8.

Pakebejabu Yezu Kristo bua kumanya dîyi-dituma didi ditambe bunene mu Mikenji, wakamba ne: “Udi ne bua kunanga Yehowa Nzambi webe ne muoyo webe mujima ne anyima webe mujima ne lungenyi luebe luonso. Edi ke dîyi-dituma didi ditambe bunene ne dia kumpala.” (Matayo 22:36-38, NW) Mushindu umue wa kuleja dinanga adi ng’wa kutumikila Nzambi. Pa nanku disambila dia yonso wa kutudi didi ne bua kuikala dia se: Yehowa atupeshe mutshima wa butumike.

Bavua ne mutshima wa butumike

Bible mmûle ne bilejilu bia aba bavua ne mutshima wa butumike. Tshilejilu, Yehowa wakambila Nowa bua kuenza buatu bunene bua kukuba mioyo. Eu uvua mudimu munene wakangata bidimu bitue ku 40 anyi 50. Nansha bu bikale ne biamu bia bukole bidiku lelu ne bia-mudimu bikuabu, bivua mua kuikala bualu bua meji bua kuibaka tshintu etshi tshienza bu nzubu munene tshivua mua kulelema pa mâyi. Kabidi, Nowa uvua ne bua kudimuija bantu bavua bushuwa bamupepeja ne bamuseka. Kadi uvua ne butumike mu malu onso. Bible udi wamba ne: “Wakenza nunku.” (Genese 6:9, 22; 2 Petelo 2:5) Nowa wakaleja dinanga diende bua Yehowa pa kutumikila ne lulamatu luonso munkatshi mua bidimu bivule. Ntshilejilu kayipu tshilenga buetu tuetu bonso!

Tangila kabidi nkambua Abrahama. Nzambi wakamuambila bua kumbuka ku Ur tshimenga tshia bena Kasada tshia bubanji buvule bua kuya mu ditunga kadiyi dimanya. Abrahama wakatumikila kakuyi mpata. (Ebelu 11:8) Bua matuku ende a muoyo avua mashale, yeye ne dîku diende bavua basombele mu ntenta. Panyima pa bidimu bia bungi bu muenyi mu ditunga, Yehowa wakababenesha yeye ne Sara, mukajende wa butumike, kubapeshaye muana muinyika dîna dia Izaka. Bushuwa Abrahama, muntu wa bidimu 100, uvua ne bua kuikala munange muanende wa ku bukulakaje. Kunyima kua bidimu bungi kampanda, Yehowa wakalomba Abrahama bua kulambula Izaka bu mulambu wa kuosha. (Genese 22:1, 2) Lungenyi lua kuenza bualu bu nunku luvua ne bua kuikala lubungamije Abrahama. Nansha nanku, wakatungunuka ne kutumikila bualu uvua munange Yehowa ne uvua ne ditabuja dia se: dimiinu dilaya divua ne bua kulua ku butuangaji bua Izaka, nansha bikala Nzambi uvua ne bua kumujula ku bafue. (Ebelu 11:17-19) Kadi pakavua Abrahama pabuipi ne kushipa muanende, Yehowa wakamulekesha e kuambaye ne: ‘Katataka ndi mumanye ne: wewe udi utshina Nzambi, bualu bua wewe kuakampidia muanebe, muana umuepele mene.’ (Genese 22:12) Bua butumike buende, Abrahama mutshinyi wa Nzambi wakafika ku dimanyika bu “mulunda wa Nzambi.”​—Yakobo 2:23.

Yezu Kristo udi tshilejilu tshietu tshitambe buimpe tshia butumike. Kumpala kua kuluaye pa buloba, uvua ne disanka mu dienzela Tatuende mudimu wa butumike mu diulu. (Nsumuinu 8:22-31) Bu muntu, Yezu wakatumikila Yehowa mu malu onso, misangu yonso muikale usanka bua kuenza disua diende. (Musambu 40:8; Ebelu 10:9) Nenku, ne bulelela buonso Yezu uvua mua kuamba ne: ‘Tshitu ngadienzela bualu, kadi ntu ngamba anu malu akanyisha Tatu. Wakuntuma udi nanyi; kakunshiya nkayanyi, bualu bua matuku onso ntu ngenza malu adi amusankisha.’ (Yone 8:28, 29) Ndekelu wa bionso, bua kubingisha bumfumu bukulu bua Yehowa ne kupikula bantu bena butumike, ne budisuile buonso Yezu wakafila muoyo wende, kufuaye lufu ludi lutamba kumupuekesha milongo ne lua dikenga dikole. Bushuwa, ‘pakamuenekeye mu tshifuanyikiji tshia muntu, yeye wakadipuekesha, wakalua mutumikidi too ne ku lufu, ku lufu mene lua pa mutshi [“wa tshinyongopelu,” NW].’ (Filipoi 2:8) Ntshilejilu kayipu mu dileja mutshima wa butumike!

