Bantu ba makoba mashilangane nebalekelaku disungulujangana anyi?—Ntshinyi tshidi Bible wamba?

Bua ba bungi, bantu ba makoba mashilangane kabakulekela kusungulujangana to.

• António Guterres, mulombodi wa Bulongolodi bua matunga masanga udi wamba ne: “Mu tshitupa tshionso tshia buloba, disungulujangana dia makoba didi dinyanga malongolodi, bisumbu bia bantu, ne nsombelu wa bantu wa buatshia buila bikole. Didi ditungunuka ne kusaka bantu bua kuenzelangana bibi.”

Bantu ba makoba mashilangane nebalekelaku disungulujangana anyi? Ntshinyi tshidi Bible wamba?

Mudi Nzambi umona bantu ba makoba mashilangane

Bible udi utulongesha mudi Nzambi umona bantu ba makoba mashilangane.

• “[Nzambi] wakenza bisamba bionso bia bantu bifumine mu muntu umue bua kusomba pa buloba bujima.”—Bienzedi 17:26.

• “Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.”​—Bienzedi 10:34, 35.

Bible udi uleja ne: bantu bonso mba mu dîku dimue ne Nzambi udi witaba bantu ba makoba onso.

Mualekela bantu ba makoba mashilangane disungulujangana

Bukalenge bua Nzambi budi mbulamatadi wa mu diulu nebujikije disungulujangana dia makoba. Bukalenge abu nebulongeshe bantu mua kuenzela bakuabu malu makane. Bantu nebalonge mua kumbusha meji onso a disungulujangana dia makoba adibu mua kuikala nawu.

• “Badi basombele mu buloba [nebalonge] buakane.”​—Yeshaya 26:9.

• “Tshipeta tshia buakane bulelela netshikale ditalala, ne mamuma a buakane bulelela neikale bupole ne bukubi bia tshiendelele.”—Yeshaya 32:17.

Lelu bantu miliyo ne miliyo badi balonga mu Bible mua kunemeka bakuabu ne kubenzela malu ne bunême.

• Bua kumanya malu makuabu, bala Tabulukayi! udi ne tshiena-bualu tshia “Kudiku buanga bua kansungansunga anyi?”

• Bala tshiena-bualu tshia “Comment parler de racisme à votre enfant” bua kumanya mudi baledi mua kutata tshiena-bualu etshi kumbelu.