“Bulelela nebunupe budikadidi”
“Nenumanye bulelela ne bulelela nebunupe budikadidi.” Ke muakamba Yezu pavuaye ulongesha misumba ya bantu mu ntempelo wa mu Yeruzaleme. (Yone 8:32, Muanda Mulenga Lelu) Bapostolo ba Yezu bavua mua kuitaba bipepele malongesha a Yezu bu bulelela. Bavua bamone bijadiki bivule bivua bileja ne: mulongeshi wabu uvua mufumine kudi Nzambi.
KADI lelu’eu, bamue badi mua kumona bikale bikole bua kuitaba bulelela buvua Yezu wamba. Anu bu mu matuku a muprofete Yeshaya, lelu’eu kudi ‘badi babikila bualu bubi ne: mbualu buakane, ne bualu buakane ne: mbubi; badi babala mîdima bu munya, badi babala munya bu mîdima; badi babala bintu bia bululu bu bintu bishême ne bintu bidi bishême bu bintu bia bululu!’ (Yeshaya 5:20) Bikale ne mmuenenu, nkindi ne nsombelu kabukabu bidibu batangalaja matuku etu aa, bantu ba bungi badi bela meji ne: malu onso adi nanku nanku ne se: kakuena tshintu tshidi tshikale bu bulelela to.
Pavua Yezu muambile bamuteleji ne: bulelela buvua ne bua kubapa budikadidi, bakandamuna pa kuamba ne: “Tuetu tudi tunkanunuina tua Abalahama ne katuena banji kuikala bapika ba bantu nansha. Mmunyi muudi utuamba ne: ‘Nebanupe budikadidi’?” (Yone 8:33, MML) Kabavua ne dijinga bua muntu kampanda anyi tshintu kansanga kubapa budikadidi to. Kadi pashishe Yezu wakumvuija ne: ‘Bulelela, bulelela, ndi nnuambila ne: Muntu yonso utu wenza bubi udi mupika wa bubi.’ (Yone 8:34) Bulelela buvua Yezu wamba budi mua kunzulula njila udi ufikisha ku dipikudibua ku mpekatu. Yezu wakamba ne: “Bianupa Muana budikadidi, nenuikale badikadile bulelela.” (Yone 8:36, MML) Nenku bulelela budi bupikula bantu mbulelela budi butangila Yezu Kristo Muana wa Nzambi. Anu muntu muleje ditabuja mu mulambu wa muoyo wende wa bumuntu bupuangane ke kushishaye kupikudibua ku mpekatu ne lufu.
Musangu mukuabu Yezu wakamba ne: ‘Ubajidile mu bulelela: dîyi diebe mbulelela.’ (Yone 17:17) Dîyi dia Nzambi, anu bu mudidi dileja mu Bible, mbulelela budi mua kupikula ku bitabataba ne ku ntendelelu wa dishima. Bible udi ne bulelela budi butangila Yezu Kristo, budi bufikisha bantu ku dimuitabuja ne bunzulula njila udi ufikisha ku ditekemena dilenga dia matuku atshilualua. Mbualu bulenga bua kufika ku dimanya bulelela bua mu Dîyi dia Nzambi!
Bua tshinyi mbia mushinga mukole bua kumanya bulelela? Nansha mudi bitendelelu bivule lelu’eu biamba mudibi bilonda Bible, mbitambe kuikala ku buenzeji bua nkindi ne bilele bia bantu. Misangu mivule bamfumu ba bitendelelu badi bamueneka batamba kuditatshisha bua bantu kubitababu kupita mudibu baditatshisha bua bujalame bua mukenji wabu. Bamue batu bela meji ne: Nzambi utu wanyisha ntendelelu yonso, pikalaye muenza ne muoyo mujima. Kadi Yezu Kristo wakumvuija ne: “Dîba nedilue, ne didiku mpindieu, dikala batendeledi balelela mua kutendelela Tatu ne spiritu ne bulelela, bushuwa bualu Tatu udi ukeba bua bantu ba nunku bamutendelele.”—Yone 4:23, NW.
Bituasua kutendelela Nzambi mu mushindu udiye muanyishe, tudi ne bua kumanya bulelela. Ebu mbualu bua mushinga. Diakalenga dietu dia kashidi ndisuikilaku. Nenku muntu yonso udi ne bua kudikonka ne: ‘Ntendelelu wanyi mmuanyishibue kudi Nzambi anyi? Ndi bushuwa ne dijinga dia kulonga bulelela bua mu Dîyi dia Nzambi anyi? Peshi ndi ntshina tshikala dikebulula dienza ne ntema mua kusokolola?’