Udi muvuluke anyi?

Udi mubale ne ntema nimero ya ndekelu ya Tshibumba tshia Nsentedi anyi? Pikalabi nanku, nebikusankishe bua kuvuluka malu adi alonda aa:

◻ Bua tshinyi dilongesha dia tshimana-kulongolola ki ndia meji?

Bu Nzambi mudianjile kumanya ne mulongolole dipona dia Adama mu mpekatu, nenku Yehowa mmulue mukebeshi wa mpekatu pakafukaye muntu ne uvua mua kuikala muambule bujitu bua bubi buonso ne makenga a bantu. Bualu ebu kabuena mua kumvuangana ne muanda wa se: Yehowa n’Nzambi wa dinanga udi mukine bubi. (Musambu 33:5; Nsumuinu 15:9; 1 Yone 4:8)​—15/4, mabeji 7, 8.

◻ Mu dikumbana dia Yeshaya 2:2-4, ntshinyi tshidi bantu ba mu matunga mavule benza?

Bu mudibu batshimukila ku nzubu wa Yehowa wa ntendelelu, badi kabidi badikanda ku ‘diyila lungenyi lua kuluangana nalu mvita’ bualu mbateke dieyemena diabu mu bukubi bua biluilu bia Nzambi bia mu diulu, bikadi pabuipi ne kubutula baluishi bonso ba ditalala.​—15/4, dibeji 30.

◻ Bena bukitu ba Nzambi badibu batele mu Yoele 3:10, 11 mbanganyi?

Misangu mitue ku 280 mu Bible, badi babikila Nzambi mulelela ne: “Yehowa wa biluilu.” (2 Bakelenge 3:14, NW) Biluilu ebi mbisumbu bia banjelu ba bukole ba mu diulu, badi badiakaje bua kuenza mêyi-matuma a Yehowa.​—1/5, dibeji 23.

◻ Ndilongesha kayi ditudi mua kupetela ku dilomba dia Yehowa bua Yobo kusambidilaye aba bavua bamuenzele bibi? (Yobo 42:8)

Bangabanga ne Yobo kupetululaye makanda a mubidi, Yehowa wakamulomba bua kusambidilaye aba bavua bamuenzele bibi. Ebi bidi bileja ne: Yehowa udi utulomba bua tubuikidile aba badi batuenzela mpekatu kumpala kua kutubuikidilaye yetu. (Matayo 6:12; Efeso 4:32)​—1/5, dibeji 31.

◻ Ntshinyi tshivua Yakobo usua kumvuija pakambaye ne: ‘Ditantamana dikale ne mudimu wadi muimpe tshishiki’? (Yakobo 1:4)

Ditantamana didi ne bualu bua kuenza, “mudimu.” Mmudimu wa kutuvuija bakumbane mu malu onso. Pa nanku, mu dilekela mateta alonda njila wawu kakuyi ditumika ne mishindu idi kayiyi yumvuangana ne Mifundu bua kuafikisha ku ndekelu ne lukasa, ditabuja dietu didi ditetshibua ne dilengejibua.​—15/5, dibeji 16.

◻ Bua tshinyi Nzambi mmuindile mutantshi bule nenku bua kujikija ntatu ya bukua-bantu?

Mmuenenu wa tshikondo wa Yehowa mmushilangane ne wetu. Bua Nzambi wa tshiendelele, tshikondo tshia kubangila ku difukibua dia Adama too ne mpindieu katshiena nansha tshienza lumingu lumue. (2 Petelo 3:8) Kadi nansha tuetu bikale ne mmuenenu kayi wa tshikondo, dituku dionso didi dipita didi ditusemeja pabuipi menemene ne dituku dia dibingisha dia Yehowa.​—1/6, mabeji 5, 6.

◻ Ntshinyi tshidi tshisaka Bantemu ba Yehowa?

