Wa kudiwula nnganyi?

Bantu ba bungi badi badiwula Nzambi bua ntatu yabu. Lusumuinu lua mu Bible ludi luamba ne: ‘Bupote bua muntu budi bunyanga njila wende; mutshima wende udi ukuatshila Yehowa tshiji.’ (Nsumuinu 19:3) Pabi, kuangata Nzambi bu mukebeshi wa makenga a bantu kudi bu kudiwula muenji wa mashinyi bua njiwu mivule idi ba-kanyemesha bakuatshike maluvu benza.

Nzambi mmupeshe bukua-bantu buludiki bua mushinga mukole mu Bible, Dîyi diende. Mu dilonga nsangilu eu wa mikanda ya kudi Nzambi ne mu dikala ne nsombelu mumvuangane ne mikenji ne mêyi-maludiki bidiye uleja, tudi mua kuepuka mateyi a bungi a mu nsombelu. Kadi kuenza malu kaayi mu diumvuangana ne buludiki bua Nzambi kudi kupatula bipeta bibi menemene. Tshilejilu, aba badi banekesha mu didia, banua makanya, banua maluvu bapitshisha, anyi baditua mu tshiendenda batu misangu mivule bapeta bipeta bibi ku mubidi. (Luka 21:34; 1 Kolinto 6:18; 2 Kolinto 7:1) Paulo, mupostolo muena nkristo wakafunda ne: ‘Tshintu tshionso tshidi muntu ukuna, ntshiotshi tshiapuoleye. Muntu udi ukunyina mubidi wende bintu neapuolele mubidi wende bintu bibole; kadi muntu udi ukunyina [“spiritu,” NW] bintu, neapuole muoyo wa tshiendelele bua [“spiritu,” NW].’​—Galatia 6:7, 8.

Bushuwa mbitambe buimpe bua kuikala ne nsombelu mumvuangane ne mikenji ne mêyi-maludiki bia Nzambi. Bituenza nunku, netumone bulelela bua dilaya dia Nzambi diamba ku butuangaji bua muprofete Yeshaya ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bua kuendela. Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene.’​—Yeshaya 48:17, 18.