Mvita yakabutula siekele wa 19

1914

MU DIELA meji pa milenyume mupiamupia, Charley Reese, mufundi wa ngumu mu tshikandakanda tshia The Orlando Sentinel, wakafunda ne: “Mvita ya mu 1914-18 yakabutula siekele wa 19 ki mmianji kujika to.” Tshivuaye usua kuamba ntshinyi? Wakumvuija ne: “Miyuki ya kale ki mmilombola kudi matuku a ngondo to. Siekele wa 19​—udibu bumvuije bu tshisumbu tshia mitabuja, malu mafuanyikija, mmuenenu ne malu a mu nsombelu—​kavua mujike mu dia 1 Tshiongo 1901 nansha. Wakajika mu 1914. Ke tshikondo tshiakatuadija kabidi siekele wa 20, mumvuija mushindu wa muomumue. . . .

“Pabuipi ne bimvundu bionso bitudi bapetangane nabi mu matuku etu onso a muoyo mbifume ku mvita ayi. Pabuipi ne mianda yonso ya mamanya ne ngenyi bitudi bamone mbifume anu ku mvita ayi. . . .

“Ndi ngela meji ne: yakakebesha tshinyangu etshi bualu yakumbusha ditaba dia bantu dia se: bukua-bantu budi mua kukontolola ntuadijilu wabu too ne ndekelu. . . . Mvita yakafikisha bantu ku dilekela ditaba adi dia dishima. Muntu nansha umue wa ku baluishanganyi kavua muele meji ne: bivua mua kuenzeka mushindu’au to. Mvita eyi yakabutula ampire wa bena Grande-Bretagne ne wa bena France. Yakashipa bantu batambe bulenga ba munkatshi mua bena Grande-Bretagne, bena France ne bena Allemagne. . . . Mu katupa kakese, yakashipa bantu miliyo 11.”

Munkatshi mua bidimu bipite pa 120, Bantemu ba Yehowa mbafunkune 1914 bu ndekelu wa tshiakabikila Yezu ne: “bikondo bijadika bia bisamba.” (Luka 21:24, NW) Mu tshidimu atshi, bakateka Yezu Kristo mubiishibue ne mutumbishibue mu nkuasa wa bumfumu bu Mukalenge wa Bukalenge bua mu diulu. Ku diambuluisha dia Bukalenge abu, Yehowa Nzambi neajikije bua kashidi makenga onso adi mu siekele eu.​—Musambu 37:10, 11; Muambi 8:9; Buakabuluibua 21:3, 4.

[Mêyi a dianyisha bua tshimfuanyi mu dibeji 32]

U.S. National Archives photo