Dishilangana​—Nzambi uvua mulongolole bua dikaleku anyi?

Tudi tuandamuna mu tshikoso ne: tòo. Tumonayi bua tshinyi tudi bandamune nanku.

NZAMBI uvua mulongolole bua bantu bonso bikale ne muoyo ne disanka mu mushindu wa muomumue. Tudi tubala bua difukibua dia muntu ne: ‘Nzambi wakamba ne: tuenza muntu ne tshifuanyikiji tshietu mufuanangane netu, balue bakokeshi ba minyinyi ya mu mâyi manene ne ba nyunyu ya muulu, ne ba bimuna, ne ba buloba buonso, ne ba tshintu tshionso tshidi tshidikoka panshi.’ Pakajikijaye kufuka buloba, ‘Nzambi wakamona bintu bionso biakenzeye ne: biakadi bimpe be.’​—Genese 1:26, 31.

Nzambi udiku mua kuamba bua nsombelu mubi wa dishilangana udiku lelu ne: ‘mmuimpe be’ anyi? Nansha kakese, bualu “Nzambi udi dinanga.” (1 Yone 4:8) Badi bamba bua bualu buende ne: ‘Katu utangila bantu ne kansungasunga’ ne se: ‘mudimu wende wonso udi muakane, bualu bua njila yende idi [buakane, NW]: Nzambi wa kalolo udi kayi ne bubi, udi ne malu makane a bushuwa.’ (Dutelonome 10:17; 32:4; tangila Yobo 34:19.) Mupostolo Petelo udi wamba ne: ‘Bulelela, ndi njingulula ne: Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bienzedi 10:34, 35.

Bu mudi Nzambi muikale wa dinanga, kayi ne kansungasunga, muakane, mululame, mmunyi mudiye mua kuikala mufuke bantu bashilangane ku bukenji budibu nabu bua kuikala ne disanka? Kulekela kansungasunga mu bantu ne kubateka bikale bashilangane kakuena kupetangana ne bumuntu buende nansha. Uvua mulongolole bua se: bantu bonso “baledibue ne budikadidi ne bikale ne mushinga ne bunême bua diatshimue.” Kadi lelu malu kaena amueneka nanku to. Bua tshinyi?

Ntuadijilu wa dishilangana

Patudi tuamba ne: Nzambi wakafuka bantu bua bikale diatshimue kabiena biumvuija ne: uvua mulongolole bua bonso bikale mushindu umue mu malu onso nansha. Bavua mua kushilangana ku bipedi, malu adi asankisha muntu ne muntu ne ku bumuntu. Bavua mua kushilangana kabidi ku mianzu yabu anyi ku bukokeshi. Tshilejilu, mulume ne mukaji kabena mumue mu malu onso to, kadi Nzambi wakafuka mukaji bu “mukuatshishi” wa mulume. (Genese 2:18) Kakuyi mpata, baledi ne bana mbashilangane ku bukokeshi. Nansha mudiku dishilangana mu malu aa, bantu bonso​—balume ne bakaji kabidi ne bana—​bavua ne bua kuikala ne mushindu wa muomumue wa kukumbaja majinga abu manene bua kuikala ne disanka bu bukenji bubapesha kudi Nzambi. Buonso buabu bavua ne bua kuikala ne bunême ne lumu lua diatshimue ku mêsu kua Nzambi.

Bia muomumue, Nzambi uvua mupeshe bana bende ba mu nyuma bavuaye mufuke kumpala kua kufuka bantu midimu ne majitu mashilangane. (Genese 3:24; 16:7-11; Yeshaya 6:6; Yuda 9) Nansha nanku, mu mikalu ya bivuabu babapeshe, bonso bavua ne mushindu wa kupeta bintu bivua Nzambi ubapesha bua kuikalabu ne muoyo ne disanka mu mushindu wa muomumue. Nenku mu mushindu mulenga bavua baleja mudi Nzambi kayi ne kansungasunga nansha.

