‘Wakalela mamata a lumume nnganyi?’

KAMONA-KAMBA kampanda wa mu siekele wa 19 wakumvuija mamata a lumume bu “bilengejilu bia muengungu bia buloba, bienza kudi lupepele.” Mufuki wetu wakebeja nkambua wa kale Yobo ne: ‘Wakalela mamata a lumume nnganyi?’ (Yobo 38:28) Nzambi uvua uvuluija Yobo bua mudi lumume lua mushinga mukole lufume kudi Nzambi.

Pa kumbusha dibalakana ne buimpe bualu bufuane bua bilengejilu, mu Bible lumume ludi luleja dibenesha, bufuke, dibodiodioka dia bintu ne dikuba muoyo. (Genese 27:28; Dutelonome 33:13, 28; Zekâya 8:12) Mu tshikondo tshia luya mu Izalele, mu muvu udi kauyi mvula, ‘mume ya ku mukuna wa Hêmona’ ivua ilama bisosa ne mitshi bia mu mpata​—ne bantu kabidi. Bitupa bia mukuna wa Hêmona bidi ne mêtu ne neje bidi bipatula lubungibungi lua butuku ludi lukuatakana bua kuenza lumume luvule. Mufundi wa misambu Davidi wakafuanyikija tshitalele tshifila kudi lumume elu ne muanda mulenga wa kusomba mu buobumue ne batendeledi netu ba Yehowa.​—Musambu 133:3.

Mêyi a muprofete Mozese mambila Izalele avua mimpe ne afila tshitalele bu mamata a lumume. Wakamba ne: ‘Diyisha dianyi dimate panshi bu mvula, ne mêyi anyi akudimuke bu mume; bu mvula mukese pa mashinde a nseku, bu mvula wa mudimbi pa midioko.’ (Dutelonome 32:2) Lelu’eu, Bantemu ba Yehowa badi bamanyisha lumu luimpe ludi lufila muoyo lua Bukalenge bua Nzambi too ne ku mfudilu kua buloba. (Matayo 24:14) Nzambi udi walabaja dibikila ne: ‘Lua. Udi umvua, ambe biende ne: Lua. Ne udi ne nyota, alue biende; udi musue angate mâyi a muoyo tshianana.’ (Buakabuluibua 22:17) Bantu miliyo mivule ba mu bisamba bionso badi bitaba difila edi dia tshitalele tshia mu nyuma tshia kudi Nzambi, tshidi mua kulama muoyo kashidi.