Nkonko ya babadi

Bilondeshile Matayo 17:20, bapostolo bakapangila bua kuondapa nsongalume uvua mutatshishibue ‘bua ditabuja diabu dikese.’ Kadi mu Mâko 9:29, dipangila diabu ndilamakaja ku mushinga wa disambila. Bua tshinyi mbafile tubingila tushilangane mu Evanjeliyo eyi?

Bushuwa, miyuki ibidi eyi idi ikumbajangana, kayena ibengangana to. Tshia kumpala, tangila mu Matayo 17:14-20. Muntu kampanda wakamba ne: muanende wa balume uvua ne mpalu ne se: bayidi ba Yezu bavua bapangile bua kuondapa nsongalume eu. Pashishe Yezu e kuondapaye muana wa balume eu pa kuipata demon uvua umukengesha. Bayidi bakakonka bua tshinyi kabavua mua kuipata demon eu. Bilondeshile muyuki wa Matayo, Yezu wakandamuna ne: ‘Bualu bua ditabuja dikese dienu. Bulelela, ndi nnuambila ne: Binuikala ne ditabuja bunene bua lutete lua mutada, nenuambile mukuna eu ne: Umukaku, ya kuaka, neumuke; kakuena bualu budi mua kunukolela.’​—Disendamija miaku ndietu.

Mpindieu bulula mu Mâko 9:14-29, mutudi tusangana mumvuija a bungi. Tshilejilu, Mâko 9:17 udi ufila diumvuija ne: mu muanda eu mpalu ivua mikebesha kudi spiritu mubi. Mbia mushinga bua kubambisha mudi Bible wamba munga muaba ne: Yezu wakuondapa bena mpalu ne bantu bakuate kudi ba-demon. (Matayo 4:24) Mu nsombelu eu wa pa buende, dipaluka edi divua dikebesha kudi “nyuma mubi wa kamama,” mmumue ne: spiritu mubi, udi munganga Luka ujadika bualu buende. (Luka 9:39; Kolosai 4:14) Tangila mu Markuse 9:18 (MMM) tshiambilu tshia: “Muaba wonso udiye [demon] umukuatshila.” Demon eu kavua utatshisha nsongalume dîba dionso to, kadi uvua umutatshisha anu ku misangu. Nansha nanku, bayidi kabavua mua kuipata demon ne nenku kuondapa nsonga eu to. Pakamuebejabu kabingila, Yezu wakandamuna ne: ‘Wa mushindu ewu badi bamuipata amu ne disambila.’

Kadi dibala ne ntema muyuki wa Mâko didi dileja ne: kakuena dibengangana ne tshivua Matayo mufunde. Mu Mâko 9:19, tudi tubala ne: Yezu wakanyingalala bikole bua dipanga ditabuja dia tshipungu atshi. Ne mu mvese wa 23, mbafundemu mêyi avuaye muambile tatuende wa nsongalume eu ne: ‘Bitabuja muntu, malu onso adi mua kumuenzekela.’ Nenku Mâko kabidi udi wela kashonyi pa mushinga udi nawu ditabuja. Bidi bushuwa se: mu mvese wa 29 Mâko udi ufila diumvuija dia pa mutu. Mâko udi usakidila tshiakamba Yezu bua disambila, tshivua Matayo anyi Luka kabayi bafunde.

Nenku, ntshinyi tshitudi mua kuamba? Mu bikondo bikuabu bapostolo bonso 12 ne bayidi 70 bakipata spiritu mibi. (Mâko 3:15; 6:13; Luka 10:17) Kadi mu nsombelu eu bayidi kabavua mua kuipata demon eu nansha. Bua tshinyi? Bituasangisha malu maleja mu miyuki mivule, tudi ne bua kukoma ne: kabavua badilongolole bua kuenza bualu bua nunku to. Pamu’apa ndambu wa lutatu uvua utangila mushindu wa demon, bualu bidi bimueneka ne: ba-demon badi mua kuikala bashilangane mu bumuntu, bipatshila ne nansha makokeshi. Bua demon eu, bivua bikengela nangananga ditabuja dikole ne disambila dia tshisumi bua kupeta diambuluisha dia Nzambi. Bushuwa, Yezu uvua ne ditabuja dia mushindu’eu. Uvua kabidi ne dikuatshisha dia kudi Tatuende, Muteleji wa masambila. (Musambu 65:2) Yezu uvua mua kuondapa ne bushuwa wakuondapa nsongalume eu uvua mutatshishibue pa kuipata demon.