Bia dibungama, tshifukibua tshimue tshia mu nyuma katshivua tshisanke bua muvua Nzambi mulongolole malu kakuyi kansungasunga to. Muanjelu au uvua ukeba bia bungi kupita bivua Nzambi mumupeshe, kujingaye bua kupeta muanzu mutambe kubandila. Pa kushala mulame dijinga edi dibi, wakabanga kutembangana ne Yehowa, Mufuki udi ne bukenji buonso bua kuikala ku mutu kua bionso. Muana wa mu nyuma wa Nzambi eu uvua ntomboji wakalua kusaka bantu ku dilomba Nzambi bintu bipite bivuaye mubapeshe. (Genese 3:1-6; tangila Yeshaya 14:12-14.) Nenku, malu avua Yehowa mulongoluele bantu bua kuikalabu ne muoyo ne disanka akamueneka masakila ne makasa. Ntomboji eu wa mu nyuma, muleja mu Buakabuluibua 20:2 bu “Diabolo ne Satana,” ke mukebeshi wa dishilangana dibi didi mu bantu.

Malu neashintuluke anyi?

Diandamuna didi ne: eyowa!

Kadi nnganyi udi mua kushintulula malu mudi bantu bajinga? Kakuyi mpata, bamue bamfumu mbenze madikolela ne muoyo mujima bua kushintulula nsombelu munkatshi mua siekele mivule. Malu adibu bashintulule mmakese menemene, ne mbifikishe bantu ba bungi ku diamba ne: kabiena biakane bua kutekemena se: dishilangana dibi didi mu bantu dijike nansha. Kadi mbafunde mmuenenu wa Nzambi mu Yeshaya 55:10, 11 (Mukanda wa Mvidi Mukulu) ne: ‘Padi mvula ne busu bua neje biloka mulu, kabiena bipinganamu kabiyi bianji kubolesha buloba, kabiyi bianji kubufukisha ne kumeneshapu bintu bidi mua kupetesha tshidime maminu ne biakudia. Ke mudi muaku udi upatuka mukana muanyi; kawena upingana kundi tshianana kauyi muanji kukumbaja tshindi musue, kauyi muenze bualu bundi muutumine.’

Bidi bikolesha ku muoyo bua kumvua se: Yehowa Nzambi mmuambe ne: neakumbaje dilongolola diende dia ku ntuadijilu bua kupesha bantu bonso nsombelu ya muomumue bua kuikala ne muoyo ne disanka. Bu mudiye Nzambi wa bulelela, mmudifundile tshipatshila tshia kukumbaja bualu budiye mulaye. Bualu bua diakalenga, mmusue ne udi ne bukole bua kuenza nanku. Mmunyi muakumbajaye dilongolola diende edi?

Bukalenge buvua Yezu mulongeshe bamulondi bende bonso bua kulomba ne: ‘Tatu wetu udi mu diulu . . . Bukalenge buebe bulue. Benze pa buloba mûdi musue bu mudibu benza mu diulu’ ke buakumbaja dilongolola diende. (Matayo 6:9, 10) Bushuwa, Bukalenge bua Nzambi ke buikala Yehowa mua ‘kutshibula [nabu] makalenge aa onso [adiku lelu’eu] bitupa bitupa, buabutula, ne buobu bujalama tshiendelele.’​—Danyele 2:44.

Mu bukokeshi bua Bukalenge bua mu diulu, nekuikale nsangilu mupiamupia wa bantu. Bua bualu ebu, mupostolo Yone wakafunda mu Buakabuluibua, mukanda wa ndekelu wa mu Bible ne: ‘Ngakatangila diulu dipiadipia ne buloba bupiabupia; bualu bua diulu dia kumudilu ne buloba bua kumudilu biakumuka.’ (Buakabuluibua 21:1) Malu mabi onso atu dishilangana dibi dikebesha tshilejilu bu mudi: bupele, masama, dipanga, kansungasunga ne makenga makuabu a bantu, neajike.a

Bantemu ba Yehowa mbakoke ntema ya bantu ku Bukalenge ebu kukadi bidimu bipite pa 100. (Matayo 24:14) Ku diambuluisha dia mikanda, mbadienzeje bua kufikisha bantu ku dimanya malu adi Nzambi mulongolole bu mudiwu mafunda mu Bible. Ee, mudimu wabu wa dilongesha bantu pa buloba bujima mmupeshe bantu ditekemena dia kuikala ne nsombelu ya muomumue ne disanka mu matuku atshilualua, ne mmuambuluishe kabidi mpindieu bua kukepesha tshipupu tshia dishilangana dibi. Tumonayi mudibi bienzeke.

[Mêyi adi kuinshi]

[Lungenyi lunene lua mu dibeji 5]

Nzambi uvua mulongolole bua bantu bonso bikale ne muoyo ne disanka mushindu wa muomumue