Dikepesha tshipupu tshia dishilangana

Mu katupa kîpi emu Mufuki neenze bua bantu bikale muomumue bu mutubu bajinga ne muoyo mujima. Mu dindila tshikondo atshi, tudi mua kuangata mapangadika bua kukepesha tshipupu tshia dishilangana tshidi tshitukuata tuetu ne mêku etu. Nelson Mandela, mfumu wa kale wa ditunga dia Afrique du Sud wakamba ne: “Tshidi tshitutapulula ntshitudi tuenza ne bitudi nabi, kadi ki mbidibu batupeshe nansha.”

MALU akadi menzeke adi ajadika mêyi ende aa. Bavua bapeshe bakaji ne balume ba bungi bintu bikese pakaledibuabu, kadi mu didiambuluisha ne bivuabu nabi, bakatanta mu mushindu wakabasunguluja ne bantu ba mu tshikondo tshiabu bavuabu mua kuikala bapeshe bintu bia bungi. Kadi bantu bavuabu bapeshe bubanji bua bungi katshia ku buana mbatule butulavi bivuabu nabi ne mbapangile bua kuenza mudimu ne bintu bia bungi bivuabu nabi.

Kuatshilamu mudimu ne biwudi nabi!

Bantemu ba Yehowa batu ne disanka dia kuambuluisha bantu bua bamanye malongolola a Nzambi pa kubalongesha Bible. Kadi mbajingulule ne: bantu badi ne bua kumanya mukanda bua malu adi mu Bible kutambawu kubambuluisha. Bua kabingila aka, Bantemu ba Yehowa mbalongeshe makumi a binunu bia bantu mua kubala ne kufunda, kusangisha ne bantu 23 000 (mu bidimu bikese tshianana kumpala kua kufika mu 1995) mu ditunga dimue patupu dia mu Afrike wa ku Ouest. Bua mudimu wa pa buawu udi Bantemu ba Yehowa benze bua kukuatshisha bantu, tshikandakanda kampanda tshidi tshiamba ne: “Nudi ne bua kubangata bu bamuena-muabu ba tshitembu. Badi bafuta bitadi ne muoyo mujima, bambuluisha babedi, baluisha dipanga mukanda.”​—San Francisco Examiner.

Kabidi, ku diambuluisha dia dilongesha dia ku kakese ku kakese dia mushindu wa kuakula patoke, Bantemu ba Yehowa mbalongeshe bantu binunu nkama ne nkama bua kulua bangamba-malu bapiluke, bamanye mua kuakula patoke kakuyi lutatu to. Munkatshi mua bantu aba binunu bivule mudi bamue bavua batata bikole bua kuakula. Tangila tshilejilu tshia muntu wa mu ditunga dia Afrique du Sud udi mufunde ne: “Bua tshikukumina tshikole tshimvua natshi ngakalua kampuwa, misangu yonso mvua ntekemena bua bakuabu bikale bakula pa muaba wanyi. . . . Pangakadifundisha mu Kalasa ka Mudimu wa Teokrasi ne pangakabala Bible kumpala kua bantu bakese . . . , ngakakukumina bikole menemene, meme kupangila ne bua kujikija dibala mu dîba dimfundila. Kunyima kua tshisangilu, [mufidi wa mibelu] wakampesha mibelu mimpe. Wakangambila bua kudibidija pa kubala ne dîyi dikole pa nkayanyi. Ke tshingakenza, dituku dionso mvua mbala Bible ne Tshibumba tshia Nsentedi ne dîyi dikole.” Muntu eu wakatshimuna tshikukumina bimpe ne mpindieu utu wenza miyuki ya patoke kumpala kua bantu batue ku nkama nansha binunu.

Kakuena dishilangana dibi munkatshi muabu

Bua bidi bitangila tulasa tudibu balonge, luondapu, bubanji ne mianzu ya mu nsombelu, malu mmashilangane bikole munkatshi mua Bantemu ba Yehowa. Dishilangana mu malu aa didi dileja mudibu mu nsombelu udi kayi mupuangane udi pa buloba. Kadi bishilangane ne bitendelelu bikuabu, Bantemu ba Yehowa mbumbushe ngenyi mibi miashila pa dishilangana dia makoba ne dia mu nsombelu munkatshi muabu.

