Udi mua kusunguluja tshimpe ne tshibi anyi?

“Meme nkayanyi mvua mushipe bantu batue ku 25. . . . Butuku buonso, dituku dionso, ntu ne tshimfuanyi tshia bualu abu mu lungenyi luanyi. Ntu ndota malu makuate buôwa. . . . Ndi mua kuya muaba kampanda ne kumona mpala udi umvuluija bantu bamvua mushipe. Ndi mmona bualu abu mu lungenyi luanyi, anu bu buenzeke lelu’eu, anu mpindieu. . . . Tshiena mua kudibuikidila bua malu angakenza to.”​—S.V.

“Bavua bantumine dîyi bua kuyamu ne kushipa muluishi. . . . Tshivua musombe panshi bua kuela meji bua baluishi bu balume, bakaji ne bana to. . . . Musangu au ngakamona ne ntshidi mmona ne: ngakenza anu muvuabu bangambile, ne ngakakumbaja mêyi avuabu bantumine ne tshiena mmona bualu bubi mu dienza nenku to.”​—C.W.

MU DIA 16 Luabanya 1968, balume babidi batela kuulu eku bavua benze tshivuabu mua kubikila pashishe ne: tshibawu tshia mvita tshiende lumu lubi. Pamue ne basalayi bakuabu, bakabuela mu musoko mukese wa mu ditunga dia Viêt-nam ne kushipabu bena ditunga nkama mivule​—kusambakaja ne bakaji, bana ne bakulakaje. Kadi tangila mandamuna mashilangane a basalayi aba babidi. Musalayi wa kumpala udi bushuwa mulubakaja kudi tshivuaye muenze. Muibidi udi umona se: bienzedi biende bivua ne kabingila. Mmunyi mudi bantu babidi mua kumona bishilangane nunku bua bualu bua muomumue?

Diandamuna didi ditangila kuondo ka muoyo​—bukokeshi bua mu muoyo bufila kudi Nzambi budi butuambuluisha bua tuetu kuditangila bimpe menemene ne kukonkonona bienzedi ne meji etu. Kuondo ka muoyo ntshiumvuilu tshietu tshia munda tshia tshidi tshimpe ne tshibi.

Patubu bangata mapangadika, bamue bantu batu banyemena ku dîyi dia se: “Kuondo kebe ka muoyo kakulombole.” Kadi bia dibungama, kuondo ka muoyo kakatu misangu yonso ka kueyemena nansha. Bushuwa, bantu ba bungi mbalengulule ne mbenze mene malu a tshikisu makuate buôwa, ne kuondo kabu ka muoyo ki nkabalubakaje nansha kakese. (Yone 16:2; Bienzedi 8:1) Anu muvua Samuel Butler, mufundi wa malu a mianu wa mu Angleterre, muambe umue musangu ne: kuondo ka muoyo “kadi diakamue kalekela kuakuisha aba badi kabayi basue kukateleja.”

Udi mua kueyemena kuondo kebe ka muoyo anyi? Diandamuna ndisuikila nangananga ku mushindu muimpe uudi mukalongeshe, bu mualeja tshiena-bualu tshidi tshilonda.

[Mêyi a dianyisha bua tshimfuanyi mu dibeji 3]

Mvita kuulu eku: U.S. Signal Corps photo