Bulelela butshidi kabidi ne mushinga anyi?

Pamuapa bidi bikukolela bua kutapulula malu malelela ne a dishima anyi? Lelu bidi bimueneka ne: bantu badi bitabuja malu bilondeshile mushindu udibu badiumvua ne tshidi meji abu abambila pamutu pa kulonda bulelela ne mudi malu. Tshilejilu, lelu pa buloba bujima, bantu ba bungi badi bamba ne: bulelela kabuenaku to.

Ngelelu wa meji eu ki mmupiamupia nansha. Kukadi bidimu bitue ku 2 000 bivua nguvena muena Lomo Pontio Pilato muele Yezu lukonko ne kapeja ne: “Bulelela ntshinyi?” (Yone 18:38) Nansha muvua Pilato kayi muindile diandamuna dia Yezu, lukonko luende alu luvua ne mushinga. Bible udi uluandamuna mu mushindu udi pamuapa mua kukusankisha. Udi mua kukuambuluisha bua kumanya malu malelela ne a dishima mu buloba mudi bantu mu tshibuejakaji emu.

Bulelela butuku anyi?

Eyowa. Mu Bible muaku “bulelela” udi umvuija tshintu tshidi tshishindamena pa bijadiki ne tshidi tshiakane. Bible utu ulongesha ne: Yehowaa ke Muena bulelela budi kabuyi ne mikalu. Udi umubikila ne: “Nzambi wa bulelela.” (Misambu 31:5) Mu Bible ke mudi bulelela bua kudi Nzambi, udi ufuanyikija bulelela abu ne butoke, bualu budi mua kutulombola munkatshi mua bantu badi mu tshibuejakaji mu malu onso lelu eu.​—Misambu 43:3; Yone 17:17.

Mmunyi muudi mua kumanya bulelela?

Nzambi ki mmusue tuitabe bulelela bua mu Bible bu bantu bajika tshilamba kuîsu to. Kadi udi utulomba bua kubukonkonona ne tshieledi tshietu tshia meji pamutu pa kulonda lungenyi luetu. (Lomo 12:1) Mmusue bua tumumanye ne tumunange ne ‘lungenyi luetu luonso.’ Udi utulomba kabidi bua tudijadikile nkayetu ne: malu atudi tulonga mu Bible mmalelela.​—Matayi 22:37, 38; Bienzedi 17:11.

Mashimi akafumina kuepi?

Bible udi uleja ne: muena lukuna wa Nzambi Satana Diabolo udi Bible ubikila ne: “tatu wa dishima” ke wakatuadija ne mashimi. (Yone 8:44) Wakashiminyina Nzambi malu kudi bantu ba kumpala. (Genese 3:1-6, 13, 17-19; 5:5) Kutuadijila ku tshikondo atshi, Satana udi utungunuka ne kumuangalaja mashimi; udi wenza bua bantu kabamanyi bulelela budi butangila Nzambi to.​—Buakabuluibua 12:9.

Bua tshinyi mashimi mmatampakane bikole lelu eu?

Tshikondo tshietu esthi tshidi Bible ubukila ne: “matuku a ku nshikidilu,” Satana udi usaka bantu bua kuenza malu kampanda ne udi ubapambuisha bikole kupita ne kumpala. Bantu ba bungi batu bashima anu bua kupambuisha bakuabu ne kubadiila pambidi. (2 Timote 3:1, 13) Mashimi mmatampakane mu bitendelelu bia bungi lelu eu. Anu mukavua Bible muambe bua tshikondo tshietu etshi, bantu ‘mbadiunguijile balongeshi bua kumvua malu adi abafunya ku matshi,’ ‘babenga kuteleja bulelela.’​—2 Timote 4:3, 4.

Bua tshinyi bulelela budi ne mushinga?

Bulelela budi buambuluisha bantu bua bobu kueyemenangana. Balunda bobu kabayi beyemenangana, bulunda buabu budi bufua; bena mu tshiapu kampanda bobu kabayi beyemenangana, tshiapu atshi tshidi tshifua. Bilondeshile Bible, Nzambi mmusue bua bulelela buikale nshindamenu wa ntendelelu wetu. Udi wamba ne: ‘Badi batendelela Nzambi badi ne bua kutendelela ne nyuma ne bulelela.’ (Yone 4:24) Bua kumanya mudi bulelela bua mu Bible mua kukuambuluisha, jingulula malongesha a dishima a mu bitendelelu ne kualondi kabidi to; ikala ubala biena-bualu bia ne: “Mashimi adi asaka bantu bua kubenga kunanga Nzambi.”

Bua tshinyi Nzambi mmusue bua mmanye bulelela?

Nzambi mmusue bua upete muoyo wa tshiendelele, nunku bua kuwupeta bidi bikengela ulonge bulelela pa bidi bimutangila. (1 Timote 2:4) Wewe ulonga mêyi a Nzambi a tshidi tshimpe ne tshidi tshibi, uatumikila, neulue mulunda wende wa pa muoyo. (Misambu 15:1, 2) Bua kuambuluisha bantu bua kumanya bulelela, Nzambi wakatuma Yezu pa buloba. Nzambi mmusue bua tulonde malongesha a Yezu.​—Matayi 17:5; Yone 18:37.

Nzambi neajikije mashimi anyi?

Eyowa. Nzambi mmukine bantu badi bashima bakuabu bua kubadiila pambidi. Mmulaye bua kubutula bantu bonso badi basue kutungunuka ne kushima pa buloba. (Misambu 5:6) Penzaye nanku, neakumbaje kabidi mulayi wende udi wamba ne: “Mishiku idi yamba bulelela neyishalaku kashidi.”​—Nsumuinu 12:19.