Butumike bua pa mutu pa mutu ki mbukumbane to

Ki mbonso badi bambe mudibu bena butumike kudi Nzambi badi bamutumikile bushuwa nansha. Tangila Mukalenge Shaula wa mu Izalele wa kale. Nzambi wakamutumina dîyi bua kushipa bantu babi bena Amaleka. (1 Samuele 15:1-3) Nansha muvua Shaula mubabutule tshisamba tshijima, wakalekela mukalenge wabu ne kulama imue ya ku mikoko ne ngombe yabu. Samuele wakakonka ne: ‘Kuakatumikila dîyi dia Yehowa bua tshinyi?’ Mu diandamuna Shaula wakamba ne: ‘Bulelela ngakatumikila dîyi dia Yehowa. Bantu [ba mu Izalele] bakangata bia mu bintu biakapaulabu, mikoko ne ngombe biakatamba bulengele bua kuyishipelabu Yehowa.’ Muikale uzangika mushinga wa butumike bua tshishiki, Samuele wakandamuna se: ‘Yehowa udi utamba kusanka bua milambu ya kuosha ne nyama mishipa bu mudiye usanka bua kutumikila kua dîyi dia Yehowa anyi? Tangila, kutumikila kudi kupita mulambu wa kuosha ne kumvua kudi kupita manyi a bimpanga bulengele. Kutomboka kudi bualu bubi bu butempi bua mbuku ne tshitshu tshidi bu kutendelela kua mpingu ne manga a patupu. Bualu bua wewe wakapidia dîyi dia Yehowa yeye kabidi wakakupidia bua wewe kuikala mukalenge.’ (1 Samuele 15:17-23) Mmunyipu muakajimija Shaula bintu bivule bua dibenga kuikala ne mutshima wa butumike!

Nansha Mukalenge wa meji Solomo, uvua mulombe mutshima wa butumike, kakatungunuka ne kutumikila Yehowa. Bibengangane ne disua dia Nzambi, wakasela bakaji ba kua bende bakamusaka ku dienzela Nzambi mpekatu. (Nehemiya 13:23, 26) Solomo wakajimija dianyishibua dia kudi Nzambi bualu kakatungunuka ne kuikala ne mutshima wa butumike. Ndidimuija kayipu buetu tuetu!

Ebi kabiena biumvuija ne: Yehowa udi ulomba bupuangane kudi bantu bende badi bamusadila. ‘Udi uvuluka ne: tudi dimfuenkenya.’ (Musambu 103:14) Buonso buetu tudi bajadike ne: tutu tuenza bilema imue misangu, kadi Nzambi udi mua kumona né tudi bushuwa ne dijinga dikole dia kumusankisha. (2 Kulondolola 16:9) Bituenza tshilema bua dipanga bupuangane dia bumuntu kadi bikale tunyingalala, tudi mua kulomba dibuikidila ku diambuluisha dia mulambu wa tshia-bupikudi wa Yezu, bashindike ne: Yehowa ‘neatambe kubuikidila.’ (Yeshaya 55:7; 1 Yone 2:1, 2) Diambuluisha dia bakulu bena nkristo ba dinanga didi kabidi mua kukengedibua bua tumone mua kumvua bimpe mu nyuma ne kushala bakole mu ditabuja ne mutshima wa butumike.​—Tito 2:2; Yakobo 5:13-15.

Butumike buebe mbua tshishiki anyi?

Bu mutudi basadidi ba Yehowa, kakuyi mpata bavule ba kutudi tudi tumvua ne: tudi ne mutshima wa butumike. Tudi mua kuelangana meji ne: Tshitu ndifila mu mudimu wa dimanyisha Bukalenge anyi? Tshitu nshala mushindame padi bilumbu binene bijuka bu mudi tshia ndubidilu anyi? Ne tshitu mbuela pa tshibidilu mu bisangilu bia bena nkristo, bu muakabela mupostolo Paulo anyi? (Matayo 24:14; 28:19, 20; Yone 17:16; Ebelu 10:24, 25) Bulelela, bantu ba Yehowa mu ka-bujima batu baleja butumike bua muoyo mujima mu malu a mushinga bu nunku.

