Yezu “wakalonga ditumikila”

Yezu uvua anu utumikila Yehowa misangu yonso. (Yone 8:29) Kadi bua tshinyi Bible udi wamba ne: “Wakalonga ditumikila ku makenga avuaye mupete”?​—Eb. 5:8.

Pavua Yezu pa buloba, uvua mutuilangane ne malu avuaye kayi muanji kutuilangana nawu pavuaye mu diulu. Tshilejilu, bavua bamukoleshe kudi baledi bavua banange Nzambi kadi bikale bantu bapange bupuangane. (Luka 2:51) Bakamukengesha kudi bamfumu babi ba bitendelelu ne kudi bakokeshi babi. (Mat. 26:59; Mâko 15:15) Bualu bukuabu, wakalua kufua lufu lubi lutambe. Bible udi wamba ne: “Wakadipuekesha, kuluaye mutumikidi too ne ku lufu.”​—Filip. 2:8.

Malu onso au akalongesha Yezu ditumikila bishilangane ne muvuaye mulonge pavuaye mu diulu. Nunku uvua mua kulua Mukalenge mupuangane ne Muakuidi munene mupuangane uvua mua kutumvuila luse. (Eb. 4:15; 5:9) Malu avuaye mutuilangane nawu akamulongesha ditumikila, kuenzabi bua alue ne mushinga wa bungi kudi Yehowa. Tuetu petu tudi tulua ne mushinga wa bungi kudi Yehowa patudi tumutumikila nansha mu nsombelu mikole, ne neatumone bantu badi bakumbane bua kuenza midimu kayi yonso idiye mua kutupesha.​—Yak. 1:4.