Bantemu ba Yehowa pamue ne bena Yuda bakashipibua—Ntshinyi tshidi Bible wamba?

Mu dia 27/1/2023, pa buloba bujima ba bungi nebasekelele mufikilu wa dituku divuabu bashipe bena Yuda kudi bena Nazi. Malu mabi menemene a tshikisu avua menzeke kukadi bidimu bipite pa 75 au adi mua kukufikisha ku didiebeja ne: bua tshinyi Nzambi wakalekela bashipa bantu nanku?

• Bua kumanya tshidi Bible wamba, bala tshiena-bualu tshia “Bua tshinyi Nzambi wakalekela bashipa bena Yuda miliyo ne miliyo? Kavua mupangishe bualu bua nanku bua tshinyi?”

Bena Nazi bakakengesha bena Yuda bibi bia dikema! Bakashipa bantu miliyo ne miliyo ba kudibu anu ku bukole. Bakakengesha kabidi bena bitendelelu bikuabu, kubashipabu. Mu bantu abu muvua Bantemu ba Yehowa bavuabu bakengeshe bua malongesha abu a mu Bible.

• Bua kumanya malu makuabu, bala tshiena-bualu tshia “Qu’est-il arrivé aux Témoins de Jéhovah sous le régime nazi?”

“Matuku atshilualua mimpe ne ditekemena”

Bantu ba bungi badi batshina ne: muanda bu mudi wa kushipa kua bantu kudi bena Nazi mmufuane kuenzeka kabidi. Diakalenga, Bible udi ulaya ne: kumpala eku malu mabi a nanku kaakuenzeka kabidi to.

• “‘Bualu ndi mumanye bimpe meji andi nnuelela,’ ke mudi Yehowa wamba, ‘meji a ditalala, ki nga dikenga to, bua kunupesha matuku atshilualua mimpe ne ditekemena.’”—Yelemiya 29:11.a

Ditekemena adi nedikumbane padi Yehowa Nzambi ujikija malu mabi ne ntatu idiwu makebeshe. Mu matuku makese emu:

• Neumbushe badi benzela bakuabu bibi.—Nsumuinu 2:22.

• Neondope bonso badibu benzele bibi.—Buakabuluibua 21:4.

• Neabishe bafue pa buloba apa.—Yone 5:28, 29.

Udi mua kuitaba ditekemena didi dikolesha didi Bible ufila edi. Bua kumanya bua tshinyi mbimpe kuditaba, tudi tukulomba bua utete programe wetu wa dilonga dia Bible dia ulonga ne mulongeshi kuyi ufuta makuta to.