Nkonko ya babadi
Mufundi wa Nsumuinu 30:18, 19 wakamba ne: “njila wa muntu mulume ne nsongakaji” ‘mmupite lumvu’ luetu. Ntshinyi tshivuaye usua kuamba?
Mêyi aa mmapitshile bantu ba bungi, too ne bamue bamanyi ba malu a mu Bible. Mu Bible wa Nkudimuinu wa bulongolodi bupiabupia mvese eu udi wamba ne: “Kudi bintu bisatu bidi bipite lumvu luanyi [anyi “bidi binkemesha bikole,” dim.], ne bintu binayi bindi tshiyi njingulula: Njila wa nyunyi wa mukanku muulu, njila wa nyoka pa dibue, njila wa mazuwa pa mbuu mualabale, ne njila wa muntu mulume ne nsongakaji.”—Nsu. 30:18, 19.
Kumpala tuvua tuamba mudi tshiambilu tshia ne: “njila wa muntu mulume ne nsongakaji” tshikale ne diumvuija dibi. Bua tshinyi? Mvese mikuabu ya mu nshapita eu idi yakula bua bintu bibi bitu kabiyi biamba ne: “Biakumbanyi.” (Nsu. 30:15, 16) Mvese wa 20 udi wakula bua “mukaji wa masandi” udi wamba mudiye kayi muenze bualu bubi. Ke bualu kayi tuakela meji ne: muntu mulume au udi mua kuenza bualu kakuyi muntu umanya tshidiye muenze anu bu nyunyi wa mukanku udi upapala, bu nyoka udi upitshila pa dibue, anyi bu mazuwa adi apita pa mbuu. Ke tshivua tshitufikishe ku diamba mudi tshiambilu tshia ne: “njila wa muntu mulume ne nsongakaji” tshikale ne diumvuija dibi dia ne: nsongalume udi wambisha nsongakaji, umudia lungenyi bua alale nende.
Kadi kudi malu adi atusaka bua kuamba ne: mvese eyi idi ne diumvuija dimpe. Mufundi uvua wakula bua bintu bilenga bivua bimukemesha.
Mikanda mikuabu ya mu tshiena Ebelu idi ileja payi ne: mvese eyi idi ne diumvuija dimpe. Bilondeshile diksionere kampanda, muaku wa mu tshiena Ebelu udibu bakudimune mu Nsumuinu 30:18 ne: ‘bipite lumvu luanyi udi uleja bualu budi bukemesha muntu bikole, wela meji ne: kabuena mua kuenzeka to.’
Crawford Toy, mulongeshi wa tshikunda mu iniversite wa Harvard mu États-Unis wakaleja pende ne: mvese eyi kayena ne diumvuija dibi to, bualu wakamba ne: “Mufundi wa mvese eyi mmutelamu bintu bilenga bidi bikemesha.”
Nunku mbikumbane bua tuetu kuamba ne: Nsumuinu 30:18, 19 udi wakula bua bintu bilenga bia dikema bidi bipite lumvu luetu. Mufundi wa mvese eyi uvua ukema bua mushindu utu nyunyi wa mukanku upapala muulu, utu nyoka udikoka pa dibue lubilu pende kayi ne makama, utu mazuwa manene endela pa mâyi a mbuu, ne utu nsongalume ne nsongakaji banangangana, pashishe basomba pamue ne disanka. Nansha tuetu petu bidi bitukemesha.