Mariya wakafua bu mutu bantu bonso bafua anyi?

BILONDESHILE tshikandakanda kampanda (L’Osservatore Romano) tshia mu Vatican, dilongesha dia bena Katolike dia Diambuibua didi diamba ne: “Pakajika matuku ende a muoyo pa buloba, Virgo kayi kalema, mukuba ku ditoba dionso dia mpekatu wa ku ntuadijilu, wakambuibua ne mubidi ne anyima mu butumbi bua mu diulu.” Dilongesha edi ndifikishe bamue bena teoloji bena Katolike ku diamba ne: Mariya “kakafua ne bakamuambula diakamue ne muoyo pa buloba kuyabu nende too ne mu butumbi bua mu diulu,” ke mudi tshikandakanda atshi tshiamba.a

Matuku adi panshi aa, Pape Jean-Paul II mmufile diumvuija dikuabu pa muanda eu. Mu Tshisangilu Tshinene tshia mu Vatican mu dia 25 Kabalashipu 1997, wakamba ne: “Dipungila Dipiadipia kadiena difila mamanyisha pa lufu lua Mariya to. Dipanga kuakula pa bualu ebu didi difikisha bamue bantu ku difuikakaja ne: lufu luende luakenzeka bu pa tshibidilu, kakuyi diumvuija dia pa buadi didi ne mushinga bua kudileja. . . . Mmuenenu idi isua kuleja ne: ki mmufue lufu lua bantu bonso idi imueneka kayiyi ne nshindamenu.”

Mêyi a Pape Jean-Paul II adi ajula tshilumbu tshinene mu dilongesha dia Dimitshibua kadiyi Kalema. Bikala Mariya uvua “mukuba ku ditoba dionso dia mpekatu wa ku ntuadijilu,” mmunyi muvuaye mua kufua “lufu lua bantu bonso,” ludi lufumina ku mpekatu musambuluja kudi Adama muena mpekatu? (Lomo 5:12) Nshinga eu mukole wa teoloji mmufumine ku mmuenenu mukonyangale wa Ekleziya Katolike bua mamuende wa Yezu. Kabiena bikemesha mudi ditapuluka ne dikondakana bijuke munda mua Ekleziya Katolike pa muanda eu to.

Nansha mudi Bible uleja Mariya bu muena bupuekele, muena lulamatu ne muena didifila, kêna usuikakaja ngikadilu eyi ne “dimitshibua kakuyi kalema” to. (Luka 1:38; Bienzedi 1:13, 14) Bible udi wamba patoke ne: ‘Bonso bakenza malu mabi, ne badi bapanga kupeta butumbi kudi Nzambi.’ (Lomo 3:23) Eyowa, Mariya wakapiana mpekatu ne dipanga bupuangane anu bu bantu bonso, ne kakuena tshijadiki tshia se: kavua mufue bu mutu bantu bonso bafua.​—Fuanyikija ne 1 Yone 1:8-10.

[Mêyi adi kuinshi]