Mudimu udi “kauyi mua kupanga kufila kanemu”

MUPOSTOLO Petelo wakabela bena nkristo nende ne: “Nuikale ne bienzedi bienu bimpe munkatshi mua bisamba bia bende, bualu bua, mu mianda idibo banusonguela nuenu bu benji ba malu mabi, bobo batumbishe Nzambi.” (1 Petelo 2:12) Munkatshi mua bidimu bivule Bantemu ba Yehowa mu Italie mbaleje patoke bienzedi bimpe bia mushindu’eu. Mu diumvuangana ne dîyi dia Yezu bua ‘kuyisha pa misonga ya nzubu,’ badi benza midimu yabu yonso ya Buena-nkristo patoke, ku mêsu kua bantu bonso. (Matayo 10:27, NW; Yone 18:20) Nenku, pavua mulumbuluidianganyi muena Italie ne nsaserdose kampanda batangalaje dibanda dia se: Bantemu ba Yehowa “mbena kasumbu ka dishima ka malu a Nzambi” ne babateke mu mulongo wa “nsangilu misokome idi ikuata bantu mu buteyi,” Bantemu bakapangadija bua kufunda tshilumbu ku kabadi bua mêyi aa a dinyangilangana lumu.

Mu dilumbuluisha dia kumpala, kabadi kakakosa ne: mulumbuluidianganyi eu ne nsaserdose kabavua batupe ku mukenji nansha umue to. Kadi mu dia 17 Kashipu 1997, Kabadi Kanene ka ku Venice kakabenga dipangadika dia kabadi ka kumpala, kakasangana se: babandianganyi aba bonso babidi bavua ne tshibawu. Kabadi Kanene kakamba ne: “Biena-bualu bionso bibidi bipatula bidi ne mêyi ne biambilu bidi mua kunyanga bushuwa lumu lua balondi ba tshitendelelu tshia ‘Bantemu ba Yehowa.’ Bidi bimueneka bilelela ne: tshipatshila tshia biena-bualu ebi ntshia kufikisha bantu ku dipetula Bantemu.” Kabadi aka kakamba ne: biena-bualu ebi “kabiena bileja ditumika ne bunême bua kulonda malu ne kusendeka dianyisha mu mikenji.” Kabadi kakakosela banyangidianganyi ba lumu babidi aba tshibawu tshia difuta ne kakabatumina kabidi dîyi bua kufuta mfranga yonso ya kabadi, kukonga ne mfranga yonso ivua Bantemu batule bua bilumbu bionso bibidi.

Mu dilumbuluisha diaku difunda, Kabadi Kanene ka ku Venice kakumvuija ne: “Kudi mushindu wa kukanda diluisha mitabuja makuabu ne dinanga dinekesha dia bitendelelu anu mu dikolesha ne mu dikuba manême onso majadika kudi Tshibungu tshia mêyi ne mikandu tshia [bena Italie].” Dipangadika edi didi ditaba ne: mudimu wa Bantemu ba Yehowa ki ng’wa mu musokoko anyi wa tshitendelelu tshia dishima. Kabadi kakamba ne: “Kuteka Bantemu mu mulongo wa nsangilu misokome kakuena nansha kunemeka bulelela bua kale, bualu tshitendelelu tshidibu bamanyisha tshidi mu bimenga bivule ne mudimu mutangalake wa dikudimuisha mitshima udi benamu benza, nangananga mu Dia lumingu ne matuku makuabu a diikisha, mmumanyike bimpe ne kawena mua kupanga kufila kanemu bua madikolela menza, nansha muntu muele meji a mushindu kayi pa malongesha adibu bayisha.” Nenku, muyuki wa diyisha dia lukunukunu ne bienzedi bia tshitembu bia Bantemu ba Yehowa mu Italie mbiambuluishe bua kumbusha meji mabi mabelela.​—Matayo 5:14-16; 1 Petelo 2:15.