Mbafike ku dikumbaja bualu ebu pa kuenza muabu muonso bua kutumikila bidibu balonge mu Bible. Mbanange ne muoyo mujima mêyi-maludiki a mu Bible bu mudi aa: ‘Yehowa kêna utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima.’ (1 Samuele 16:7) ‘Nzambi kêna ne kansungansunga, kadi yeye udi witabuja wa mu tshisamba tshionso udi umutshina.’ (Bienzedi 10:34, 35) ‘Kualukijidi muntu bubi ku bubi buende. Nudianjile kuela meji bua kuikala ne malu mimpe ku mêsu kua bantu bonso. Binuamanya mua kuenza nunku mu bienzedi bienu, nuikale ne bantu bonso ditalala.’​—Lomo 12:17, 18; tangila kabidi 1 Timote 6:17-19; Yakobo 2:5, 9.

Bu mudibu balamata bikole mêyi-maludiki aa a mu Bible adi akankamija buobumue, Bantemu ba Yehowa kabena bitaba bua munkatshi muabu muikale dishilangana dibi dishindamene pa makoba, nsombelu anyi bubanji. Tshilejilu, malu aa kaatu ne mushinga to padibu bapangadija bua kumanya muntu udibu mua kupesha midimu mivule mu tshisumbu tshia bena Kristo. Batu bashindamena anu pa malu-malomba a mu nyuma bua kupesha bantu majitu bu mudi a bulongeshi anyi butangidi.​—1 Timote 3:1-13; Tite 1:5-9.

Bua bantu badi bakenge bua dishilangana dibi didi mu bukua-bantu buule ne kansungasunga, bidi bibakolesha ku muoyo bua mudibu ne bantu bakuabu badi babangata bu bana babu ba balume ne ba bakaji badi diatshimue ku mêsu kua Mufuki. Martina udi ujadika bualu ebu. Kunyima kua tatuende mumane kunyema dîku diabu, bakamukolesha mu bupele kudi mamuende. Pa tshibidilu bavua bamuangata bu muntu udi bantu babenge, yeye muine kavua utamba kudiangata ne mushinga ne bivua bimukolele bua kusomba ne bakuabu. Wakapeta mmuenenu wa dilengulula malu onso. Kadi malu akashintuluka pakatuadijaye kulonga Bible ne pakaluaye Ntemu wa Yehowa. Udi wamba ne: “Ntshitshidi ne bua kuluisha meji mabi andi ngela, kadi mpindieu ndi mumanye mua kutantamena ntatu. Ndi ndiangata ne mushinga ne ngakula ne dishindika. Bulelela mbungambuluishe bua kujingulula bujitu buanyi. Mpindieu ndi mumanye ne: Yehowa mmunange, ne se: kuikala ne muoyo nkuimpe.”

Bu tshisumbu tshia bena Kristo tshidi pa buloba bujima, Bantemu ba Yehowa badi mu matunga mapite pa 230 badi diatshimue mu bualabale kampanda ne ebu mbualu bua pa buabu lelu’eu pa buloba. Kudiku tshitendelelu tshikuabu tshidi mua kuamba mêyi a mushindu’eu ne kuajadika ne bienzedi anyi?

Bushuwa, Bantemu ba Yehowa batu bamba malu mudiwu. Badi bitaba kakuyi dielakana ne: bu mudibu bantu bapange bupuangane, kabena ne bukokeshi bua kumbusha dishilangana dibi didi mu bantu anu bu muvua bakuabu batete bua kudiumbusha munkatshi mua nkama ya bidimu kadi bapangile. Nansha nanku, badi basanka bua mudibu benze madikolela a bungi bua kukepesha tshipupu etshi tshitu tshilela lufu munkatshi muabu. Ne bu mudibu ne ditabuja dikole mu dilaya dia Nzambi, mbatekemene bukua-panu bupiabupia bua buakane muikala dishilangana dibi kaditshiyimu nansha kakese.

Bushuwa, bantu bonso bena butumike nebapete tshiakabidi “lumu ne manême” a diatshimue bivua Mufuki wabu mubalongoluele ku ntuadijilu. Elu ndungenyi ludi lusankisha. Ne bua musangu eu neluikale bualu bulelela buenzeka!

[Tshimfuanyi mu dibeji 7]

Bantemu ba Yehowa badi baluangana ne dipanga mukanda pa kulongesha makumi mavule a binunu bia bantu bua kubala ne kufunda

[Tshimfuanyi mu dibeji 8]

Bulelela bua mu Bible budi buambuluisha bua kumbusha meji mabi mashindamena pa dishilangana dia makoba, mianzu ne bubanji