Dilongesha dia Yehowa ndipatule bantu basunguluke, balongesha bua kunangangana ne kunanga muntu nabu bu buobu bine. (Yeshaya 54:13) Dinanga ke tshintu tshidi tshisaka Bantemu ba Yehowa bua kutungunuka ne kuyisha nansha mudiku kalèngù ne buluishi. (Matayo 22:36-40; 1 Kolinto 13:1-8)​—15/6, dibeji 20.

◻ Ntshinyi tshidi mêyi a Yezu aa umvuija: “Dienzejayi bikole nuenu bine bua kubuelela ku tshiibi tshibulakane”? (Luka 13:24, NW)

Mêyi a Yezu adi umvuija kuluangana, kuenza muetu muonso. Mêyi ende adi kabidi aleja ne: bamue badi mua kukeba bua ‘kubuelela ku tshiibi’ anu dîba didibu basue, benda bitekete mudibu basue. Nenku yonso wa kutudi udi mua kudikonka ne: ‘Ntu ndifila ne lukunukunu ne mitalu anyi?’​—15/6, dibeji 31.

◻ Mmunyi muikala bantu babiishibua mua ‘kulumbuluishibua bilondeshile malu mafunda mu mivungu, bilondeshile bienzedi biabu’? (Buakabuluibua 20:12, NW)

Mivungu eyi ki mmukanda wa bienzedi biabu bia kale to; pakafuabu bavua babingishibue ku mpekatu ivuabu benze patshivuabu ne muoyo. (Lomo 6:7, 23) Nansha nanku, bantu babiishibua nebikale batshidi muinshi mua mpekatu wa mu Adama. Nenku bidi ne bua kuikala se: mivungu eyi neyipatule mêyi a Nzambi adi bonso ne bua kulonda bua kumona mua kupetela masanka mavule ku mulambu wa Yezu Kristo.​—1/7, dibeji 22.

◻ Mufuanu wa Yezu wa Muena Samariya muena muoyo muimpe udi ne malongesha kayi buetu tuetu? (Luka 10:30-37)

Mufuanu wa Yezu udi uleja ne: muntu udi muakane bulelela ng’eu udi utumikila ki ng’anu mikenji ya Nzambi kadi udi widikija ngikadilu yende kabidi. (Efeso 5:1) Udi kabidi uleja ne: muoyo muimpe wetu udi ne bua kusambuka mikalu yonso ya ditunga, nshidimukilu ne tshitendelelu. (Galatia 6:10)​—1/7, dibeji 31.

◻ Mmu bitupa kayi bisatu muudi mua kumanya bana bebe ne kubapesha buludiki bua buledi?

(1) Ambuluisha bana bebe bua kusungula mudimu muakanyine wa ku mubidi; (2) balongolola bua kutantamena dibungama dia mu mpampakenu mu tulasa ne ku mudimu; (3) baleja mushindu wa kukumbaja bidibu bakengela mu nyuma.​—15/7, dibeji 4.

◻ Bua tshinyi Nzambi wakikisha “dituku dia muanda mutekete”? (Genese 2:1-3)

Nzambi kavua muikishe bua dipungi nansha. Kadi, wakimanyika mudimu wa bufuki wa pa buloba bua kumona mua kulekela mudimu wende ulubuluka ne ufika ku butumbi bua tshishiki, bua dimusamuna ne lumu luende.​—15/7, dibeji 18.

◻ Mmu mishindu kayi isatu mutudi mua kuleja buakane?

Tshia kumpala: tudi ne bua kuikala ne nsombelu mumvuangane ne mêyi-makulu a Nzambi a tshikadilu tshimpe. (Yeshaya 1:17) Tshibidi: tudi tuleja buakane patudi tuenzela bakuabu malu mu mushindu utudi basue bua Yehowa atuenzele. (Musambu 130:3, 4) Tshisatu: tudi tuleja buakane bua Nzambi patudi tudifila ne tshisumi mu mudimu wa buambi. (Nsumuinu 3:27)​—1/8, mabeji 15, 16.