Kadi bidi munyi bua ngikadilu wetu mu malu a ku dituku dionso, pamu’apa mu malu adi amueneka bu makese? Yezu wakamba ne: “Muntu udibo mua kueyemena padiye ne bintu bikese badi mua kumueyemena padiye ne bintu bivule kabidi; muntu udibo kabayi mua kueyemena padiye ne bintu bikese, kabena mua kumueyemena padiye ne bintu bivule kabidi.” (Luka 16:10, MML) Pa nanku yonso wa kutudi udi ne bua kudikonka ne: Ntu ne mutshima wa butumike mu malu makese anyi mianda idi bakuabu kabayi mene bamanye anyi?

Mufundi wa misambu wakaleja ne: nansha munda mua nzubu wende, muvua bakuabu kabayi bamumone, ‘wakenda ne mutshima udi mululame tshishiki.’ (Musambu 101:2) Paudi musombe mu nzubu muebe, udi mua kukangula televizion ne kubanga kumona filme. Diakamue, butumike buebe budi mua kutetshibua. Filme udi mua kuikala ne malu a tshiendenda munda. Neutungunuke ne kutangila, udibingisha ne: eyi ke filme idibu baleja matuku aa anyi? Peshi mutshima webe wa butumike neukusake bua kutumikila mubelu wa mu Mifundu wa se: ‘kanulekedi masandi ne dipanga bukezuke bitedibua mene munkatshi muenu’? (Efeso 5:3-5, NW) Neukange TV, nansha bikala muanda udibu baleja ukusankisha anyi? Peshi neushintulule tudiomba padi ndongamu ulua wa malu a tshinyangu? Mufundi wa misambu wakimba ne: “[“Yehowa,” NW] udi uteta muakane ne mubi. Muoyo wende mmubenge munangi wa mvita.”​—Misambo 11:5, MMM.

Mutshima wa butumike udi upetesha mabenesha

Bushuwa, kudi bitupa bia bungi bia mu nsombelu wetu mutudi mua kudikonkonona mu mushindu muimpe bua kumona né tudi bushuwa tutumikila Nzambi ne muoyo mujima. Dinanga dietu bua Yehowa didi ne bua kutusaka bua kumusankisha ne bua kuenza tshidiye utuambila mu Bible, Dîyi diende. Mutshima wa butumike neutuambuluishe bua kulama malanda mimpe ne Yehowa. Bushuwa, bituikala bena butumike menemene, ‘mêyi a mukana muetu ne meji atudi tuela mu mutshima wetu neikale mitabujibue ku mêsu kua Yehowa.’​—Musambu 19:14.

Bu mudi Yehowa mutunange, udi utulongesha butumike bua diakalenga dietu. Ne tudi tupetelaku masanka a bungi pa kuteya ntema ne muoyo mujima ku dilongesha dia Nzambi. (Yeshaya 48:17, 18) Pa nanku, ne disanka dionso tuitabayi dikuatshisha didi Tatu wetu wa mu diulu utupesha ku diambuluisha dia Dîyi diende, spiritu wende ne bulongolodi buende. Tudi bikale tulongeshibua bimpe bienze bu se: tudi tumvua dîyi munyima muetu diamba ne: “Ke njila eu. Endelayimu.” (Yeshaya 30:21, NW) Bu mudi Yehowa utulongesha ku diambuluisha dia Bible, mikanda ya bena nkristo ne bisangilu bia tshisumbu, tuteyayi ntema, tutumikilayi bitudi tulonga ne tuikalayi “ne ditumikila mu malu onso.”​—2 Kolinto 2:9.

Mutshima wa butumike neutufikishe ku disanka divule ne mabenesha a bungi. Neutupeteshe ditalala dia mu lungenyi, bualu netumanye se: tudi tusankisha Yehowa Nzambi ne tupesha mutshima wende disanka. (Nsumuinu 27:11) Mutshima wa butumike newikale bukubi kutudi dîba ditudi batetshibue bua kuenza bualu bubi. Nenku tudi bushuwa ne bua kutumikila Tatu wetu wa mu diulu, ne tudi ne bua kusambila ne: “Udi ne bua kupa musadidi webe mutshima wa butumike.”

[Mêyi a dianyisha bua tshimfuanyi mu dibeji 29]

Biangata mu nkudimuinu wa Self-Pronouncing Edition of the Holy Bible, udi ne nkudimuinu wa King James ne Revised versions